ACT 10
10
1Sisaria khua ah mi pakhat a min Kornelias a um, Itali ralkapbu tiah kawhmi ralbawi pakhat a si. 2Amah le chungkhar dihlak he Pathian a ṭih i a upatmi an si, sifak sinah thil tampi a petu le Pathian sinah thla a cam zungzalmi a si. 3Nikhat cu zanlei suimilam pathum hrawngah fiang tein langhnâk a hmuh, Pathian vanmi pakhat a sinah a lut i, “Kornelias” tiah a ti. 4Kornelias nih a hmuh tikah a ṭih i, “Bawipa zeidah a si?” tiah a ti. Anih nih a sinah, “Na thlacamnâk le thilpêk kha hngalh peng dingin Pathian sinah a phân. 5Atu ah hin Joppa khua ah mi thlah law, mi pakhat Simon Peter timi va auhter hna. 6Amah cu saphaw sertu Simon, rili kam i a ummi inah a tlung. Amah nih na tuah hngami cu an chimh lai,” tiah a ti. 7Amah chawntu vanmi a kal hnuah Kornelias nih a sinum pahnih le amah vengtu lakah â pe ngaimi ralkap pakhat a auh. 8Thil umtuning a chimh hna hnuah Joppa khua ah a thlah hna. 9A thaizing ah lam i an kal lioah, khua an luh lai chun suimilam hleihnih hrawngah Peter cu thlacam dingin inn cungah a kai. 10A rawl a ṭam ngai ngai i ei a duh. Asinain eiawk an timh lioah mangcang hlanin a um, 11van â ongmi a hmuh i bawm nganpi puan killi in an run ṭhumh i vulei ah a phân. 12A chungah ke pali a ngeimi saṭil hna le, ramsa hna le a paw in a lawnmi le vanva kha an um. 13Cun aw in, “Peter, tho, that law, ei,” tiah a ti. 14Peter nih, “Bawipa, a thûrmi le a thiang lomi zeihmanh ka ei bal lo,” tiah a ti. 15Aw nih a voihnihnâk ah, “Pathian nih a thianter cangmi cu a thianglo na ti awk a si lo,” tiah a ti. 16Cubantuk lawng tein voithum a rak um i bawm cu van ah a kai ṭhân. 17Peter nih a hmuhmi langhnâk cu zeidah a si hnga tiah a ruah lioah, zohhmanh, Kornelias nih a thlahmi hna nih Simon inn cu an rak hal hna i innkâ hramah an rak dir cang. 18Simon Peter an timi cuka i a tlun le tlun lo an hal hna. 19Peter nih langhnâk kong a ruah lioah Thlarau nih, “Ngaihmanh, mi pathum nih an in kawl. 20Cucaah tho, vung ṭum law lung awṭawm lo tein anmah cu zul hna, annih cu ka thlahmi an si,” tiah a ti. 21Kornelias nih a thlahmi hna sinah Peter cu a vung ṭum i, “Nan kawlmi cu keimah hi ka si, nan ratchan zeidah a si?” tiah a ti. 22Annih nih, “Kornelias, ralbawi pa mi dik, Pathian a ṭih i Judah mi vialte nih an thangṭhat ngaimi pa sinah na kal i na bia a ngaih khawh nâkhnga van mithiang nih a chimh,” tiah an ti. 23Annih cu a luhter i a riahter hna. A thaizingah Peter cu an sinah a kal i Joppa khua mi cheukhat nih amah kha an zulh. 24Kiptuh ah Sisaria khua an phân. Kornelias nih a sahlawh le a rualchan kha sawm in an rak hngah. 25Peter cu a luh lai ah Kornelias nih a rak don i a kehram ah bawk in a biak. 26Peter nih a thawhter i, “Dir, kei zong minung sawhsawh ka si ve ko,” tiah a ti. 27Biaruah pah in an lut i mi tampi an rak i pumh kha a hmuh hna. 28Cun an sinah, “Judah mi ca i miphun dang pawlkomh le an sin i kal cu phungning a si loning nan hngalh. Asinain mizei pauh hi thianglo le thûr ka ti hna awk a si lo zia Pathian nih fiang tein a ka hmuhter. 