THILTHAWHAI 12
12
Jakob thata a um thu le Peter lungin intângna
1Chun, chuong lai vêl chun Lal Herod chun kohrana mi ṭhenkhat suknawmnat tumin a kut ân let tah a.
2Jakob, Johan unau chu, kâwl- hnâmin a sâthlum a.
3Chu chun Judahai chu a suklâwm ti a hrietin, Peter khawm chu man a tum nâwk pei a. (Chuong nihai chu Chawlṭhanglo Bei ruoiṭhe ni a nih).
4 #
Ex 12.1-27
chun, a man hnung chun intângna inah a khum a, sipai pâwl li, pali seng peiin, ân vêng sâwktir a; Fekân Ruoiṭhe zoa mi po po kuoma ṭhuoi suok a tum a na.
5Chuleiin, Peter chu intângna inah ân umtir hrih a; nisienlakhawm, kohranhaiin ama ta dingin ṭha- hnemngaitakin Pathien kuomah an ṭawngṭaipêk hlak a.
Peter lungina inthawka a suok thu
6Chun, Herod chun a ṭhuoi suok tâwmin, chu zân tak chun Peter chu sipai pahni inkârah khaidiet pahni bunin a in a, a vêngtuhai khawm kawtkhâr bulah an um a, intângna in chu an vêng a.
7Chun, ngai ta, Lalpa vântirko pakhat a kâwlah a hung ngîr a, rip sûnga chun var ieng amanih a hung var a, Peter nâkah a khîk har a, “Tho vak rawh,” a ta. Chun, a khaidiethai chu a kuta chu a tla tah a.
8Vântirko chun a kuomah, “Dier kei la, i kekawk bun rawh,” a ta. Ama chun chuong ang chun a thawh a. Chun vântirko chun a kuomah, “I puon bât ṭha la, mi zui rawh,” a ta.
9Peter chu a suok a, a zui tah a; vântirko chângzie chu a tak a ni ti a hriet nawh a, manga a hmu amanih a sâwn lem a.
10Chun, vêngtu hmasa le a dawttu chu an khêl hnung chun, tuol suokna ding thîr kawtkhâr chu an va tlung a, chu chu an ta dingin ân hawng fâwm tah a; an suok a, kawtthlêr pakhat an khêl a; chun, vântirko chun a fe san nghâl tah a.
11Chun, Peter chu a har phingleh, “Lalpain a vântirko a tir suok a, Herod kut le Juda mihai beiseina po poa inthawkin a mi sandam ti tuhin indiktakin ka hriet tah,” a ta.
12Chun, ân ngaituo zo chun, Johan, Marka an ti, chu mipa nu Mari ina chun a va feh a; chutaka chun ṭawngṭaiin mi tamtak an lo um khâwm a.
13Chun, tuolpûk kawtkhâr a hei nawk phingleh, a hming Rodi, nunghâk pakhat, dawn dingin a va feh a.
14Peter rawl a hriet phingleh, a lâwm leiin kawt chu hawng loin a tlân lût nâwk ta lem a, “Peter chu kawtkhâr bulah a ngîr” tiin a va hril a.
15Nisienlakhawm, anni chun a kuomah, “în vêt a ni ta hi,” an lo tih a. Ama ruok chu, “Titakzet a nih,” tiin a ṭhang ṭal a. Anni chun, “A vântirko a ni chu,” an ta.
16Nisienlakhawm, Peter chun a nawk zing a; chun, an hei hawng chun, ama chu an hmuh a, mak an ti hleh a.
17Chuongchun, ama chun an tona dingin kutin a zâp a, Pathienin intângna ina inthawka a ṭhuoi suokzie chu a hril tah a. Chun, “Hieng thu hi Jakob le unauhai kuomah va hril ro,” a ta. Chun, a suok a, ram dangah a fe tah a.
18Chun, nisa a suok phingleh, sipaihai chu, “Peter khâwlai am a um tah a?” tiin buoi namênin an buoi nawh a.
19Herod chun a zawng a, a hmu si nawh a, a vêngtuhai chu a suosal a, sukhlum dingin thu a pêk tah a. Chun, Herod chu Judai rama inthawkin Kaisari khuoah a zu feh a, chutaka chun a um zing a.
Herod thi thu
20Herod chu, Tura le Sidon khuoa mihai chunga chun a lungninaw bêk bêk a. Anni chun, Blasta, lal khum vêngtu chu, an ruolah an siem a, inthuruolin a kuomah an hung a, an khuo tiengin lal khuo tienga pûr inchaw hlak an ni leiin inrem an ngên a.
21A ni tiem ni chun, Herod chun lal puon a sil a, lalṭhungphaah a ṭhung a, an kuomah thu a hril a.
22Mi po po chun, “Pathien rawl a ni hi, mihriem rawl a ni naw hi,” an ta, an khêk a.
23Ama chun Pathien kuomah chawimawina chu a pêk naw leiin Lalpa vântirkoin kârloah a man a, rulrukûtin a fâk a, a thi tah a.
Barnaba le Saula
24Pathien thu ruok chu, ân dâr a, a pung ta pei a.
25Chun, Barnaba le Saula chun, rawng chu an bâwl zo chun, Jerusalema inthawk chun an kîr nâwk tah a, Johan, Marka an ti chu an kuomah an ṭhuoi veh a.
Currently Selected:
THILTHAWHAI 12: HMARCLBSI
Highlight
Share
Copy
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
