JOHN 8

1Jesuh cu Oliv tlângah a kal. 2Zingka tuante ah ṭempal ah a ra ṭhân i mizapi kha a sinah an ra. A ṭhu i a cawnpiak hna. 3Cuticun nawlbiacawnpiaktu le Farasih hna nih ṭangdang a kaimi minu pakhat an tlaih i an ratpi. A laiah an dirter i 4Jesuh sinah, “Cawnpiaktu, hi nu hi ṭangdang a kai lio ah, a sual lio hrimhrim ah tlaih a si. 5Moses cauk ah hibantuk minung hi lung in thi lak i cheh dingin nawl a kan pêk. Nang zeitindah na ruah? tiah an ti. 6Hi thil hi Amah hneksaknâk le sual an phawt khawh nâkhnga caah an tuahmi a si. Jesuh cu a kun i a thei lomi bangin vawlei ah a kutdong in a ṭial. 7An hal chih len caah, a dir i an sinah, “Nan lak ah sualnâk a ngei lomi nih nu cu chep hmasa seh,” tiah a ti. 8A kun ṭhân i leiah a ṭial ṭhân. 9A chimmi kha an theih tikah, an chiaṭha hngalhnâk ah sual a phawt hna i a upa bik in a dongh tiang pakhat hnu pakhat an i zûk dih. Jesuh le a lai i a dirmi mi nu lawng an tâng. 10Jesuh cu a rak dir ṭhân i minu dah tilo cu ahohmanh a hmuh hna lo tikah a sinah, “Minu sual an phawtu hna kha khawzei ah dah an um dih? Ahohmanh nih thiamlo an in coter lo maw?” tiah a ti. 11Anih nih, “Coter lo, Bawipa” tiah a ti. Jesuh nih, “Keizong nih thiamlo kan coter lo, kal law va sual ti hlah,” tiah a ti. 12Jesuh nih an sinah bia a chim ṭhân i, “Vawlei ceunâk ka si, aka zultu pauh cu mui ah a um lai lo, nunnâk ceu a ngei lai,” tiah a ti. 13Farasih hna nih, “Mah kong hngalhtertu na si, cucaah na hngalhternâk bia zong a dik lo,” tiah an ti. 14Jesuh nih a leh hna i, “Ka kong i hngalhter hmanhning law, ka hngalhtermi bia hi a dikmi a si, zeitintiah khawzei in dah ka rat i khawzeiahdah ka kal lai kha ka hngalh, nannih nih ka chuahnâk le ka kalnâk ding nan hngal lo. 15Nannih nih taksa bangin bia nan ceih. Kei cu ahohmanh ka ceih hna lo. 16Ceih hmanh ning law, ka biaceihnâk cu a dik lai, zeitintiah keimah lawngin ka um lo, aka thlahtu he kan umṭi. 17Nan nawlbia cauk zongah, ‘mi pahnih bia cu a dik’ ti a si kha. 18Mah tein mah kong hngalhtertu ka si, aka thlahtu Pa zong nih ka kong a hngalhter,” tiah a ti. 19Annih nih, “Na Pa cu khuazeiahdah a um?” tiah an ti. Jesuh nih, “Nannih nih nanka hngal lo, Ka Pa zong nan hngal hlei lo. Ka hngal ulaw, ka Pa zong nan hngalh ko hnga,” tiah a leh hna. 20Cu bia cu ṭempal i thawhlawm chiahnâk hmun i cawnpiak pah in a chim, ahohmanh nih an tlai fawn lo, zeitintiah a cân a phâk rih lo. 21Jesuh nih an sinah a chim ṭhân i, “Lo diam ka kal lai, nanka kawl lai i sual ngeibu in nan thi lai. Ka kalnâk dingah nan ra kho lai lo,” tiah a ti. 22Judah mi nih, “Thah â tim maw a si hnga? ‘Ka kalnâk dingah nan ra kho lai lo,’ a kan ti hi,” tiah an ti. 23Anih nih, “Nannih cu tanglei in a chuakmi nan si i kei cu cunglei in a chuakmi ka si. Nannih cu vawlei mi nan sin i kei cu vawlei mi ka si lo. 24Cucaah dah kaw nan sinah, “Sual ngeibu in nan thi lai,” kan ti hna cu. ‘Amah kha ka si’ ka timi hi nan zumh lo ahcun, nan sualnâk he nan thi hrimhrim ko lai,” tiah a ti. 25Annih nih, “Aho cu dah na si?” tiah an ti. Jesuh nih “Cucu dah kaw a hramthawk te in kan chimhmi hna kha a si cu,” tiah a ti. 26Nan kongah hin chim le ceih awk tampi ka ngei, zeiasihmanhah aka thlahtu cu mi dik a si: Asin in ka theihmi bia pauh vawlei sinah ka hngalhter tawn,” tiah a ti. 27Pa kong a chimh hna ti kha an hngal kho hrimhrim lo. 28Jesuh nih, “Mi Fapa hi nan târ hnu ah, ‘Amah cu ka si’ ti le keimah nawl in zeihmanh ka tuah lo i Pa nih a ka chimhning tein bia ka chim ti kha nan hngalh te lai. 29Aka thlahtu cu ka sinah a um. Pa nih