Luka 22

Wɔpam Yesu tiri so

(Mateo 26.1-5; Marko 14.1-2)

1Na Apiti afahyɛ a wɔfrɛ no Twam no bɛnee. 2#Luka 20.19 Na asɔfoɔ mpanimfoɔ ne Atwerɛfoɔ no hwehwɛɛ sɛdeɛ wɔbɛyɛ na wɔakum Yesu; ɛfiri sɛ na wɔsuro ɔman no.

Yuda gye pene sɛ ɔbɛyi Yesu ama

(Mateo 26.14-16; Marko 14.10-11)

3 # Yoh 13.2; 13.27 Na Satan kɔhyɛnee Yuda a wɔfrɛ no Iskariot a ɔyɛ dummienu no mu baako no mu. 4Na ɔne asɔfoɔ mpanimfoɔ ne asafohene no kɔkasa kyerɛɛ sɛdeɛ ɔbɛyɛ na wayi no ama wɔn. 5Na ɛyɛɛ wɔn anigyeɛ, na wɔne no hyehyɛɛ sɛ wɔbɛma no sika bi. 6Na ɔpenee; na ɔhwehwɛɛ sɛdeɛ ɔbɛnya kwan ayi no ama wɔn wɔ nkurɔfokuo no akyi.

Twam no siesie

(Mateo 26.17-29; Marko 14.12-25)

7 # Eks 12.18-20 Na afei Apiti da a ɛsɛ sɛ wɔkum Twam dwan no durui. 8Na Yesu somaa Petro ne Yohane sɛ: Monkɔ nkɔsiesie Twam no mma yɛn, na yɛmmɛdi. 9Na wɔsee no sɛ: Ɛhe na wopɛ sɛ yɛkɔsiesie? 10Na ɔsee wɔn sɛ: Hwɛ, moduru kuro no mu a, onipa bi a ɔso ahina a nsuo wɔ mu bɛhyia mo; monni n’akyi nkɔ efie a ɔbɛkɔ mu no mu. 11Na monse efiewura no sɛ: Kyerɛkyerɛfoɔ se wo sɛ: Ɛhe na ahɔhodan a me ne m’asuafoɔ bɛdi mu Twam no wɔ? 12Na ɔbɛkyerɛ mo abansoro asa kɛseɛ bi a wɔahyehyɛ mu; ɛhɔ na monkɔsiesie! 13#Luka 19.32 Na wɔkɔ kɔhunuu sɛdeɛ ɔka kyerɛɛ wɔn no, na wɔsiesiee Twam no.

Adidie a ɛdi akyire

14Na dɔn no duruiɛ no, ɔbɛtenaa ase, na asomafoɔ no ka ne ho. 15Na ɔka kyerɛɛ wɔn sɛ: Pɛ na mepɛɛ sɛ me ne mo di Twam yi ansa na mahunu amane. 16#Luka 13.29 Na mese mo sɛ, merenni bi bio, gye da a aba mu Nyankopɔn ahennie mu. 17Na ɔfaa kuruwa no daa ase, na ɔkaa sɛ: Monnye yei, na monkyɛ mu! 18Na mese mo sɛ, merennom bobe aba no bi bio, gye da a Nyankopɔn ahennie no bɛba.

Adidi kronkron no asehyɛ

19 # 1 Ko 11.23-25 Na ɔfaa paanoo daa ase bubui, na ɔde maa wɔn kaa sɛ: Yei ne me honam a mo nti wɔde rema; monyɛ yei mfa nyɛ me nkaeɛ. 20Saa ara nso na wɔwiee adidie no, ɔfaa kuruwa no kaa sɛ: Kuruwa yi ne apam foforɔ me mogya mu, ɛno na mo nti wɔrehwie aguo. 21#Yoh 13.21-22 Nso hwɛ, deɛ ɔreyi me ama no ne me te pono ho didi. 22Na Onipa Ba no rekɔ sɛdeɛ wɔahyɛ no deɛ, nanso onipa a ɔbɛyi no ama no nnue! 23Na wɔfirii aseɛ bisabisaa wɔ wɔn mu sɛ, hwan ara na ɔrebɛyɛ saa adeɛ yi.

