JOHAN 10
10
Berâm ruol tekhithu
1“Titakzetin, titakzetin ka hril cheu hi, tûkhawm berâm huona kawtkhâra lût loa, a dang tienga lâwn lût chu ama chu iengkhat inruhmang le suomhmang a nih.
2Tûkhawm kawtkhâra lût ruok chu, berâm vêngtu a nih.
3Kawtkhâr vêngtuin ama chu a lo hawng pêk hlak a; berâmhaiin a râwl an hriet hlak a; ama berâmhai chu an hmingin a ko seng a, a ṭhuoi suok hlak a.
4A ta po po ân suoktir phingleh, an hma a ṭhuoi a, berâmhaiin ama an zu i hlak a, a râwl an hriet sih a.
5Mi dang chu zui naw ni hai a, tlân hmang san lem an tih; mi danghai râwl chu an hriet naw leiin,” a ta.
6Chu tekhithu chu Isûn an kuomah a hril a; nisienlakhawm, ieng thu am a na an kuomah a hril an hriet si nawh a.
Isu, Berâmpu ṭha chu
7Chuongchun, Isûn an kuomah a hril nâwk a, “Titakzetin, titakzetin ka hril cheu hi, kei hi berâm kawtkhâr chu ka nih,
8ka hmaa hunghai po po kha inruhmanghai, suomhmanghai an ni vawng a; nisienlakhawm, berâmhai chun an thu an awi nawh.
9Kei kawtkhâr chu ka nih; tûkhawm keimaah a lût chun, humhimin um a ta, lûtin suok a ta, fâk ding hmu bawk a tih.
10Inruhmang chu, inru ding le, sukhlum ding le sukse ding naw chun a hung nawh; kei chu hringna an neina dingin, tamtaka an neina dinga hung ka nih.
11Kei bêram vêngtu ṭha chu ka nih; berâm vêngtu ṭha chun berâmhai ta dingin a hringna a pêk hlak.
12Inhlawfa, berâm vêngtu tak ni loa, berâmhai a ta ni lo chun satene hung a hmu chun berâmhai a tlânsan hlak; chun, satene chun berâmhai a seh a, a sukdar hlak;
13inhlawfa a na, berâmhai a ngai- sak naw leiin a tlânsan hlak a nih.
14Kei chu berâm vêngtu ṭha ka nih; ka ta chu ka hriet a, ka ta khawmin an mi hriet a nih,
15 #
Mt 11.27; Lk 10.22 Pain a mi hriet a, kei khawmin Pa ka hriet ang hin; chun, berâmhai ta ding chun ka hringna ka pêk.
16Chun, hi berâm huona mi naw khawm hi, berâm dang ka nei; anni khawm ka la hung ṭhuoi ding a nih, ka râwl khawm hrieng an tih, chuongchun, pâwl khatin um an ta, a vêngtu pakhat leh.
17“Hi lei hin Pain a mi hmangai a nih, lâk nâwk dinga ka hringna ka pêk ding leiin.
18Tûkhawmin mi lâkpêk naw ni hai, keima thu thuin ka pêk lem ding a nih; pe thei ka nih, la nâwk thei khawm ka nih. Hi thupêk hi ka Pa kuoma inthawka ka hmu a nih,” a ta.
19Chuong thu lei chun Judahai an inṭheh a, an inkhing nâwk a.
20A ṭhen tamtakin, “Khawhri a zâwl a, ân vêt a ni hi; iengdinga a thu in ngai am a na?” an ta.
21A ṭhenin, “Hieng thu hi khawhri zâwl thuhril a ni nawh ie. Khawhri chun mitdel mit a sukvar thei am a nih?” an ta.
Judahaiin Isu an tai
22Chun, Jerusalema Inpumpêk Ruoiṭhe lai a na; chu chu thlasik lai a nih.
23Chun, Isu Pathien biekinah, Solomon tuolpûka chun ân lawn ân lawn a.
24Chun, Judahai a kâwlah an hung a, a kuomah, “Ieng chen am lungâwpinkaiin i mi sie ding a na? Krista i ni chun feltakin mi hril rawh,” an ta.
25Isûn an kuomah, “Ka hril ta cheu kha in awi si nawh; ka Pa hminga thil ka thaw hi, hieng hin ka chanchin ân hriettir a ni hi.
26Nisienlakhawm, in awi si nawh, ka berâm laia mi in ni naw leiin.
27Ka berâmhaiin ka râwl an hriet hlak, kei khawmin anni chu ka hriet, anni chun an mi zui hlak.
28An kuomah chatuona hringna ka pêk hlak; kumkhuoin bohmang naw ni hai a, tukhawmin ka kuta inthawkin mi lâkpêk bawk naw ni hai.
29Anni mi petu ka Pa chu mi po po nêka ropui a nih, tukhawmin Pa kuta inthawk chu lâkpêk thei naw ni hai.
30Kei le Pa chu pumkhat kan nih,” tiin a dawn a.
31Chun, Judahai chun a dêngna dingin lung an rût nâwk a.
32Chun, Isûn anni chu a biek a, “Pa kuoma inthawka suok sinthaw ṭha tamtak kân entir cheu a, khâng sinthawhai laia ieng sinthaw lei khan am a ni lunga in mi dêng ding hi?” a ta.
33Judahai chun a kuomah, “Sin ṭha chunga lunga dêng ding che kan ni nawh a; Pathien i hrilsietna chunga le, nang mihriem ni sih a, Pathiena în siem lei hin a ni lem a nih,” tiin an dawn a.
34 #
Lev 24.16; Sm 82.6 Isûn an kuomah, “In Dân lekhabuah, ‘Pathienhai in nih ka tih,’ ti ziek a ni naw am a nih?
35Pathien thu tlungnahai hman pathienhai an ti chun, (Pathien Lekha thu bân thei a ni si nawh a)
36Pain a iruot, khawvêla a itir chunga hin, ‘Pathien Naupa ka nih,’ ka ti leiin, ‘Pathien i hrilsiet,’ in ti a ni maw?
37Ka pa sinthaw ka ni naw chun mi ring naw ro.
38Amiruokchu, thaw ka ni chun, kei mi ring naw unla khawm, sin- thawhai bêk hi ring ro; Pa keimaah a um ti le, kei Paah ka um ti in hriet a, in ringna dingin,” a ta, a dawn a.
39Chuongchun, ama chu man an tum nâwk a, nisienlakhawm, an kuta inthawkin a suok a.
40 #
Jn 1.28
Jordan vadung râlah, Johanin a tîra mi a baptisna hmun tieng khan a fe hmang nâwk tah a, chutaka chun a um ta zing a.
41Chun, mi tamtak a kuomah an hung a, “Johanin thilmak iengkhawm chu a thaw nawh a; nisienlakhawm, Johanin hi mipa chungchâng thu a hril taphawt kha chu ân dik hle hi,” an ta.
42Chun, chutaka chun mi tam- takin ama an ring tah a.
Currently Selected:
JOHAN 10: HMARCLBSI
Highlight
Share
Copy
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
