Mk 2

Yesus abò mbombog mvoè

Mt 9,1-8; Lk 5,17-26

1Ndò angadugan nyian a Kafarnao a mvus ban mëlu, foe etsaman na anë a nda#2,1 Eyòṅ ziṅ na Yesus angabë anyiṅi a nda Simun ngë a nda dzie nyè emen.. 2Abui bod akoan fò, e kan yë na tègè fë ai afola, tò ben mfa ya mbè, angakad hm bò Ebug. 3Ndò bëngasò bëbëgë mbombog, bod bënyii bëbëgë nyè a yob. 4Mbol bëngabë ki nyè dzam subu babi, ai abui bod angabë hala, ndò bëngakode ndil e hom angabë, alòṅa ligi ete, bësuu ondanga ya mbombog ongabë ete. 5Yesus ayënë ṅyëbë waban, nyè ai mbombog na: A mòn, minsëm mie mivaaban wa. 6Bësaṅa bëkalara bëziṅ bëngabë bëtoa hala, bëngalaṅëdan a minnëm miaban, bò na: 7A dze e mod nyò akòbò e kan nyi? Afodan#2,7 Afodan ha atyan na atè Zamba. Badzo na Yesus abèan Zamba, e dzam ya adzo anë hë anë mod wafodan.! Yë mod mfë abëlë ngul ya avaè minsëm alodo anë Zamba etam? 8Yesus alaṅ a fò nnëm waban, e kan bëngabë laṅëdan ete, nyè ai bò na: Dze miakë miafèd a minnëm mian? 9Dze yadaṅ ebugbu, yë adzo ai mbombog na: Minsëm mie mivaaban wa, yë adzo ki na: Tëbëgë, nòṅò ondanga woe, owulu? 10Ndò hm, asu yë na mizu yëm na mòn mod abëlë ngul ya avaè minsëm a si, nyè ai mbombog na: 11Wa madzo ai nyè, tëbëgë a si, bëëgë ondanga woe, okë a nda dzoe. 12Ndò angatëbë a si, abëgë fë ondanga woe etye etye, akui, bod bësë bëtala, e kan yë na bësë bëngakam. Bëngalugu Zamba, bò na: Biabë ya ki yen e kan nyi eyòṅ efë!

Yesus aloe Levi

Mt 9,9-13; Lk 5,27-32

13Ndò angadugan kë a ntsag maṅ. Nkunda bod osë ongakë abë nyè, nyè angayëgëlë bò. 14A akëlë ha, ndò ayen Levi, mòn Alfeus, atoa a nda-toya, nyè ai nyè na: Zaa watoṅ ma. Ndò angakodo a si, angatoṅ nyè. 15Ndò hm labò na, atoa na adi a nda dzie, abui bënòṅò bë toya ai bësëm bëntoa ai Yesus ai bëyègè boe ha. Amu bëngabë abui, bëkëlë babie nyè. 16Ndò, bësaṅa bëkalara ai bëfarisea bëngayi yen anë adi ai bësëm ai bënòṅò bë toya#2,16 Bënòṅò bë toya bëkarëga bede dzom a yob eyòṅ basili bod na bëyaan toya. Asu te bod bësë bëdzoo na bënë miṅwuwub., ndò badzo ai bëyègè boe na: Asu dze adi ai bësëm, ai bënòṅò bë toya? 17Yesus awogo adzo di, nyè ai bò na: E bod bënë mvoè bayaṅan ki ai mbò mëbala, minkokòn mmiè miayaṅan ai nyè! Mandzëki sòṅ na mazu loe bësosoo, bësëm mbò mëngazu loe.

Adzo eki bidi

Mt 9,14-17; Lk 5,33-39

18Bëyègè bë Yohannes ai bëfarisea bëngabë baala eki bidi#2,18 Yuden bëbëlë nguma amos endëgëlë. Baloe amos te na «Yom Kippur». Amos te ngò mod osë anë enòdi na aki bidi, abò endëgëlë. Dzam da, bëfarisea bëkarëga ki bidi asu minsëm mi e bod bëvòg biyòṅ bibè a nguma sòndò. Eki bidi ai mënyu engabë bòban ai amos, atarigi a mëkui më dzobo, akui a mëyimbi më dzobo. Yesus angabë kii ki bidi ai mënyu.. Ndò bazu nyè sili na: Asu dze bëyègè bë Yohannes ai e ba bëfarisea babaala eki bidi, hë da bëyègè boe të dzò baala? 19Ndò Yesus adzo ai bò na: Yë e bod bënë a nsamba alug bënë dzam ki bidi ntye nlugu anë ai bò? Ntye osë nlugu angënë ai bò basëki dzam ki bidi. 20Dzam da, mëmos mazu, a bayi bò vaa nlug a zaṅ dzaban, eyòṅ te hm bayi ki bidi amos te. 21Bakad ki bede mkpamaṅ abaag a ntu eyie. Bëbò fë nala, abaag layi tonde e hom otëg ya, eyie engafëdan nyabi. 22Ndò fë bakad ki fudi mimkpamaṅ mëyòg a minnom mëndëg. Bëbò hm fë nala, mëyòg mayi boe e mëndëg ma, mëyòg mëdzaṅa a si, mëndëg fë dzam dëda. Mimkpamaṅ mëyòg makyëbe ai mimkpamaṅ mëndëg.

Bëyègè bakoe fes a amos sabbat

Mt 12,1-8; Lk 6,1-5

23Ndò fò labò ha na, Yesus akëlë awulu a zaṅ mëfub a amos sabbat, a bëkëlë a zen ha, bëyègè boe bëkèè na bakoe fes. 24Bëfarisea bò ai nyè na: Wayen anë babò e dzam anë mvende a amos sabbat a? 25Nyè ai bò na: Miandzë ya laṅ anë David angabò, a bëngabi mëyaṅan, bëwogo zie, ai nyè ai bod boe, 26mbol anganyian a nda-Zamba, hala Abiatar atoa fada nen, ai mbol angadi bëmbaṅëla mëtunëṅa a bëfada etam bënë dzam di, avëë fë e bod bëngabë esamba ai nyè? 27Nyè ai bò na: Bëngabò sabbat asu mod-binam, mod andzëki komban asu sabbat#2,27 Mvende esë enë asu yë na yavòli mod binam. Mod ayean ki vëṅan olò mvende.. 28Antoa hm na, mòn mod adzoe sabbat emen.

Currently Selected:

Mk 2: NTE12

Highlight

Copy