Yesu kasa tia ahomasoɔ

(Mateo 20.25-27; Marko 10.42-44)

24 # Luka 9.46 Na akasakasa bi nso baa wɔn mu sɛ, wɔn mu hwan na wɔbɛbu no kɛseɛ. 25Na ɔsee wɔn sɛ: Wiase amanaman ahemfo di wɔn so ahensɛm, na wɔn a wɔdi wɔn so tumi no, wɔfrɛ wɔn adɛɛfoɔ. 26Na mo deɛ, monnyɛ saa, na mmom deɛ ɔyɛ mo mu kɛseɛ no, ɔnyɛ sɛ akumaa; na deɛ ɔyɛ otitire no nyɛ sɛ deɛ ɔsom. 27#Yoh 13.4-14 Na hwan na ɔso, deɛ ɔte aduane pono ho anaasɛ deɛ ɔsom? Ɛnyɛ deɛ ɔte aduane pono ho? Na me deɛ, mewɔ mo mu sɛ deɛ ɔsom. 28Na mone wɔn a wɔda so ka me ho wɔ me sɔhwɛ mu. 29Na me nso, sɛdeɛ m’agya ayi ahennie ama me no, saa ara na mayi mama mo, 30#Mat 19.28 na moadidi na moanom me pono so wɔ m’ahennie mu, na moatena nhennwa so abu Israel mmusuakuo dummienu no atɛn.

Petro pa ho nkɔmhyɛ

(Mateo 26.31-35; Marko 14.27-31; Yohane 13.36-38)

31 # 2 Ko 2.11 Simon, Simon, hwɛ, anka na Satan pɛ sɛ ɔnya mo na ɔhuhu mo so sɛ aburoo. 32#Yoh 17.11; 17.15; 17.20; Dwom 51.13 Nanso masrɛ mama wo, na woampa wo gyidie. Na wo deɛ, sɛ daakye, sɛ wosan gyina a, hyɛ wo nuanom den! 33Na ɔsee no sɛ: Awurade, masiesie me ho sɛ me ne wo bɛkɔ afiase ne owuo mu. 34Na ɔse: Petro, meka mekyerɛ wo, ɛnnɛ, ansa na akokɔ bɛbɔn no, na woasane mprɛnsa sɛ wonnim me.

Kɔkɔbɔ bi

35 # Luka 9.3 Na ɔsee wɔn sɛ: Mesomaa mo a na monkura sika kotokuo ne akwantuo bɔtɔ ne mpaboa no, biribi ho hiaa mo anaa? Na wɔse: Anhia yɛn hwee. 36Ɛnna ɔsee wɔn sɛ: Afei deɛ, deɛ ɔwɔ sika kotokuo no, ma no mfa, ne akwantuo bɔtɔ saa ara; na deɛ ɔnni bie no, ma no ntɔn ne ntoma mfa ntɔ nkrantɛ. 37#Yes 53.12 Na mese mo sɛ, yei a wɔatwerɛ nso, ɛtwa sɛ ɛba mu wɔ me ho sɛ: Wɔakan no afra mmaratofoɔ mu. Na deɛ ɛfa me ho no wɔ awieeɛ. 38Na wɔse: Awurade, hwɛ, nkrantɛ mmienu ni. Na ɔsee wɔn sɛ: Ɛdɔɔso.

Getsemane awerɛhoɔ

(Mateo 26.30; 26.36-46; Marko 14.26; 14.32-42)

39 # Yoh 18.1 Na ɔfirii adi, na sɛdeɛ ɔyɛ daa no, ɔkɔɔ Ngo Bepɔ no so; na asuafoɔ no nso dii n’akyi. 40Na ɔduruu hɔ no, ɔsee wɔn sɛ: Mommɔ mpaeɛ na moankɔ sɔhwɛ mu! 41Na ɔtwee ne ho firii wɔn nkyɛn bɛyɛ sɛ deɛ wɔto ɔboɔ a, ɛbɛtɔ no, ɔkotoo ne nan anim bɔɔ mpaeɛ 42sɛ: Agya, sɛ wopɛ a, ma kuruwa yi nsiane me ho nkɔ, nanso ɛnyɛ deɛ mepɛ, na deɛ wopɛ na ɛnyɛ hɔ. 43#1 Ah 19.5 Na ɔbɔfoɔ firii soro bɛyii ne ho kyerɛɛ no hyɛɛ no den. 44Na ɔwɔ owuo yea mu no, ɔmaa ne mpaebɔ mu yɛɛ den. Na ne ho fifire yɛɛ sɛ mogya ntowantowa a ɛsosɔ fam. 45Na ɔsɔre firii mpaebɔ mu baa asuafoɔ no nkyɛn no, ɔbɛhunuu wɔn sɛ awerɛhoɔ nti wɔadeda, 46na ɔsee wɔn sɛ: Adɛn na moreda? Monsɔre mmɔ mpaeɛ na moankɔ sɔhwɛ mu.