29Cucaah nanka auh le cângkâ el loin ka ra. Cuticun nanka auhchan hi zeidah a si? kan hal hna,” tiah a ti. 30Kornelias nih, “Nili a si cang, atu cân tiang hrawng hi ka innah rawl ka ul i zanlei suimilam pathum ah ka inn i thla ka cam lioah, ngaihmanh, mi pakhat a tleu ngaimi puan aih in ka hmai ah a rak dir, 31‘Kornelias, na thlacamnâk Pathian nih a theih i mi sifak na bomhmi zong Pathian hmai ah theihpiak a si. 32Cucaah Joppa khua ah mi thlah law, Simon Peter an timi kha na sinah au. Amah cu rili kam i saphaw sertu Simon innah a tlung. Amah a phâk tikah bia an chimh hna lai, tiah a ti. 33Cuticun na sinah mi ka rak thlah cawlhnâk hi a si, na ratmi cu a ṭha taktak. Bawipa nih an pêkmi bia ngai dingin, atu Pathian hmai ah kan dihlak in hika i kan um hi a si,” tiah a ti. 34Peter nih bia chim a thawk i, “Pathian nih thleidan a ngei lo tihi fiang tein ka hngalh. 35Asinain miphun vialte lakah mi zei pauh nih Amah an ṭih i felte i an tuah ahcun a cohlan ko hna. 36Pathian nih Israel fale hna sinah bia a rak phâkter i daihnâk bia Jesuh Krih hmangin phuan a si-Amah cu mi vialte Bawi a si- 37Johan nih Baptisma kong a aupi dih khan, Galili ram in â thawk i Judia ram vialte ah a thang dih, hi bia hi nannih zong nih nan hngalh; 38Nazaret Jesuh, kha bantukin Pathian nih Thiang Thlarau le thiltikhawhnâk in sathau a thuh ning le thilṭha tuah in khual a tlawng i khuachia serhsatmi vialte a damter hnanâk kong kha, zeitintiah a sinah Pathian a um. 39Judah ram le Jerusalem i a tuahmi thil hna le, thing ah an thlai i an thahnâk kong hna kha hngalhpitu kan si. 40Pathian nih Amah cu nithum ni ah a thawhter i hmuh khawh in â lang, 41mi vialte sinah cun a si lo, hngalhpitu dingah Pathian nih a thim khunmi hna sin lawngah a si, thihnâk in a thawhṭan hnuah a sin i a ei i a dingmi kan sin zongah. 42Amah cu mithi le minung hna cungah Biaceihtu dingah Pathian ruahmi a sinâk mi sinah phuang dingah le hngalhpi dingah Amah nih nawl a kan pêk. 43Amah zumtu pauh nih a min ruangah sual ngaihthiamnâk an co tawn timi hi profet vialte nih an rak hngalhter tawnmi kha a si,” tiah a ti. 44Peter nih cu bia a chim lioah, a ngaitu vialte cungah Thiang thlarau a rak phân. 45Cuarpar tan zumtu Peter a zultu hna nih Thiang thlarau thilpêk cu Gentel mi hna sin zongah toih a si ruangah mak an ti ngaingai. 46Zeitintiah holh dangdang in bia an chim i Pathian thangṭhat in an theih. Cuticun Peter nih, 47“Hi mi hna, kanmah bantukin Thiang thlarau a comi hna hi baptisma an in lonâk dingah ti hman an kham kho lai maw?” tiah a ti. 48Cuticun Bawipa min i baptisma ing dingin nawl a pêk hna i ni tlawmpal câm dingin amah cu an nawl.
Currently Selected:
ACT 10: HAKABSI
Highlight
Share
Copy
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