keimah lawng aka umter ballo, Amah duhnâk ka tuah tawn caah,” tiah a ti. 30Cubantuk bia a chim hnu ah mi tampi nih Amah cu an zumh. 31Jesuh nih Amah zumtu Judah mi hna sinah, “Ka bia i nan hmunh ahcun, Aka zultu taktak nan si lai. 32Cun Biatak nan hngalh lai i biatak nih an luatter hna lai.” tiah a ti. 33Annih nih, “Abraham fa kan si i a tutiangin ahohmanh sal ah kan um ballo, an luatter hna lai, na timi kha zei na tinâk dah a si?” tiah an ti. 34Jesuh nih, “Biataktein, biataktein, kan chimh hna, sualnâk a tuahmi pauh cu, sual sal a si. 35Sal cu inah a um peng lo, fapa tu cu inah a um peng. 36Cucaah Fapa nih an luatter hna ahcun nan luat tak tak lai. 37“Abraham fa nan si kha ka hngalh; asinain thah nan ka timh fawn. Ka bia nih nanmah ah hmun a ngeih lo caah a si. 38Ka Pa sin in ka hmuhmi kha ka chim tawn. Nannih zong nanpa sin in nan hmuhmi kha nan tuah tawn,” tiah a ti. 39Annih nih, “Kanpa cu Abraham a si.” tiah an ti. Jesuh nih, “Abraham fale nan si ahcun Abraham rian nan ṭuan lai. 40Asinain Pathian sinin biatak a hngal i an chimtu hi, atu thah nan timh fawn. Abraham nih hi bantuk thil a tuah bal lo. 41Nannih nih nanpa tuahmi nan tuah tawn,” tiah a ti. Annih nih, “Lakfa kan si lo; Pa pakhat Pathian kan ngei,” tiah an ti. 42Jesuh nih, “Pathian nan pa a si ahcun, nan ka dawt lai. Zeitintiah Pathian sin i a chuakmi le, a sinin a rami ka si. Keimah nawlin ka ra lo, Amah nih a ka thlah. 43Zeiruangahdah ka bia nan theihthiam lo. Ka bia ngaih nan duh lo caah a si. 44Nannih cu nanpa khuachia ta nan si i a duhmi kha tuah nan duh. Amah cu a hramthawk in lainawng a rak si, biatakah a um lo, a chungah biatak a um lo caah. Lih a chim tikah, amah kokek a chimmi a si, anih cu milihchim a si i lih pa zong a si. 45Biatak kan chimh hna ruangah nanka zumh khawh lonâk hi a si. 46Nanlakah ahonihdah sual kongah thiamlo a ka coter kho lai? Cun biatak kan chimh hna ahcun, zeiruangahdah nan ka zumh lo? 47Pathian mi nih Pathian bia a ngaih tawn. Nannih nih ka bia nan ngai lo, zeicatiah Pathian ta nan si lo caah,” tiah a ti. 48Judah mi nih, “Samaria mi, khuachia tuahmi kan rak inti kha a dik tak ko lo maw?” tiah an leh. 49Jesuh nih, “Khuachia tuahmi ka si lo; ka Pa ka thangṭhat tu a si deuh, nannih nih nanka zomhtaih. 50Mah thangṭhatnâk ka kawl lo. A kawltu le ceihtu pakhat a um. 51Biataktein, biataktein kan chim hna, “Ka bia â tlaihmi pauh cu thihnâk a hmu hrimhrim lai lo,” tiah a ti. 52Judah mi nih, “Khuachia tuahmi na si kha atu kan hngalh cang! Abraham a thi cang, profet hna an thi cang, nang nih, “Mi nih ka bia a zulh ahcun thihnâk a tem lai lo,” tiah na ti fawn. 53A thi ciami hringtu kan Pa Abraham nâkin na ngan deuh maw? Profet zong an thi cang. Mi zei ah dah nâ ruah?” tiah an ti. 54Jesuh nih, “Keimah i thangṭhat ninglaw, kâ thangṭhatnâk cu zeihmanh a si lai lo. Kan Pathian nan timi ka Pa cu aka thangṭhattu a si. 55Nannih nih Amah nan hngal fawn lo. Kei nih cun Amah kha ka hngalh. Amah ka hngal lo, tining law, nanmah bantuk lihchimmi ka si ve lai, Amah ka hngalh i a bia zong ka zulh tawn. 56Nan pa Abraham cu ka ni hmu ding a si caah â lawm tawn, cun a hmuh taktak i â lawm taktak,” tiah a ti. 57Judah mi nih, “Nang, kum 50 hmanh a si lomi nih Abraham na hmuh maw?” tiah an ti. 58Jesuh nih, “Biataktein, biataktein kan chimh hna, “Abraham um hlanah, a UMMI ka si,” tiah a ti hna. 59Cuticun Amah chehnâk dingah lung an char cawlh, asinain Jesuh cu â thup i ṭempal in mizapi karlak ah â zuk i lo diam a kal.

Currently Selected:

JOHN 8: HAKABSI

Highlight

Copy