JOHAN 15
15
Isu, grêp hrui tak chu
1“Kei grêp hrui tak tak ka nih, Ka Pa a huon enkawltu a nih.
2Ka zawmpui kâu ra naw taphawt chu a peihâwn hlak; a ra taphawt chu a sukthieng hlak, a ra tam nâwk zuolna dingin.
3In kuoma ka thu hril lei chun tu khawm hin in inthieng ta pang a nih.
4Keimaah um zing ro, kei khawm nangniah um zing ka tih. Kâu chu grêp hruiah a um zing naw chun a khâtin a ra thei naw ang bawkin, nangni khawm keimaah in um zing naw chun ra thei naw ti niu.
5Kei grêp hrui chu ka nih, nangni a kâuhai chu in nih, tûkhawm keimaa a um zing a, kei khawm amaa ka um zingna chu, ama chu tamtakin a ra hlak; ka ṭhang naw chun iengkhawm in thaw thei si nawh.
6Mi keimaah a um zing naw chun kâu anga peihâwnin a um a, a vuoi hlak; chun, an inkhâwm a, meiah an pei a, a kâng hlak.
7Nangni keimaa in um zing a, ka thu nangnia a um zing chun, in dit dit hni ro, in ta dingin thawin um pei a tih.
8Hi hi leiin ka Pa chu chawi- mawiin a um hlak, tamtaka in ra hin; chuongchun, ka închûktirhai nîng in tih.
9“Pain a mi hmangai ang bawkin kei khawmin ka hmangai cheu hi; ka ihmangaiin um zing ro.
10Nangnîn ka thupêkhai in zâwm chun ka ihmangaiin um zing in tih; keiin ka Pa thupêkhai ka zâwm a, a ihmangaia ka um zing ang bawk hin.
11Ka lâwm nangnia a um zingna ding le, in lâwm a kimna dingin hieng thu hi in kuomah ka hril hi.
12 #
Jn 13.34; 15.17; 1 Jn 3.23; 2 Jn 5 Hi hi ka thupêk a nih, keiin ka hmangai cheu ang bawkin, nangni inhmangai unla.
13Mihriemin a ruol ta dinga a hringna a pêk nêka hmangaina nasa lem tukhawmin an nei nawh.
14Thu ka pêk taphawt cheu in thaw chun, ka ruolhai nîng in tih.
15Suok ti nâwk ta naw ning cheu; a pu thilthaw suok chun a hriet si nawh; ruolhai ka ti ta lem cheu a nih. Pa kuoma inthawka thil ka hriet po po in kuomah ka puong ta sih a.
16Nangnîn in mi thlang nawh a, keiin ka thlang lem cheu a, va ra ding le in ra chu um zing dingin ka ruot bawk cheu a nih; ka hminga Pa kuoma in hni taphawt a pêkna ding cheuin.
17In inhmangai theina dingin hieng thu hi ka pêk cheu a nih.
Khawvêlin a theidana
18“Khawvêlin a theida cheu chun, a theida hma cheu khawmin kei a mi theida tah ti hre ro.
19Nangni khawvêla mi ni unla, khawvêlin amaa mi a hmangai ding bah; khawvêla mi in ni si nawh a, khawvêla inthawka ka thlang suok lem cheu leiin, khawvêlin a theida cheu a nih.
20 #
Mt 10.24; Lk 6.40; Jn 13.16 ‘Suok a pu nêkin a ropui nawh,’ ti thu ka hril ta cheu kha hre zing ro. Annîn kei an mi suknawmna ta chun, nangni khawm suknawmnâng an ti cheu; ka thu an zâwm ta chun nangni thu khawm zâwm an tih.
21Nisienlakhawm, hieng thil po po hi ka hming leiin in chungah thâwng an tih, keia mi tirtu an hriet naw leiin.
22Kei hungin an kuomah thu hril naw lang chu suol an nei naw ding bah; tu ruok hin chu an suol suonlam ding an nei ta naw a nih.
23Tûkhawm kei mi theida chun ka Pa khawm a theida a nih.
24Thil, mi dang tukhawm ithaw ngainawhai anni lai thaw naw lang chu, suol an nei naw ding bah; tu ruok hin chu annîn kei le ka Pa kan pahniin an mi hmu tah a, theida khawm an mi theida tah a nih.
25 #
Sm 35.19; 69.4 Ieng khawm ni sien, an Dân Lekhabuah, ‘Annîn a san boin an mi theida,’ ti thu ziek kha, a hung tlungna dingin an thaw a ni hi.
26“Chun, ka Pa kuoma inthawka Thlamuongtu in kuoma ka hung tir ding, Paa suok Thlarau indiktak chu, a hung tlung pha, ama chun ka thu inhriettir a tih;
27nangni khawmin inhriettir bawk in tih, a tîra inthawk ka kuoma in um leiin.
Currently Selected:
JOHAN 15: HMARCLBSI
Highlight
Share
Copy
Want to have your highlights saved across all your devices? Sign up or sign in
Hmar CL Bible - Pathien Lekhabu Inthieng
Copyright © Bible Society of India, 2015.
Used by permission. All rights reserved worldwide.
