JOHN 10
10
1“Biataktein, biataktein kan chimh hna, tuu kawm chungah innkâ in a lut lo i lamdang i a lutmi pauh mifir le damiah an si. 2Asinain innkâ i a lutmi pauh cu tuukhal an si. 3Innkâ congtu nih a rak onpiak i tuu nih a aw an theih, a tuu kha an min in a auh hna i a kalpi tawn hna. 4A tuu a chuahter hna i an hmaiah kal in a tuu nih a aw an theih caah an zulh tawn. 5Asinain midang cu an zul lai lo, a aw an theih lo caah an zâmtâk deuh lai,” tiah a ti. 6Jesuh nih hi tahchunhnâk hi a hman, asinain zeibiadah a chim ti an hngal kho lo. 7Jesuh nih an sinah a chim ṭhân i, “Biataktein, biataktein kan chimh hna. Keimah hi tuuluhnâk innkâ ka si. 8Ka hmai i a rami vialte kha mifir le damiah an si, cucaah tuu nih an aw an thei lo. 9Kei cu innkâ ka si. keimah i a lutmi pauh cu khamh in a um lai. A lut in a chuak lai i eiawk a hmuh lai. 10Mifir cu fir awk le, thah awk le, hrawh awkah dah ti lo cun a ra bal lo. Kei cu nun anngeih i duhdim tein an ngeih nâkhnga ka ra. 11Tuukhal ṭha ka si. Tuukhal ṭha nih a tuu caah a nunnâk a pêk tawn. 12Sihmanhsehlaw man phalhmi tuukhal, tuukhal taktak a si lomi, tuu ngeitu zong a si lomi nih, cinghnia a rat a hmuh tikah tuu a zâmtâk tawn. Cuticun cinghnia nih tuu a seh i an i ṭhek tawn. 13Man phalhmi a si caah, tuu kha a conghrâm hna lo i a zâmtâk tawn hna. 14Tuukhal ṭha ka si; ka tuu ka hngalh hna i ka tuu zong nih anka hngalh. 15Pa nih aka hngalh bangin, kei zong nih Pa ka hngalh i tuu caah ka nunnâk ka pêk. 16Cun hi tuukawm chung ta a si lomi, tuu dang zong ka ngei, annih zong ka ratpi hna lai, ka aw zong an theih lai i tuukhal pakhat le bukhat in an um lai. 17Lâk ṭhân dingin ka nunnâk ka pêk caah hin Pa nih a ka dawt. 18Ahohmanhnih anka lâkpiak lai lo, keimah nawl in ka pêkmi a si. Pe kho ka si i la ṭhân kho zong ka si. Hi nawlpêk hi ka Pa sinin ka hmuhmi a si. 19Cu bia a chimmi ruangah Judah mi hna lakah i ṭhennâk a um ṭhân. 20Mitampi nih, “Khuachia nih a tuah i a mawlhmi a si, zeiruangahdah a bia nan ngaih?” tiah an ti. 21Midang nih, “Hi bia hi khuachia tuahmi bia a si lo, khuachia nih mitcaw khua a hmuhter kho maw?” tiah an ti. 22Jerusalem ah pêkchanhnâk Thô a um i cucu khuasik cân a si. 23Jesuh cu ṭempal chung i Solomon deu an timi ah â chawk. 24Judah mi hna nih an rak kulh i, “Zeicandah lung awṭawm in nakan umter lai? Krih na si ahcun fing tein kan chim lawlaw,” tiah an ti. 25Jesuh nih, “Kan chimh cang hna nain nan zum lo. Ka Pa min i ka tuahmi nih ka konglam a hngalhter cang. 26Asinain nan zum lo, nan sin i ka chim cang bantukin, ka tuu nan si lo caah a si. 27Ka tuu nih ka aw an theih, annih cu ka hngalh hna i an ka zulh. 28An sinah zungzal nunnâk ka pêk i an tlau hrimhrim lai lo. Ka kut chungin ahohmanh nih an ka chut kho lai lo. 29Anmah aka petu ka Pa cu mi vialte nâkin a ngan deuh, ahohmanh nih ka Pa kut in an chut kho lai lo. 30Kei le ka Pa cu pumkhat kan si. 31Cuticun Judah mi hna nih a chehnâk dingah lung an char ṭhân. 32Jesuh nih, “Ka Pa sinin rianṭha tampi kan hmuhsak cang hna. Zeiruang bik ah dah lungin cheh nan ka timh?” tiah a ti hna. 33Judah mi hna nih, “Rian ṭha ruangah lung in cheh kan in tim lo; (Pathian)cawhdehnâk bia ruangah le, minung na si ko nain Pathian ah nâ canter ruangah lung cheh kan in timhnâk cu a si,” tiah an ti. 34Jesuh nih, “Nan nawlbia cauk ah, ‘Pathian nan si ka ti,” tiah ṭial a si lo maw? 35Pathian bia a phâknâk hmanh pathian hna ti a si ahcun (cathiang hrawhkhawh a si fawn ṭung lo) 36Pa nih a thleidanmi le vawlei i a thlahmi nih, ‘Pathian Fapa ka si,’ ka ti rungah, (Pathian) cawhdehtu nanka ti kho lai maw? 37Ka Pa rianṭuantu ka si lo ahcun, ka zum hlah u; 38Sihmanhsehlaw ṭuntu ka si ahcun, keimah nanka zumh lo hmanh ah, ṭuanmi tal hi zum u. Pa keimah ah a um, ti le, kei zong Pa ah ka um ti nan hngalh khawh nâkhnga” tiah a leh hna. 39Cucaah tlaih an timh ṭhân, asinain an kut in lodiam â zuk. 40Jordan tiva ral, tuanah Johan nih Baptisma a rak pêknâk lei ah lo diam a kal i cuka ah sau nawn a um. 41Cun mitampi a sinah an ra i, “Johan nih hmelchunhnâk zeihmanh a tuah lo nain, Amah kong Johan chimmi vialte kha a dik dih ko,” tiah an ti. 42Cuka ah mi tampi nih Amah kha an zumh.
Currently Selected:
JOHN 10: HAKABSI
Highlight
Share
Copy
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
