Sdaɗi Apostelai 5
5
Ananiyas gaiɗi Safira
1Amma ɗif ktai yikini Ananiyas gaiɗi Safira na munini, e wûri vowaiɗi ktai edi. 2A kata mini gaiɗi munini, a mula edi pini farai na a navaŋsi ɗa a ŋoyaŋ. Pini n'a hina ɗa a kaŋsi a tikaŋ wuzaɗi Apostelai. 3Peter a miɗini: Ananiyas, Satan a va agulku ɵa buri maɗa? Na haa ku zini eles wiini Seze-sɗik, ku ŋoyasi pini farai na vowaiku a sumaŋsi edi ɗa! 4Won hlai na a na ka tuku su ɗa, ɗif a zuku dewele muduku aŋ wuraŋ edi ɗi? Won hlai na ku wuraŋsi edi kaai ɗa, faraini a na fu tuku paŋ, ku ŋa miɗini maini na ku dara ɵa kai ɗi? Ku hiina sɗa na maini hanɗa nɵa maɵa maɵa ɗa? Ku za eles na ɗa wiiɗi ɗai kai, amma wiini Alaw. 5Won hlai na Ananiyas a ɵina seŋ hanɗa, kɵa azumai, suŋfani a wa edi. Hunai n'amai te yimiɗi nagai paŋ n'e ɵini hanɗa. 6Gawlakai e fikisi e fiɗiŋ warni sapa, e tikiŋ e hili e piŋ.
7Gobi ler hu asakal par, munini te halasi, te niya amlai, te sɗa wala na a za wuzaɗi ɗa kai. 8Peter a zilbiti a muɗa: Muɗaŋa haw ɗa, ki wûri vowaiki ɗa edi na ɗa burini farai hanɗa ɵa ta ɗi? Te wiyini seŋ, te miɗini: Nkam a na burini farai hanɗa ɵa ta. 9Nɵa Peter a miɗini: Ki kiti miki gaini mofaku aŋ titimi Seze na wiini Epiɗ-ɗai ɵa maɵa maɵa ɗa? Nagai n'e pisi mofaku ɗa, e ɗa mini hlai ya, aga e libuku tuku lai. 10War hlai ni tizaw te kɵa azumai ezini, suŋfaɗi a wa edi, won hlai na gawlakai e niyisi amlai e nivitisi gaini mri su; e tikiti, e hili e piti ɵimaɗi mofaɗi tiɓ. 11Hunai n'amai te yimiɗi zi yimi paŋ, gaiɗi nagai n'e ɵini hanɗa paŋ lai.
Wazagai zi hiila na Apostelai e ziŋ
12Apostelai e zi wazagai zi siŋki viya gaini zi hiila viya lai arbaɗi ɗai. Nagai e simni miɗi ktai pini balak na wiini Salmun. 13Ɗai na zamai ɗa, ktai na a tapasi gaiɗi aŋ kai, amma ɗai e kûlûɗi gara. 14Ɗai e yimi pini Epiɗ-ɗai wuzaɗi sek sek, maɵagai gaiɗi falakai lai e piɵi kai. 15Ɗai ɗa e kiɗisi ɗaiɗi zi veglek edi warɗi futi, ɵimaɗi futi n'abakai, e tikiɗi warni wala zi feŋ gaini n'e libiɗisi gaini lai kapai won hlai na Peter a vugazi li ɗa, sezeni a tika miɗini ktai ta ɗi ɗa. 16Firiɗi ɗai e hilisi war fuŋ n'abakai na ɵimaɗi Yeruzalem ɗa par, e libiɗisi zi veglek gaiɗi nagai na ksalai a na hûwyiɗi ɗa.
E yimiɗi Apostelai, asakal par e miliɗi lai
17Nɵa pai n'abai zi ɓaka gaiɗi nagai n'e ɗa gaini paŋ, a dara a muɗa: Vok na wiiɗi Sadusekai, e vi gaini sile, e fikisi amai siɗi Apostelai, 18e yimiɗi, e dûgûɗi war daŋgai na gdeŋi. 19Amma war duvuk ɵeŋ na wiini Epiɗ-ɗai a mala miɗi daŋgai ɗa edi, a miliɗisi anene a miɗiɗi maini nɵa: 20Hili, ki ɗiyi amlai warni tempel ɗa, ki miɗiɗi seŋ zi suŋfa hanɗa wiiɗi ɗai ɗa. 21Won hlai n'e ɵini hanɗa, e hili amlai warni tempel, gorof par cup e ɗa hitri.