Yesu kyerɛ

(Mateo 26.47-56; Marko 14.43-49; Yohane 18.2-11)

47Na ɔgu so rekasa no, hwɛ, nnipakuo bi bae a dummienu no mu baako a wɔfrɛ no Yuda di wɔn anim. Na ɔtwe bɛnee Yesu, bɛfee n’ano. 48Na Yesu bisaa no sɛ: Yuda, wode mfeano na ɛreyi onipa ba no ama? 49Na wɔn a wɔwɔ ne ho no hunuu deɛ ɛrebɛba no, wɔbisaa no sɛ: Awurade, yɛmmobɔ wɔn nkrantɛ anaa? 50Na wɔn mu baako bɔɔ ɔsɔfo panin akoa, na ɔtwaa n’aso nifa. 51Na Yesu buaa sɛ: Momma no nso ha ara! Na ɔsɔɔ n’aso no mu de famm hɔ. 52Na afei Yesu ka kyerɛɛ asɔfoɔ mpanimfoɔ ne asɔrefie asafohene ne mpanimfoɔ a wɔbaa ne soɔ no sɛ: Mobaa sɛdeɛ moreba odwotwafoɔ soɔ na mokura nkrantɛ ne mmaa yi? 53#Yoh 7.30; 8.20 Me ne mo wɔ asɔrefie hɔ daa no, moankye me; na yei ne mo berɛ ne esum tumi.

Petro pa ne wura

(Mateo 26.57-58; 26.69-75; Marko 14.53-54; 14.66-72; Yohane 18.12-18; 18.25-27)

54Na wɔkyere no kɔe, na wɔde no kɔɔ ɔsɔfo panin fie. Na Petro deɛ, ɔdii wɔn akyi wɔ akyirikyiri. 55Na wɔsɔɔ ogya adihɔ hɔ na wɔtenaa ho no, Petro bɛtenaa wɔn mu. 56Na abaawa bi hunuu no sɛ ɔte gya no ho, na ɔhwɛɛ no dinn kaa sɛ: Oyi nso ne no na ɛnam. 57Na ɔsanee sɛ: Ɔbaa, menni no. 58Na ankyɛ na ɔfoforɔ hunuu no, na ɔse: Wo nso wofiri wɔn mu. Na Petro se: Barima, memfiri wɔn mu. 59Na ɛno akyi bɛyɛ dɔnhwere baako no, ɔfoforɔ bi nso de bɛtoo so sɛ: Oyi nso ne no na ɛnam ampa, ɛfiri sɛ ɔyɛ Galileani. 60Na Petro se: Barima, mennim deɛ woreka yi. Na amonom hɔ ara a ɔgu so rekasa no, akokɔ bɔnee. 61#Luka 22.34 Na Awurade danee ne ho hwɛɛ Petro anim; na Petro kaee Awurade asɛm a ɔka kyerɛɛ no sɛ: Ɛnnɛ, akokɔ remmɔn na woapa me mprɛnsa no. 62Na Petro firii adi kɔsuu yayaaya.

Yesu ho agorɔdie

(Mateo 26.67-68; Marko 14.65)

63Na mmarima a wɔkura Yesu no goroo ne ho hwee no. 64Na wɔkataa n’ani bobɔɔ n’ani so, na wɔbisaa no sɛ: Hyɛ nkɔm! Hwan na ɔbɔɔ woɔ? 65Na abususɛm pii keka ho a wɔka guu ne soɔ.

Yesu gyina badwa mu

(Mateo 26.59-66; Marko 14.55-64)

66 # Yoh 18.24 Na adeɛ kyeeɛ no, ɔman mpanimfoɔ ne asɔfoɔ mpanimfoɔ ne Atwerɛfoɔ no bɛhyiaeɛ, na wɔde no kɔɔ wɔn asɛnniiɛ 67kaa sɛ: Wone Kristo no a, ka kyerɛ yɛn! Na ɔka kyerɛɛ wɔn sɛ: Sɛ mese mo a, morennye nni; 68na sɛ nso mebisa mo a, moremmua me. 69Na ɛfiri nnɛ na Onipa Ba no bɛtena Nyankopɔn tumi nifa soɔ. 70Na wɔn nyinaa kaa sɛ: Ɛnneɛ na wone Nyankopɔn ba no anaa? Na ɔka kyerɛɛ wɔn sɛ: Moaka, na mene no. 71Na wɔse: Adanseɛ bɛn na ɛhia yɛn bio? Na yɛn ara yɛate afiri n’anomu.

Currently Selected:

Luka 22: ASW

Highlight

Copy