INṬANNA 33
33
Jakob le Esau inrem nâwkna
1Chun, Jakob chu a hang dâk a, a thlîr a, Esau, a mi za lihai le hung chu a hmuh a. Chuongchun, a nauhai chu Leah kuoma dâm, Rakil kuoma dâm, suoknuhai pahni kuoma dâm a sem diet diet a.
2Suoknuhai le an nauhai chu a hmatâwng takah, Leah le a nauhai chu a dawtah, Rakil le Josef chu a nuhnung takah a sieh a.
3Ama chu an hmaa chun a feh a, a unaupa kuom tieng pana a fe chun a kuom a tlung hmain, vawisari hnuoi sikin chibai a bûk hman a.
4Chun, Esau chu ama lâwm dingin a tlân a, a kuoh a, a ir a suktuoh a, a fâwp a; chun, an ṭap ve ve tah a.
5Esau chu a hang dâk a, nuhmeihai le naupanghai chu a hmuh a, “I ṭhuoihai hi tuhai am an nih a?” a tih a. Ama chun, “Pathienin lunginsiettaka i siehlaw kuoma a pêk naupanghai an ni hi,” a tih a.
6Chuongchun, suoknuhai chu an nauhai le chun an hung hnai a, an kûn a,
7Leah khawm a nauhai le chun an hung hnai a, an kûn a; chu hnunga chun Rakil le Josef chu an hung hnai a, an kûn veh a.
8Esau chun, “Ran ruol ka întuokpui zozaihai kha ieng i tina am a nih a?” a tih a. Jakob chun, “Ka lalpa, i lunginsietna ka hmu theina dingin ka ti a nih,” a tih a.
9Chun, Esau chun, “Kei khawmin ka hau ie, ka sangpa, i nei po po chu i ta ni raw se,” a tih a.
10Jakob chun, “Ni lo e, i mi lunginsiet thei chun lunginsiettakin ka lâwmman hi mi pawmpêk rawh: Pathien hmêl hmu angin i hmêl ka hmuh a, ka chungah i lâwm sih a.
11Pathienin a mi lunginsiet a, ka nei ṭeu leiin lunginsiettakin ka thil hung pêk che hi chu pawm rawh,” a tih a. Chuong ang chun a thlêm a, ama chun a pawm tah a.
12Chun, Esau chun, “Hung rawh fêng ei tih, hma ṭhuoi pêk ka ti che,” a tih a.
13Jakob chun a kuomah, “Nau- panghai hi an la chîn a, berâm ruol le ran ruol ka kuoma umhai khawm hi te ṭhuoi an nih ti ka lalpain i hriet a; ni khat chau khawm khal hrât taluo inla, ran ruol po po hi thi vawng el an tih.
14Ka lalpa, lunginsiettakin i siehlaw hmaa hin fe la, kei chu Seir tlângah ka lalpa kuom ka tlung hmakhat chu, ka hmaa ran fe hi an fe thei tâwk ang peiin le, naupanghai fe thei tâwk ang peiin, damtein hung sawm lem ka tih,” a tih a.
15Chun, Esau chun, “Ka kuoma um mi ṭhenkhathai bêk hi mâksan- pêk ka ti che aw,” a tih a. Ama chun, “Iengding kherin am ie? ka lalpa, i lunginsietna mîn hmutir el rawh,” a tih a.
16Chuongchun, Esau chu chu ni ma chun Seir tlâng tieng panin a kîr nâwk tah a.
17Chun, Jakob chu Sukkoth-ah a feh a, ama ta dingin in a bâwl a, a ranhai ta dingin bûk a bâwl bawk a; chuleiin, chu hmun hming chu Sukkoth an ti tah a.
18Chun, Jakob chu Paddan-aram rama inthawka hungin, Kanaan rama um Sekem khuo chu himtakin a tlung a, khawhnâwma chun a puon in a zar tah a.
19A puon in zarna hmun chu Sekem pa Hamor nauhaia inthawkin tangka zain ân châwk a.
20Chutaka chun mâichâm a siem a, a hmingah El-elohe-Israel#El-elohe-Israel chu Pathien, Israelhai Pathien tina. Israelhai Pathien chu thilthawthei a nih tina khawm a ni tho ân bûk a.
Currently Selected:
INṬANNA 33: HMARCLBSI
Highlight
Share
Copy
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
