ACT 3
3
1Zanlei suimilam pathum thlacam cân ah Peter le Johan cu ṭempal ah an kal. 2Mi pakhat a nu paw chungin kebei cia in a chuakmi kha ṭempal i â dawhmi kutkâ an timi hramah, cuka i a lutmi hna sin i kutdawh dingin nichiarte an ṭhutter tawn. 3Anih nih ṭempal ah luh â timmi Peter le Johan kha hmuin thil a hal hna. 4Johan he cat loin an zoh i Peter nih, “Kan zoh tuah,” tiah a ti. 5An sinin thil zeimaw hmuh ruahchan in a hun merhnawh hna, 6Peter nih, “Phaisa le sui ka ngei lo; asinain ka ngeihchun kan pêk lai: Nazaret Jesuh Krih minin, dir law, ke in kal,” tiah a ti. 7A orhlei kut kha a tlaih i a thawhter; chikkhat teah a ke le a kemit ruh hna nih ṭhawnnâk an ngei cawlh. 8A hun i hlawk, a dir i kein a kal, cun kal pah le i hlawk len bu in Pathian a thangṭhat i an sinah ṭempal ah a lut cawlh ve. 9Pathian thangṭhat i â chawhlen kha mi vialte nih an hmuh. 10Ṭempal luhnâk kutkâ dawh pawngah kutdawh in a ṭhu tawnmi a si kha an hngalh i a cung i a tlungmi thil ah khuaruahharnâk le mak tinâk in an khat. 11Kebei a dammi pa nih Peter le Johan kha a tlaihpeng hna lioah Solomon deuthlâm timi hmunah mi vialte an rak tli i mak an ti ngaingai. 12Peter nih mizapi kha a hmuh tikah, “Nannih Israel mi hna zeiruangahdah hi kongah nan ar ko? Asiloah kanmah thil tikhawhnâk le biaknâk i kan i zuam ruangah kan damtermi bangin ar koin nan kan zoh? 13Abraham Pathian, Isak le Jacob Pathian, kan pupa hna Pathian nih a Sal Jesuh a thangṭhatmi a si; Amah cu nan tlaihter i Pailat nih thlah a timh len zongah nan rak el a si kha. 14Mithiang le Midik kha nan duh lo i lainawng tu kha nansin i pêk awkah nan hal, 15Nunnâk Bawi kha nan thah, asinain Pathian nih Amah cu a thawhter, cucu hngalhpitu kan si. 16Cun a Min, Amah min i zumhnâk thawngin hi nan hmuh i nan theihmi hi a damtermi a si. Asi, Amah in a chuakmi zumhnâk nih nan dihlak hmuh ah a damtermi a si. 17Asinain ule nau hna, atu ah nan hruaitu hna nih an rak tuah bang khan nannih zong nan hngalh lo ruang i nan tuahmi a si. 18Pathian nih a profet vialte kâ in a rak chimchung bang khan, Krih nih harnâk a temtuar lai timi cu, hitihin a tlinter cang. 19Cucaah nan sualnâk hlohpiak a si khawh nâkhnga i ngaichih ulaw, Pathian sinah kir u, cuticun Bawipa sinin tharchuahnâk cân a phân kho lai, 20cun nan sin i an rak chim cangmi Krih Jesuh kha a rak thlah khawh lai: 21Zeizong vialte serṭhatnâk cân a phâk hlan pauh cu van nih Amah cu a cohlan hrimhrim rih awk a si, cucu Pathian nih vawlei ser hramthawkin a thiangmi a profet vialte hna hmangin a rak chim cangmi a si. 22Zeitintiah Moses hrimhrim nih kan pa le sinah, “BAWIPA nan Pathian nih keimah bantuk hi nan unau hna lakah profet pakhat an pêk te hna lai, nan sin i a chimmi vialte kha nan ngaih lai. 23Ahohmanh nih cu profet bia cu an ngaih duh lo ahcun an unau hna sinin nan hloh hna lai,” a rak ti kha. 24Asi, Samuel a rak um ri in, profet vialte le a zultu hna nih atu lio i thil a ummi hi an rak chimchungmi a si. 25Nanmah hi Pathian nih kan pupa hna sin i a sermi biakamnâk le profet hna fale cu nan si. Pathian nih Abraham sinah, ‘Na tefa ah vawlei i a ummi chungkhar vialte thluachuah an si lai,’ tiah bia a rak kam. 26Pathian nih a Sal Jesuh cu a chuahter i thluahchuah petu le nan sualnâk mertâk cio dingin, nanmah sinah a hmasabik ah a run thlah,” tiah a ti.
Currently Selected:
ACT 3: HAKABSI
Highlight
Share
Copy
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
