THILTHAWHAI 5
5
Anania le Saphira
1Nisienlakhawm, mi pakhat a hming Anania a nuhmei Saphira leh an um a, Anania chun hnuoi a zawr a, a nuhmei hrietin a man a ṭhen a ip tah a.
2Chun, a ṭhen a hung chawi a, tirkohai ke bula chun a sie a.
3Nisienlakhawm, Peterin, “Ana- nia, Thlarau Inthieng hlêm ding le, hnuoi man a ṭhen ip dingin iengdinga Setanin I lungril a suksip am a na?
4A um sûng po khan i ta a ni zing a ni naw am a nih? I zawr hnung khawm khan a man chu i thu thua um a ni naw am a nih? Iengdinga hieng thu hi i lungrila i ngaituo am a na? Mihriem hlêm i ni nawh a, Pathien kuoma khêl hril i ni lem,” a ta.
5Chun, Anania chun chuong thu chu a hriet phingleh a tluh a, a thi tah a; chun, a hre taphawt chun an ṭi ta bêk bêk a.
6Chun, tlangvâlhai chu an tho a, an tuom a, an zâwn suok a, an phûm tah a.
7Chun, dârkar thum lai hnunga chun, a nuhmei chu thil umzie chu hre loin a hung lût a.
8Chun, Peterin a kuomah, “Mi hril rawh, Hnuoi chu hieng zât char hin maw in zawr?” a ta. Ama chun, “Uou, hieng zât char hin a nih,” a ta.
9Chun, Peterin a kuomah, “Ieng- dinga Lalpa Thlarau infiena dinga in inthuruol am? Ngai ta, i pasal phûmtuhai kepha chu kawtkhâr bulah a hung um tah, nang khawm zâwn dawk an ti che,” a ta.
10Chun, kârloin a ke bula chun a tlu nghâl tah a, a thi ve tah a; chun, tlangvâlhai chu an hung lût a, ama chu a thisain an hung hmuh a, an zâwn dawk a, a pasal kâwla chun an phûm tah a.
11Chun, kohranhai po po le chuong thu hre taphawt chun an ṭi ta bêk bêk a.
Tirkohaiin inchikna le thilmak an thaw
12Chun, mi lai Pathienin tirkohai kutin inchikna le thilmak tamtak a thaw hlak. Annirawi chu an rêngin lungril hmunkhatin Solomon Tuol- pûka chun an inkhâwm hlak.
13Mi dang ruok chu tukhawm anni lai an ṭhang ve ngam ta nawh; nisienlakhawm, anni chu miin an inpâk hlak.
14Chun, a ring tharhai nuhmei le pasal tamtakin Lalpa kuoma chun an hung belsa nâwk zuol hlak a.
15Chuongchun, mi damnawhai khawm kawtthlêrhaiah an zâwn dawk a, khumahai, puonphaahai an inzâltir a, “Peter fe malamin a hlimin a ṭhen bêk a hlie theina dingin,” an ta.
16Chun, Jerusalem kâwl vêl khuoa inthawkin mipuihai khawm chu damnawhai, khawhri inthieng- naw isawisakhai hung ṭhuoiin an hung khâwm a; chuonghai khawm chu an hung dam ta seng a.
Tirkohai suknawmnatin an um
17Chun, thiempu Laltak le a ruolhai po po an hung inthawk a, (chuong a ruolhai chu Saddukai pâwl an nih,) an îtthîk bêk bêk a,
18tirkohai chu an man a, vântlâng intângna inah an khum tah a.
19Nisienlakhawm, Lalpa vântirko pakhatin, kawtkhârhai chu a hung hawng a, a ṭhuoi suok tah a,
20“Pathien biekinah va ngîr unla, mi kuomah hieng hringna thu po po hi va hril ro,” a ta.
21Chun, chu thu chu an hrietin khawvar hun vêla chun Pathien biekinah an va lût a, an inchûktir a. Nisienlakhawm, Thiempu Laltak le a ruolhai chu an hung a, rorêltuhai le Israel thlahai upahai po po an ko khâwm a, tirkohai chu hung inṭhuoitir dingin intângna ina chun mi an tir a.
