INṬANNA 31
31
Jakob tlânhmangna
1Jakob chun Laban naupa- haiin, “Jakobin ei pa ta po po a lâkpêk vawng a, ei pa taa mi a nih hieng hausakna a nei po po hi,” an ti thuhai a lo hriet a.
2Chuongchun, Jakob chun Laban hmêl chu a en a, hi hma ang khan a chungah a ṭha ta nawh ti a hmuh a.
3Chun, LALPA chun Jakob kuomah, “I thlatuhai le i laibunghai ramah fe nâwk ta rawh, i kuomah um pei ka tih,” a tih a.
4Chuongchun, Jakob chun mi a tir a, phûla a ran ruol umnaa chun Rakil le Leah chu ân kotir a;
5an kuomah, “In pa hmêl ka enin hi hma ang khan ka chungah a ṭha ta nawh ti ka hmuh a; nisienlakhawm, ka pa Pathien chu ka kuomah a um zing a nih.
6Nangni khawmin in pa rawng hi ka theitâwpin ka bâwl ti in hriet a.
7Nisienlakhawm, in pa chun a mi hlêm a, ka hlaw hi vawi sâwm lai a mi sukdanglampêk tah a; nisienla- khawm, Pathienin ka pawi a tawk a phal naw a nih.
8A ze irawl nukhai chu i hlaw nîng a tih, a ti leh ran po po chun te, a ze irawl nukhai an nei hlak a; chun ‘A ze itanhai i hlaw nîng a tih,’ a ti leh ran po po chun te a ze itan ruok an nei hlak a.
9Chuong ang chun Pathienin in pa ranhai chu a lâkpêk a, kei a mi pêk tah a ni hi.
10Ranhai an inzâwl hun lai chun ka mangin ka hang dâk a, ran zâwltu a chalhai chu a ze intan dâm, a ze irawl dâm, a ze ṭielṭak dâm, an nih ti ka hmuh a.
11Chun, ka manga chun Pathien vântirkoin, ‘Jakob,’ a mi hung tih a. Kei chun, ‘Hitaka hi ka um,’ ka tih a.
12Ama chun, ‘Hung dâk la en rawh, ran zâwltu a chalhai po po saw, a ze intan dâm, a ze irawl dâm, a ze ṭielṭak dâm an ni saw: I chunga Laban thilthaw po po hi ka hmu a nih.
13Kei hi lungphuna sahriek i nâlna, a kuoma thu i tiemna, kha Bethel Pathien kha ka nih; tuhin tho la, hi rama inthawk hin suok la, i piengna rama chun fe nâwk ta rawh,’ a tih a,” a ta.
14Rakil le Leah chun an dawn a, a kuomah, “Kan pa ina chun kan ta dingin chanvo le ro inkhâwm ding hrim a la um ta rawp am a nih?
15Ama chun ram dang mi ang chauah a mi ngai tah ni lo am a nih? A mi zawr a, kan man khawm a fâk zo vawng ta sih a.
16Pathienin kan pa kuoma in- thawka sum a lâkpêk po po chu keini le kan nauhai ta a ni hi; chuongchun, Pathienin i kuoma a hril taphawt chu thaw raw khai,” an tih a.
17Chuongchun, Jakob chu a tho a, a naupasalhai le a nuhmeihai chu sanghâwngseihai chungah ân chuongtir a;
18chun, Kanaan rama a pa Isak kuoma fe dingin a ran po po le, a sum inkhâwl po po, a ran hmuhai, Paddan-aram rama ân khâwlhai chu a fepui ta vawng a.
19Laban chu a berâm hmul vaw dingin a fe dai a; chun, Rakil chun a pa milimhai chu ân rûkpêk a;
20chun, Jakob chu Aram#Hi hi Mesopotamia Hmar-thlang a nih mi Laban hriet naw kârin a fe hmang dai tah a, a tlân hmang ding chu a hril nawh a.
