Yohana 4
4
Yesu gaiɗi muni na Samariya
1Won hlai na Yesu a sɗa ɓa Farisekai e ɵini ya ɓa aŋ gaiɗi ɗai zi hitri viya, a na sa baptisme lai a suwa Yohana. 2War jreni kaai tiɓ ɗa, Yesu gaini midini dama a sa baptisme kai, e siŋɗa e ɗi ɗaini zi hitri. 3a yima sini edi midini afti na Yudiya par a waya midini afti na Galeliya. 4A dewele ɓa a vuga warɗi Samariya par ɗaw. 5Nɵa a co warni fuŋ n'abai ktai na Samariya na yikini ɓa Sikar, gobi gaini vowai na Yakob a siŋni wiini Yosef n'ahini. 6Keleŋi na wiini Yakob te na fu woni, Yesu gaini kayai tini hili su, a sumna amai miɗi keleŋi dam, futi gobi girvudi n'arba. 7Muni na Samariya ktai te halasi aŋ bula yem. Yesu a miɗiɗi: Sa yem ma do. 8Ɗaini zi hitri e ɗi fu, e hili aha warni fuŋ n'abai e wirisi wala zi simi- 9Muni na Samariya ɗa te miɗini: Tuku ɗif na Yudiya na ni, ku zilba yem zi ci ta ta muni na Samariya ɗa maɵa maɵa ɗa? Buri Yudiyakai ɗa e firiyi ɓa wala ktai a tipiɗi gaiɗi Samariyakai kai. 10Yesu a wiyiɗi seŋ: Ku sɗafu like na wiini Alaw ya ɗa, ku sɗa siɗi ni na muɗuku ɓa: Saŋa yem zi ci ma do na lai ɗa, a na ta ɗa, ku zilbaŋ ɗa ku tuku, ni ɗe aga a suku yem n'a sa suŋfa lai. 11Muni te miɗini: Epiɗ-ɗai, wala zi bili yem tuku kai, keleŋi ɗe hulumi lai, nɵa yem n'a sa suŋfa hanɗa, ku navaŋsi wata par ɗa? 12Tuku ɗa, abai ku suwa Yakob n'epiyi n'a sitiyi keleŋi hanɗa, na ni dama a ca yem warɗi par gaiɗi alini, gaini faraini lai ɗi? 13Yesu a waya seŋ a midiɗi: Asiya ɗi paŋ n'a sa yem hanɗa, sai aga te zaŋ pra. 14Ni n'aga a ca yem na ta aga mu siŋni ɗa, sai aga te zaŋ kir kai zaŋ, yem n'aga mu siŋni ɗa, aga a bunda warni aŋ yem zi liwi, aga a liwa haa sini suŋfa n'a vada kai. 15Muni te miɗini: Epiɗ-ɗai, saŋa yem hanɗa kapai sai te zaŋa kir kai, kapai mu wayasi aŋ bula yem won na pra kir kaalai. 16Yesu a miɗiɗi: Hala, yikasi mofaku ka, kapai ku wayasi. 17Muni te miɗini: Mafa aŋ kai. Yesu a miɗiɗi: Ku muɗa ɓa mafa aŋ kai ɗa, ku muɗa a jre, 18buri ɓa, ku mula maɵagai ɵim, ni n'aŋ gaiku tiyana ɗa a mafu kai, nɵa ɗa ku muɗa ɗa a jre. 19Muni te miɗini: Epin-geza, a yima li mada ɓa tuku ku ɗif na mini Alaw. 20Tamaiyi e hûrgû azumai wuzani Alaw amai midiɗi huwuŋ hanɗa, amma tiki ki miɗi ɓa, hlai n'e hûrgû azumai wuzani Alaw warni ɗa, a na ɗa a Yeruzalem. 21Yesu a miɗiɗi: Muni, seŋ na mu muɗuŋku na ɗa, yimaŋ muduku pɗem, hlai aga a halasi n'aga ki hûrgû azumai wuzani Api ɗa midiɗi huwuŋ hanɗa kaalai, a Yeruzalem kaalai. 22Tiki ɗa, ki hûrgû azumai wuzani wala na ki sɗiŋ kai, amma tiyi ɗa, mi hûrgû azumai wuzani wala na mi sɗiŋ buri kûri a halasi siɗi Yudiyakai par. 23Amma hlai aga a halasi, a cosi ya lai, war hlai ni, ɗai n'e hûrgû azumai wuzani Api jre jre ɗa, aga e hûrgû azumai wuzani Api war seze, war jre lai. Buri hanɗa e ɗi ɗai n'e hûrgû n'Api a firiyiɗi ɗa. 24Alaw a Seze, a juva ɓa nagai n'e hûrgû azumai wuzani ɗa, e hûrgû azumai war seze, war jre lai. 25Muni te miɗini: Mu sɗa ɓa Mesiyas aga a halasi, - Ni n'e yikiŋ ɓa Kristu ɗa, won hlai n'a halasi li ɗa, aga a muɗumu midini wazagai n'aga a za ɗa paŋ. 26Yesu a miɗiɗi: Mu muɗuku na ɗa mu ta mal. 27War hlai ni ɗaini zi hitri e cûsi, e bindi hiyak buri e niviŋ a na haɗa kalaŋ gaiɗi muni, gaini hanɗa paŋ ktai n'a miɗini ɓa, ku