Pi zi tiki 33
33
Yakob a nava gaini Ezaw
1Yakob a yima arni amai, a tala Ezaw a na halasi gaiɗi ɗai pini miya puɗu. A ɓûrwiɗi aliyagoi arbaɗi Lea, Rakel gaiɗi bagakai na sulu lai. 2A miliɗi bagakai gaiɗi aliɗi edi avut, asakalɗi par Lea gaiɗi aliɗi, Rakel gaini Yosef lai. 3Ni gaini midini dama a halasi a ɵa edi wuzaɗi su. Haa hlai na cosi gobi sin tawalni ta ɗa, a hurga azumai midini afti azi muguzak. 4Ezaw a lawasi arni, a kɵa amai wulani, e yimi marɗi kiŋ kiŋ. E tûwi gaini suliɗi. 5Asakal par Ezaw a yima arni amai a tiliɗi falakai gaiɗi aliyagoi a muɗa: N'e ɗi gaiku na ɗa e ɗi miɗi asiya ɗa? Yakob a waya seŋ: E ɗi ali n'Alaw a siɗiŋa wiya ta na ɵeŋku. 6Bagakai e tûrûsi sini gaiɗi aliɗi e hûrgû azumai. 7Lea gaiɗi aliɗi lai e tûrûsi sini e hûrgû azumai. Asakal par, Yosef gaiɗi Rakel e tûrûsi sini e hûrgû azumai lai.
8Ezaw a muɗa: Farani wazagai na mu navaŋsi na paŋ ɗa a zi maɗa? Yakob a waya seŋ: Mu firya mu nava yim wuzani arku tuku n'epin-geza. 9Ezaw a waya a muɗa pra: Tawala m'aŋ war kiɗi na viya a suwa suwai. Nɵa wazagai na wiiku a hina aŋ wiiku. 10Yakob a ɗuula a muɗa: Zaw kai, mu siiwuku, na ɓa mu nava yim wuzani arku li, aga ku yima likeŋa war ta par. Buri mu tala wuzani arku maini n'e tili wuzani arni Alaw nɵa, pra ku yimaŋa suku gaini firiyi lai. 11Nɵa yima katu n'e kiŋɗi suku ta par kaa, buri Alaw a saŋ sa kadai, wazagai aŋ ta viya. A piŋni mini haa, Ezaw a yimaŋ lai.
12Ezaw a muɗa: Fukumu amai, hulumu aga mu ɵa wuzaku. 13Yakob a wiyini seŋ a muɗa: Epin-geza a sɗa ɓa aliyagoi gdaŋɗi gara kai, adumai gaini ɵaakai n'alini a na ca fiyaw aŋ pa, na ɓa mu zunumu gdaŋ li miɗini koo buri mefeŋ ktai tekeɗeɗi, adumai gaini haakai aga a mra edi kafa. 14A pɗem ɓa epin-geza a halaɗi ka wiini wuzani ɵeŋni zawa. Ta aga mu halaɗi gaini hangal hangal, warni kiɗini hilini fara n'aŋ pa gaiɗi aliyagoi lai, haa aga mu coɗi sini epin-geza war Seyir. 15Ezaw a muɗa: Mu firya ɓa, zamai arbaɗi ɗai n'e ɗi pa e hiniɗi gaiku. Yakob a waya seŋ a miɗini: Aŋ zi ma Na ɓa mu nava yim li arni epin-geza hanɗa a kiɗaŋa ta.
16Mefeŋni dama Ezaw a tikiti futi a Seyir sek. 17Amma Yakob a hala a Sukkot, woni a rgiti dilimini zi feŋ gaini dugo na burini farani faraini. Buri hanɗa a sini yiki wiini hlai ni ɓa: Sukkot a dara muɗa dugo.
Yakob aha war Kanaan
18Yakob a wayasi edi war hlai na plas na Mezopotamiya par, a cosi aha war fuŋ n'abai na Sikem na te na midini afti na Kanaan jam. A sumna ɵimani fuŋ n'abai ɗa gobi. 19A wura galni vowai agwi n'a pa gumuni woni tiɗi alini Hamor, n'a tikiti Sikem azumai, faraini sulai zi arzaŋ miya ɗaw. 20A rga gûwiŋ zi ɓaka, a sini yikini ɓa: El, Alaw na wiini Izrayel.
Currently Selected:
Pi zi tiki 33: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