Paakai n'abakai zi ɓaka gaiɗi nagai n'e ɗa gaini e cûsi, e yikiɗisi ɗai zi kiti seŋ ɗa, gaini vokɗi n'abakai n'arbaɗi ɗai na Izrayel ɗa paŋ lai, e ɵini aŋ yimiɗisi Apostelai amlai war daŋgai par. 22Won hlai na ɗai zi gɗam e cû ɗa, e niviɗi amlai warɗi daŋgai ɗa kai, e wiyisi e kisi miɗi maini hanɗa nɵa: 23Tiyi mi niviti daŋgai ɗa, miɗi gaini ɵi gaini fuini, ɗai zi gɗam war balamɗi mini magala ca ca lai. Won hlai na mi mili mini hlai edi ɗa, mi nivi ɗif ktai maa amlai kai. 24Won hlai n'e ɵini seŋ hanɗa, abaiɗi ɗai zi giɗimi tempel ɗa lai, paakai zi ɓaka lai e bindi hiyak e siɗi wala n'e miɗiŋ midiɗi kai. E zilbi siɗi lai ɓa: Seŋ ɗa a za fu na maɵa ɗa? 25Ɗif ktai a halasi a miɗiɗi: Ɗai na ki pûkûɗi war daŋgai ɗa, e ɗisi amlai warni tempel aŋ hitriɗi ɗai. 26Nɵa abaiɗi ɗai zi gɗam gaiɗi ɗai zi gɗam e hini e yimiɗisi, amma e ziɗi gir kai buri e hiini ɓa ɗai aga e fiɗiɗi edi gaini kriyit.
27Won hlai n'e kiɗisi li, e ɗiyiɗi wuzaɗi ɗai zi kiti seŋ ɗa, paakai n'abakai zi ɓaka e zilbiɗi: 28Mi gidiki miki buri ki hitri war yiki ni kai, ki ɵini kai ɗi? Tiyana ki viti Yeruzalem gaini hitri hanɗa ta, ki firiyi ɓa sai felni ɗif hanɗa, a kɵa midiyi koo! 29Peter a waya seŋ, Apostelai na zamai e wiyi seŋ nɵa lai e miɗi: A pɗem ɓa mi ɵini pini Alaw, a suwa ɵeŋ na piɗi ɗai ɗa. 30Alaw na wiiɗi tamaimu a ɵiyasi Yesu amai, Ni na tiki ki fiɗiŋ edi, ki tûkûŋ amai sini dagra, 31Alaw a sini rɗi n'amai war spakni aŋ pai, aŋ ɗif zi kûri lai, aŋ bunda payaiɗi ɗai na Izrayel ɗa gamai, aŋ hiniɗi tuwurɗi lai. 32Tiyi mi ɗi zaidakaini wazagai hanɗa gaini Seze-sɗik na Alaw a siŋɗi wiiɗi nagai n'e ɵini mini lai.
33Gaini hiy n'abai, ɗai hanɗa e rgi warɗi buri e fiɗiɗi edi. 34Amma ɗif na Farise ktai yikini Gamaliyel, a ɗif na a sɗa gadai gara, na ɗai paŋ e firiyiŋ gara lai, a faka amai arbaɗi ɗai zi kiti seŋ, a miɗiɗi buri Apostelai e niyi anene buri hlai n'agwi haw. 35Asakal par a muɗa: Tiki ɗai na Izrayel, zi hangal gaini wala na ki diri ki ziŋ siɗi ɗai hanɗa, 36buri ɓa wuzani mefeŋ hanɗa par ɗa, ɗif ktai na yikini Teyodas a faka amai a yika sini aŋ ɗif, ɗai gobi miya puɗu e tipi pini lai, e fiɗiŋ edi, ɗai n'e tiɓi pini e ɵiri edi lai. Wala ktai maa a hina kai. 37Asakal ni par ɗa, Yudas na Galeliya par a fakasi amai war sarti na wiini pɵi ɗa, a mula ɗai pini viya, ni lai a ba edi, nagai n'e tiɓi pini ɗe e ɵiri edi lai. 38Tiyana ɗa, mu miɗiki ɓa, ki tiɓi piɗi ɗai hanɗa kir kai, hiniɗi e zi walaɗi. Na ɓa hiini na a rga warɗi gaini sɗa n'e ziŋ ɗa a na wiiɗi ɗai ɗa aga a vada edi. 39Amma na ɓa hanɗa a na sini Alaw par ɗa, e kiɗi e vidi edi gaiki kai. Ki zi hangal kapai ki nivi siki war hatam gaini Alaw kai. Seŋni ɗa, a yima hiiniɗi. 40E yikiɗisi Apostelai ɗa, e ɵiɓiɗi gaini daɓala, e gidiɗi miɗi buri e miɗi war yikini Yesu kir kai, e hiniɗi e hili.
41Apostelai e niyisi anene wuzaɗi ɗai zi kiti seŋ ɗa par gaini firiyi, buri a tala arni Alaw pɗem ɓa e kiɗi aŋ nivi miisi burini yiki hanɗa. 42Mefeŋ paŋ, amlai warni tempel lai, aha war dalam lai, e hitri, e ɓiki labar na pɗem miɗini kristu Yesu lai.
Currently Selected:
Sdaɗi Apostelai 5: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