21Chuongchun, a nei po po le chun a tlân hmang tah a; chun, a tho a, Vadungpui#Euphrates chu a kân a, Gilead tlâng tieng chu panin a fe pei tah a.
Labanin Jakob a hnawt
22Jakob chu a tlân hmang ti, a ni thum niah, Laban an hril a.
23Chuongchun, a unauhai a ṭhuoi a, ni sari lam a hnawt a, Gilead tlânga chun a hnawt phâk tah a.
24Chun, Aram mi Laban kuoma chun zânah a mangah Pathien a hung a, a kuomah, “Jakob kuomah a sie a ṭha, a iengkhawm hril lo dingin fîmkhur rawh,” a tih a.
25Laban chun Jakob chu a hnawt phâk a.Jakob chun a puon in chu tlânga chun a lo zar tah a; chun, Laban khawm chun a unauhai leh Gilead tlânga chun an zar ve tah a.
26Chun, Laban chun Jakob kuomah, “I thilthaw hi iengtizie am a ni leh? ka hriet naw kâr i fe rûk dai a, kâwlhnâma salmanhai ang ela ka naunuhmeihai i ṭhuoi hmang hi?
27Iengdinga inrûka i tlân hmang a, i mîn relrûk san a, hlimna le hla dâm, khuongte le ṭingṭang dâm le kan inthlana ding cheha i mi hril nawh a,
28ka naunuhmeihai le ka tuhai khawm ka fâwp i phal naw am an leh? Invêtthlâktakin a nih thil i thaw hi.
29Suksethei che ka nih i sawn- naw: nisienlakhawm, i pa Pathien chun zâni zân khan, ‘Jakob kuomah a sie a ṭha iengkhawm hril lo dingin fimkhur rawh,’ tiin a mi biek a nih.
30Chun, i pa in ngai tain fe inhâwk êm êm la khawm, iengdinga ka pathienhai mîn rupêk am i nih a?” a tih a.
31Jakob chun a dawn a, Laban kuomah, “Ka ṭi lei a nih, i nau- nuhmeihai hi mi lapêk rawi i tih, ti ka ṭiha a nih.
32Tukhawm i pathienhai i hmûna chu dam naw ni hai; ei unauhai mithmua hin i ta kan kuoma um chu en chieng la, la ta la,” a tih a. Rakilin a lo inrûk ti Jakob chun a hriet si nawh a.
33Chun, Laban chu Jakob puon ina dâm, Leah puon ina dâm, suoknuhai pahni puon ina dâm chun a lût pei a; nisienlakhawm, a hmu nawh a. Leah puon ina inthawk chu a suok a, Rakil puon ina chun a lût a.
34Rakil chun milim chu a lâk a, sanghâwngsei thuomhnaw lai chun a lo sieh a, a lo ṭhung deh a. Laban chun a puon in sûng po po chu a dap vêl vawng a, nisienkhawm, a hmu nawh a,
35chun ama chun a pa kuomah, “I hmah a ka tho pei naw leiin, ka lalpa, lunginsen naw rawh; nuhmei umdân pângngai chu ka chunga a um lai tak a ni sih a,” a tih a. Chuongchun, a zawng a zawng a, milimhai chu a hmu zo ta nawh a.
36Chun, Jakob chu a lunginsen tah a, Laban chu a hal a. Jakob chun Laban kuomah, “Iengam ka bawsiet a, iengam a na ka suolna i mi hung hnawt rak el a?
37Ka thuomhnaw po po i dap suok vawng khawmin, i insûng thuom- hnaw hrim iengam i hmu leh? Ka unauhai le i unauhai hmaa hin hung sie suok la, a tu lem am ei indik ngaituo raw hai se.
38Tuhin kum sâwmhni zet i kuomah ka um tah a, i berâmpuihai le i kêlpuihai chun an têhai an nei suol hrim hrim ngai nawh a, i berâm ruol laia a chalhai khawm ka fâk ngai bawk nawh.
39Ramsa se khawm i kuoma hin ka la hung intlun ngai nawh a, keiin ân hmang ai chu ka tuor lem hlak a, sûna inrûk ni leh, zâna inrûk ni leh ka ithung i phût hlak a.