paya a maɗa, kalaŋku na gaiɗi a wiini a maɗa? Nɵa kai. 28Nɵa muni te hinitika arginiɗi ta, te hala aha war fuŋ n'abai, te miɗiɗi wiiɗi ɗai ɓa: 29Hilisi haw, ɗif ktai aŋsi na, a muɗaŋa wazagai na mu zaŋ ɗa paŋ, a Kristu ɗa ɗi? 30Ɗai e niyisi edi war fuŋ n'abai ɗa par e hilisi sini. 31Won hlai ni ɗaini zi hitri e miɗini: Rabbi, suma. 32Amma a miɗiɗi: Mu na suma simi na tiki ki sɗiŋ kai. 33Nɵa ɗai zi hitri e miɗi arbaɗi marɗi: Ɗif a kinisi simi ɗi? 34Yesu a miɗiɗi: Simi na wiya ɗa, azi na mu za pini dirini Ni n'a ɵiŋasi, a vi na mu va sdani amai ɗa lai. 35Tiki ki miɗi ɓa, tile aŋ kai puɗu kapai hiɗi a za, amma mu miɗiki Yimi arki amai, tili, vowai ɗa a naya ya, a hina ɗa a hiɗi. 36Tiyana par ɗif zi hiɗi a nava vrak, a haɗa ali burini, na buri suŋfa n'a vada kai ɗa lai, kapai ɗif zi sûûɗi lai, zi hiɗi lai e firiyi piɗi marɗi aŋ bonu. 37Buri nɵa, seŋ joro n'a muɗa ɓa: Na ktai a suuɗa, na ktai a haɗa lai ɗa a jre. 38Ta mu ɵiniki aŋ hiɗi wala na ki ɵini girni ktai siki kai. Zamai e zi sdani ɗa, tiki ki cûsi ki hiɗi seyemni ɗa.
39Samariyakai viya na war fuŋ n'abai hanɗa par, e yimi warni burini seŋ na muni te muɗaŋ ɓa: A muɗaŋa wazagai na mu zaŋ ɗa paŋ ɗa. 40Nɵa won hlai na Samariyakai e cû sini ɗa, e siiwiŋ buri a sumna gaiɗi, a sumna woni mefeŋ sulu. 41N'e yimi pini seŋni ɗa, viya e sûwi pra. 42E miɗiɗi wiiɗi muni: Tiyi mi yimi ɗa pini seŋku kir kai, buri ɓa tiyi mi ɵini na mini par ya, tiyi mi siɗi ɓa A ni n'aga a kûrɗiɗi ɗai na warɗi yai par fakat fakat.
Yesu a zuula ahini abaiɗi askarai na war pinzibaɗi pai, war Kana
43Asakal mefeŋ na sulu hanɗa par, a fakaɗi woni par a hala a Galeliya. 44-Buri ɓa Yesu gaini midini dama a muɗa ya ɓa: Ɗif na mini Alaw a nava kol midini aftini dama kai. - 45Won hlai n'a co a Galeliya ɗa, ɗai na Galeliya e yimiŋ siɗi pɗem buri e tilisi wazagai n'a zaŋsi a Yeruzalem miɗi fet ɗa. 46A waya katawai a Kana na war Galeliya war hlai n'a bunda yem aŋ vin woni ɗa.
Mat. 8.5-13; Luk. 7.1-10
Abaiɗi askarai ktai na war pinzibaɗi pai a na fu a Kapernahum, ahini a na veglek, 47Won hlai n'a ɵina ɓa war Yudiya par Yesu a halasi a Galeliya ya ɗa, a hala mini aŋ zilbaŋ buri a halasi aŋ zuula ahini n'a na gobi gaini mri. 48Yesu a miɗini: Na ɓa ki tili wala zi siŋki gaini zi hiila kai ɗa ki yimi duk kai. 49Abaiɗi askarai na war pinzibaɗi pai a miɗini: Epin-geza, halasi ahaya, ɵa kai ɗa, ahiya ɗa a mra na ɗa a mri. 50Yesu a miɗini: Hala, ahiku ɗa aŋ karni, ɗif a yima seŋ na Yesu a miɗiŋni ɗa, a hala lai. 51Won hlai n'a na halasi ɗa, ɗaini zi sɗa e hilisi mini aŋ miɗini ɓa: Ahini a na karni. 52A zilbiɗi a muɗa: Ahiyagwi a bunda mariya ɗa war ler na wata ɗa? E miɗini: Eɗibi, sa ktai, sini n'a sawa ɗa, a ɵaɗa azumai. 53Nɵa, api a sɗa ɓa a sarti na Yesu a miɗini ɓa, ahini aŋ karni ɗa. A bunda aŋ ɗif zi yimi ni gaini dalamni paŋ lai. 54Yesu a za wala zi siŋki n'ag'aŋ sulu hanɗa won hlai n'a wayasi war Yudiya par a Galeliya.
Currently Selected:
Yohana 4: MUSGUM
Highlight
Share
Copy
Want to have your highlights saved across all your devices? Sign up or sign in
La Bible en Musgum © Alliance Biblique du Cameroun 2012 © Nouveau Testament, Alliance Biblique du Cameroun 1964 © American Bible Society New York, 1964
