LUKA 15
15
1Cuhnuah ngunkhuai khawltu le misual vialte nih a bia ngai dingin an run naih. 2Farasih hna le nawlbiacawnpiaktu hna nih, “Hipa nih hin misual a komh hna i rawl zong a eipi tawn hna tiah an sawi. 3Cuticun hi tahchunhnâk hi a chimh hna. 4Nanlakah mi pakhat khat nih tuu zakhat ngei ulaw, pakhat kha thlau sehlaw, sawmkua le pakua kha kal takin a tlaumi kha nan hmuh hlan lo nan kawl lai lo maw? 5A hmuh tikah lunglawm ngaiin a liangah â chonh lai. 6Inn a phâk tikah, innpa le a hawi le a auh hna lai i, “Ka lomhpi u, a tlaumi ka tuu ka hmuh cang,” tiah a ti lai. 7Kan chimh hna, cubangin miding sawmkua le pakua ngaihchih a herh lomi nâkin misual pakhat a ngaihchihmi kongah vanah lunglomhnâk a tam deuh. 8“Nu zeihmanh nih ngamu pahra ngeiin pakhat thlau sehlaw, meiin vangin, a inn cu a phiah lai i a hmuh hlan tiang a kawl lomi nan um hnga maw? 9A hmuh tikah a hawikom le innpa kha au in, “Ka lomhpi u, a tlaumi ka ngamu ka hmuh cang,” a ti lai. 10Cubangin kan chimh hna, Pathian vanmi hna hmaiah, misual pakhat ngaihchih nâkah an i lawm tawn. 11Cun mi pakhat nih fapa pahnih a ngei, 12A ngakchia deuhnih apa sinah, kapa, ka co hngami ro ka pe? tiah a ti. Cuticun a chawva kha a phawt hna. 13Ni tlawmpal hnu ah a ngakchia deuh nih a co hngami vialte â lak i ram hlapi ah a tlawng, cukaah a chawva cu nomhhnaihnâk lawng teah a hman hna. 14Cun a chawva a hman dih in, cu ramah fak piin mangṭâm a tlung i ei awk a ngei ti lo. 15Cuticun cu ram i mi pakhat sinah a um. Cupa nih vawkrawl pe dingin lo ah a kalter. 16Vawk nih an eimi bekawng hna i paw i khimter kha a duh ngaingai. Asinain ahohmanh nih zeihmanh an pe lo. 17Cubangin amah le amah a hun i hngalh tikah, kapa sinah kuli a ṭuanmi hna nih ei cawk loin rawl an ngeih lioah, kei hika ah rawlṭâm in ka thi lai maw? 18Ka tho lai i kapa sinah ka kal lai, a sinah, kapa, nahmai le vanmi hmai ah ka sual cang, 19na fapa ti awk hmanh ah kâ tlâk ti lo. Na sin i kuli a ṭuanmi pakhat bangin ka siter ko,” ka ti lai, tiah a ti. 20Cun a tho i apa sinah a kal. Lam hlapi i a um lio ah apa nih a rak hmuh i a zângfah tuk hrinhran, a tlik hnawh i a hngawngah kup in a hnamh. 21Cun a fapa nih, ‘Kapa, vanmi le nangmah hmaiah ka sual cang, nafa tiah kawh awkah kâ tlâk ti lo,’ tiah a ti. 22“Asinain apa nih a sinum hna sinah, ‘A ṭha bik puan kha rak pu ulaw ngaihter u, a kutah zunghruk hruk u law a ke ah kedan danh u.’ 23Cun a thau bik caw kha ratpi ulaw, that u, ei u sih law i nuam u sih, 24zeitintiah hi ka fapa hi a thi i atu a nung cang, a tlau i atu kan hmuh cang.’ Cun nuam ngaiin um hram an thawk. 25Cun upa deuh kha lo ah a um. A rak tlung i inn a phâk laiah ringawn tum thawng le lâm thawng kha a theih. 26Sinum pakhat a auh i, “Cucu zeithildah a si?” tiah a hal. 27Anih nih, na nau a rak tlung i him tein a hmuh ṭhân caah napa nih a thaumi caw kha a thah,” tiah a ti. 28Cuticun a thin a hung i a lut duh lo. Cucaah apa kha ra in a rak lêm. 29Anih nih, kum tampi na rian ka ṭuan, na nawl ngai loin ka um bal fawn lo; ka hawi le hna he i nomhnâk dingah meheh fa pakhat hmanh naka pe bal lo. 30Hi na fapa, hlawhhlang hna sinah na chaw a hmang dihtu hi a rak tlun le cângkâ a thaumi caw na thah, tiah a leh. 31“Anih nih, ‘Ka fapa, ka sin i a um pengmi na si i ka ngeihmi vialte hi nata an si dih. 32Hi na nau hi a thi i a nung ṭhân cang. A tlau i kan hmuh ṭhân. Cucaah lunglawm tein um ding kan si lai lo maw,’ tiah a ti,” tiah a ti.
Currently Selected:
LUKA 15: HAKABSI
Highlight
Share
Copy
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