40Vawi tamtak chu sûna nisa lum le zâna khawdeiin a mi sukrinum êm êm hlak a, îmu khawm ka hmu ngai nawh.
41Chuong kum sâwmhni sûng po chu i kuomah ka um a, i naunu- hmeihai pahni hlaw dingin kum sâwmpali le, i ranhai hlaw dingin kum ruk i rawng ka bâwl a; ka hlaw hlak chu vawi sâwm lai i sukdanglam sih a.
42Ka pa Pathien, Abraham Pathien, Isak Iṭi chu ka kuomah um naw sienla lem chu, tu khawm hin ruok ngawta mîn fetir ngei ding i ni hi. Pathienin ka rinum tuor le ka rimsikzie chu a hmuh a, zâni zân chun a kâwk che a ni chu,” a tih a.
Jakob le Labanin thuthlung an siem
43Chun, Laban chun a dawn a, a kuomah, “Naunuhmeihai hi keia nauhai an nih a, naupanghai hi keia naupanghai an nih a, ranhai hi keia ran an nih a, i hmu po po hi keia ta vawng an nih: vawisûn hin hieng ka naunuhmeihai chunga le an nauhai chunga hin iengam thaw thei ka ti leh?
44Hung ta, kei le nang hin thu thlung ei tih, chu chu kei le nanga kâra hrietna ni raw se,” a tih a.
45Chuongchun, Jakob chun lung a lâk a, lungphun dingin a phun a.
46Chun, Jakobin a unauhai kuom- ah, “Lung la khâwm ro,” a tih a; chun, lung an lâk a, an intieng khâwm a; chun, lung intieng khâwm kâwla chun bu an fâk a.
47Laban chun chu lung intieng khâwm chu Jegar-sahadutha#Hrietpuina intieng khâwm ân bûk a; Jakob ruok chun Galeed#Heb Galead khawm hi hrietpuina intieng khâwm tina tho a nih ân bûk a.
48Laban chun, “Hi lung intieng khâwm hi vawisûn hin kei le nanga kâra hrietpuitu a ni hi,” a tih a. Chuleiin, a hminga chun Galeed inbûk a ni tah a.
49Mizpah#Mizpah chu vêngbûk tina a nih inbûk a ni bawk a, “Inṭheha ei um hnungin LALPA chun mi vêng tuo raw se.
50Ka naunuhmeihai hi i sukrim- sih a, ka naunuhmeihai ni lo nuhmei dang i nei chun, tukhawm ei kuoma hin an um nawha chu, en ta, Pathien chu kei le nanga kâra hretu a nih,” a tih a.
51Laban bawk chun Jakob kuomah, “Hi lung intieng khâwm hi en la, kei le nanga kâra hi lung ka phun khawm hi en ta.
52Pawi intâwkpêk dingin, keiin hi lung intieng khâwm hi khêlin i kuom tieng hung naw ningah a, ti le, nang khawmin hi lung intieng khâwm le hi lungphun hi khêlin ka kuom tieng hung naw ti nih, ti hi lung intieng khâwm hi hrietna ni sienla, hi lungphun khawm hi hrietna ni bawk raw se.
53Abraham Pathien, Nahor Pathien, an pa Pathien chun ei kâra thu ngaituo raw se,” a ti nâwk a. Chun Jakob chun a pa Isak Iṭi chu sâlin ṭawng ân khâm tah a:
54Chun, Jakobin tlânga chun inthawina ân hlân a, a unauhai chu bei fa dingin a ko a; chuongchun, bei an fâk a, tlânga chun an riek tah a.
55Chun, zingkâr Laban chu a tho a, a tuhai le a naunuhmeihai chu a fâwp a, mal a sâwm a; chun, Laban chu a feh a, ama umna tieng a kir nâwk tah a.
Currently Selected:
INṬANNA 31: HMARCLBSI
Highlight
Share
Copy
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
