Luka 4

Yesu sɔhwɛ

(Mateo 4.1-11; Marko 1.12-13)

1Na Yesu a Honhom Kronkron ahyɛ no ma no sane firii Yordan ho, na Honhom no de no kɔɔ ɛserɛ so. 2Na ɔbonsam sɔɔ no hwɛe adaduanan. Nso nna no mu no, wanni hwee; na ɔwieeɛ no, ɛkɔm dee no. 3Na ɔbonsam ka kyerɛɛ no sɛ: Sɛ woyɛ Nyankopɔn ba a, hyɛ ɔboɔ yi na ɛnnane paanoo. 4#Deut 8.3 Na Yesu buaa no sɛ: Wɔatwerɛ sɛ: Ɛnyɛ paanoo nko so na onipa nam bɛtena aseɛ. 5Na ɔde no kɔɔ beaeɛ a ɛkorɔn, kɔkyerɛɛ no wiase ahennie nyinaa prɛko. 6Na ɔbonsam ka kyerɛɛ no sɛ: Wo na mede tumi yi nyinaa ne emu animuonyam bɛma woɔ; na wɔde ahyɛ me nsa, na obiara a mepɛ no, mede mema no; 7enti sɛ wokoto sɔre me a, ne nyinaa bɛyɛ wo dea. 8#Deut 6.13-14 Na Yesu buaa no sɛ: Wɔatwerɛ sɛ:

Sɔre Awurade wo Nyankopɔn,

na ɔno nko na som no!

9Na ɔde no kɔɔ Yerusalem, na ɔde no kɔgyinaa asɔrefie atifi, na ɔka kyerɛɛ no sɛ: Sɛ woyɛ Nyankopɔn ba a, to wo ho firi ha twene fam! 10#Dwom 91.11-12 Na wɔatwerɛ sɛ:

Wo nti, ɔbɛhyɛ n’abɔfoɔ

sɛ wɔmmɛhwɛ wo,

11na

wɔmmɛsoa wo wɔn nsam,

na woamfa wo nan ampem ɔboɔ.

12 # Deut 6.16 Na Yesu bua see no sɛ: Wɔaka sɛ: Nsɔ Awurade wo Nyankopɔn nhwɛ! 13#Heb 4.15 Na ɔbonsam wiee sɔhwɛ no nyinaa no, ɔgyaa no hɔ kɔe kakra.

Yesu asɛnka mfitiaseɛ

(Mateo 4.12-17; Marko 1.14-15)

14Na Yesu nam Honhom no ahoɔden mu sane baa Galilea, na ne ho asɛm trɛɛ asase a atwa ahyia no nyinaa so. 15Na ɔkyerɛkyerɛɛ wɔn hyia adan mu, na wɔn nyinaa hyɛɛ no animuonyam.

Yesu Nasaret asɛnka

(Mateo 13.53-58; Marko 6.1-6)

16Na ɔbaa Nasaret a wɔtetee no wɔ hɔ no, na homeda, sɛdeɛ ɔyɛ daa no, ɔkɔɔ hyiadan mu, na ɔsɔre gyinae sɛ ɔrebɛkenkan. 17#Yes 61.1-2 Na wɔde Odiyifoɔ Yesaia nwoma hyɛɛ ne nsa; na ɔtrɛɛ nwoma no mu hunuu faako a wɔatwerɛ sɛ:

18 Awurade honhom wɔ me so,

na enti wasra me sɛ

memmɛka asɛmpa menkyerɛ ahiafoɔ;

wasoma me sɛ memmɛka ɔgyeɛ menkyerɛ nnommum

ne adehunu menkyerɛ anifirafoɔ,

na memmrɛ wɔn a wɔapɛkyɛ wɔn no ahofadie,

19 # Lew 25.10 na memmɛda afe a Awurade anisɔ bɛba ne nkurɔfoɔ so no adi.

20Na ɔbobɔɔ nwoma no de maa ɔsomfoɔ no na ɔtenaa ase; na wɔn a wɔwɔ hyiadan mu hɔ nyinaa de wɔn ani hwɛɛ no dinn. 21Na ɔfirii aseɛ ka kyerɛɛ wɔn sɛ: Ɛnnɛ na twerɛsɛm yi aba mu mo aso mu. 22#Yoh 6.42 Na wɔn nyinaa dii no adanseɛ, na adom nsɛm a ɛfiri n’anomu no yɛɛ wɔn nwanwa, na wɔbisaa sɛ: Ɛnyɛ Yosef ba no ni anaa? 23#Mat 4.13 Na ɔka kyerɛɛ wɔn sɛ: Ampa ara, mode bɛ yi bɛbu me sɛ: Ɔsafo, sa wo ho yadeɛ! Nnoɔma a yɛate sɛ woyɛɛ no Kapernaum no, yɛ no w’agya kurom ha yi bi! 24#Yoh 4.44 Ɔkaa sɛ: Nokorɛ mese mo sɛ, wɔmpɛ odiyifoɔ biara agye no n’agya kurom. 25#1 Ah 17.1; 17.9; 18.1; Yak 5.17 Na meka no nokorɛ mu, Elia berɛ so a ɔsoro mu too mfeɛ mmiɛnsa ne abosome nsia, na ɛkɔm kɛseɛ baa asase no nyinaa soɔ no, akunafoɔ pii wɔ Israel deɛ, 26nanso wɔansoma Elia ankɔ wɔn mu biara nkyɛn sɛ Sidon kuro Sarepta mu ɔbaa kunafoɔ bi nkyɛn. 27#2 Ah 5.14 Na Odiyifoɔ Elisa berɛ so no, na akwatafoɔ pii wɔ Israel deɛ, nanso wɔamma wɔn mu biara ho amfi gye Siriani Naaman.