22Nisienlakhawm, manmihai chu an va tlung chun intângna ina chun anni chu an hmu si nawh; chuong- chun, an kîr nâwk a,
23“Intângna in chu himtaka inkhârin, a vêngtuhai khawm kawt- khâr bula ngîrin kan hmu sih a; nisienlakhawm, kan hei hawng a, a sûngah tukhawm kan hmu si nawh,” tiin an hril a.
24Chun, Pathien biekin hotu le thiempu lalhaiin chuong thu chu an hrietin, “Hieng hi iengtin tak inphuong a ti maw?” tiin an thua chun an lunginzîng ta bêk bêk a.
25Chun, mi pakhat a hung a, an kuomah, “Ngai ta u, intângna ina mi inkhumhai khan Pathien biekinah ngîrin mi an inchûktir ka ti!” tiin an hung hril a.
26Chuongchun, hotu chu manmi- hai le chun an va feh a, vântlâng an ṭi leiin tlangtakin an hung ṭhuoi a, chuong naw chun lunga dêng an ṭih a.
27Chun, an hung ṭhuoi tlung chun rorêltuhai hmaa chun an inngîrtir a. Chun, Thiempu Laltak chun an kuomah,
28 #
Mt 27.25 “Hi hming hin inchûktir lo ding kan ti tlat ta cheu kha; hre ro, in thu inchûktirin Jerusalem in suksip vawng ta hi; chu mipa sukhlum bul chu mîn tumtir in tum a ni hi,” tiin a suosal a.
29Nisienlakhawm, Peter le tirko- hai chun, “Mihriem thu nêkin Pathien thu kan zâwm lem ding a nih.
30Nangnîn Isu thinga khaikângin in sukhlum kha, ei thlatuhai Pathienin a keitho nâwk tah a nih.
31Ama ngei kha Pathienin Lal le Sandamtua um dingin a changtieng a chawimawi tah, Israelhai suol insim- tir ding le ngaidam dingin.
32Chuong thu chu, a hretuhai kan ni hi, Thlarau Inthieng, Pathienin a thu zâwm taphawthai kuoma a pêk kha, a hretu a ni ve bawk a,” an ta, an dawn a.
33Chun, anni chun chuong thu chu an hrietin an lungril a khei tah a, sukhlum an tum tah a.
34Nisienlakhawm, rorêltuhai lai chun, a hming Gamaliel, Pharisai, Dân hretu, mi po po laia hminginthangtak, mi pakhat chu a ngîr a, chuhai chu insuoktir phawt dingin thu a pêk a.
35Chun, rorêltuhai kuoma chun, “Nangni Israel mihai, hihai chunga in thil thaw tum hi fîmkhur ro.
36Tuta hma khawm khan, Theo- da, ‘Mi lien ka nih,’ tiin a hung um a, chu mipa kuoma chun mi tamtak, za li lai an lo kawp a. Ama chu sukhlumin a um tah a; a thu zâwm taphawt chu an rêngin an indar ta vawng a, iengkhawm an ni ta nawh.
37Chu mipa um hnung chun, hming ziek lai khan Galili rama mi Juda kha a hung um nâwk a, a kuomah mi ṭhenkhat a hîp nâwk a, nisienlakhawm, ama chu a thi tah a, a thu zâwm taphawt chu an rêngin an indar ta vawng a.
38Chuleiin, tuhin ka ti cheu hi, hieng mihai hi tâwk naw unla, um el raw hai se; hieng an thil thaw tum le an thilthaw hi mihriem ithaw suok el a ni chun bohmang a tih;
39amiruokchu, Pathien ithaw suok a ni chun anni sukbohmang thei naw ti niu; chuong naw chun, Pathien do ni hlau rawi in tih,” a ta. Chun, a hril chu rem an ti tah a.
40Chuongchun, tirkohai chu an ko a, an vuok a, chu zo chun Isu hminga thu hril lo ding ti tlatin an insuo tah a.
41Chuongchun, rorêltuhai laia inthawk chun an suok a, chu hming leia muolphona tuor tlâka ruot an ni leiin an lâwm hleh a.
42Chun, ni tin Pathien biekina le anni inahai, “Isu chu Krista a nih,” tiin inchûktir le hril an ma nawh.
Currently Selected:
THILTHAWHAI 5: HMARCLBSI
Highlight
Share
Copy
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