Ne nkurɔfoɔ pɛ sɛ wɔkum no

28Na wɔn a wɔwɔ hyiadan mu hɔ nyinaa tee saa no, abufuo hyɛɛ wɔn ma. 29Na wɔsɔre sunsumm no firii kuro no mu hɔ, de no kɔɔ bepɔ a wɔn kuro no da soɔ no ano sɛ wɔrekɔsum no ama ne nkɔnkɔ akɔwɔ hɔ. 30Nanso ɔfaa wɔn mfimfini kɔe.

Yesu sa obi a ɔwɔ honhommɔne yadeɛ

(Marko 1.21-28)

31 # Mat 4.13; Yoh 2.12 Na ɔbaa Galilea kuro bi a ɛde Kapernaum mu; na daa homeda ɔkyerɛkyerɛ wɔn. 32#Mat 7.28-29; Yoh 7.46 Na ne nkyerɛkyerɛ yɛɛ wɔn ahodwiri. Ɛfiri sɛ na n’asɛm no kura tumi. 33Na onipa bi wɔ hyiadan mu hɔ a ɔwɔ honhommɔne a ɛyɛ honhom fi, na ɔde nne kɛseɛ teaa mu 34sɛ: Mmɛha yɛn! Ɛdeɛn na yɛne wo Nasareni Yesu wɔ yɛ? Wobaa sɛ worebɛsɛe yɛn anaa? Menim nipa ko a woyɛ, wone Onyankopɔn ne kronkronni no. 35Na Yesu teateaa no sɛ: Mua w’ano, na firi ne mu kɔ! Na honhommɔne no bɔɔ no hwee mfimfini hɔ firii ne mu kɔe, na wanyɛ no hwee. 36Na wɔn nyinaa ho dwirii wɔn, na wɔkeka kyerɛɛ wɔn ho wɔn ho sɛ: Asɛm bɛn ni, sɛ ɔde ahoɔden ne tumi hyɛ ahonhom fi ma wɔfiri adi yi? 37Na ne ho asɛm trɛ kɔɔ asase a atwa ahyia no nkuro nyinaa mu.

Petro n’ase baa ayaresa

(Mateo 8.14-17; Marko 1.29-39)

38Na ɔsɔre firii hyiadan mu hɔ baa Simon fie. Na Simon ase baa afoɛ kɛse, na wɔsrɛɛ no sɛ ɔmmɛhwɛ no. 39Na ɔbɛgyinaa n’atifi teateaa ɔfoɛ no, na ɛgyaa no. Na amonom hɔ ara ɔsɔre bɛsomm wɔn.

Anwanwadeɛ ahodoɔ bebree

40Na owia retɔ no, wɔn a wɔwɔ ayarefoɔ a nyarewa ahodoɔ ha wɔn nyinaa de wɔn brɛɛ no; na ɔde ne nsa guu wɔn nyinaa so mmaako mmaako saa wɔn yadeɛ. 41#Mat 8.29; Mat 3.11-12 Na ahonhommɔne nso firii nnipa pii mu kɔe, na wɔteaa mu sɛ: Wone Nyankopɔn ba no! Na ɔteateaa wɔn, wamma wɔankasa, ɛfiri sɛ wɔnim sɛ ɔne Kristo no.

Yesu Yudea asɛnka

42Na adeɛ kyeeɛ no, ɔfirii hɔ kɔɔ ɛserɛ so baabi. Na nkurɔfoɔ akuakuo no hwehwɛɛ no, na wɔbɛduruu ne nkyɛn, na wɔsiankaa no sɛ ɔmmfiri wɔn nkyɛn nnkɔ. 43#Luka 8.1 Na ɔka kyerɛɛ wɔn sɛ: Ɛsɛ sɛ meka Nyankopɔn ahennie ho asɛmpa no mekyerɛ nkuro foforɔ nso; ɛfiri sɛ yei na wɔbɔɔ din somaa me. 44#Mat 4.23 Na ɔkaa asɛm Yudea hyia adan mu.#4.44 Yudea hyia adan mu: Tete atwerɛ foforɔ no bi ka sɛ: Galilea.

Currently Selected:

Luka 4: ASW

Highlight

Copy