INṬANNA 11
11
Babel In sâng thu
1Chun, hnuoia mi po po chu ṭawng hmunkhat le thu hril dân hmunkhat an ni vawng a.
2Chun, hieng hi a na, khawsak tienga an insawn pei lai chun Sinar ramah phaizâwl an hmu a; chutaka chun umhmun an khuor ta a.
3“Thaw ro, ṭêklei siem ei ta, ṭhatakin râwng ei tiu,” an inti tâwl a. Chuongchun, lung aiah ṭêklei chu an siem a, lungchârna aiah lawngchârna an nei bawk a.
4Chun, “Thaw ro, khawpui siem ei ta, in insâng a sîpin vân tawng dingin bâwl bawk ei tiu a, ei hming sukthang ei tiu; chuong naw chun hnuoi chung po poa hin sukdarin um râwi ei tih,” an in ti a.
5Chun, Lalpa chu mihriem nauhaiin khawpui le in insâng an siem vêl chu en dingin a zu ṭum a.
6Chun, Lalpa chun, “Ngai ta u, mihai hi pumkhat an ni a, an rêngin ṭawng hmunkhat an nei bawk si a; hi thil an thaw phut a ni hi; tuhin chu an thilthaw tum hrim hrim hi khappêk ruol ni ta naw ni hai.
7Thaw ro, zu fêng ei tiu a, ṭawng an inhriettuo thei nawna dingin an ṭawng zu suktumpêk ei tiu,” a ta.
8Chuongchun, Lalpain anni chu chutaka inthawk chun hnuoi chung po poa chun a sukdar ta a; chuongchun, an khaw siem khawm chu an tâwpsan ta a.
9Chuleichun, a hming chu Babel an ti a; Lalpain chutaka chun hnuoia mi po po ṭawng chu a suktumpêk ta leiin: chutaka inthawk chun Lalpain anni chu hnuoi chung po poa chun a sukdar ta bawk a.
Sem thlahai
(1 Chr 1.24-27)
10Hienghai hi Sem thlahai chu an nih: Sem chu kum za mi a niin tui lêt hnung kum hni hnunga chun naupasal Arpaksad a nei a:
11Chun, Arpaksad a nei hnung chun Sem chu kum za nga a la dam a, naunuhmei le naupasalhai a nei nâwk a.
12Arpaksad chun kum sâwmthum le panga a niin naupasal Selah a nei a:
13Selah a nei hnung chun Arpaksad chu kum za li le pathum a la dam a, naunuhmeihai le naupasalhai a nei nâwk a.
14Selah chun kum sâwmthum a niin naupasal Eber a nei a:
15Eber a nei hnung chun Selah chu kum za li le pathum a la dam a, naunuhmeihai le naupasalhai a nei nâwk a.
16Eber chun kum sâwmthum le pali a niin naupasal Peleg a nei a:
17Peleg a nei hnung chun Eber chu kum za li le sâwmthum a la dam a, naunuhmeihai le naupasalhai a nei nâwk a.
18Peleg chun kum sâwmthum a niin naupasal Reu a nei a:
19Reu a nei hnungin Peleg chu kum za hni le pakuo a la dam a, naunuhmeihai le naupasalhai a nei nâwk a.
20Reu chun kum sâwmthum le pahni a niin naupasal Serug a nei a:
21Serug a nei hnungin Reu chu kum za hni le pasari a la dam a, naunuhmeihai le naupasalhai a nei nâwk a.
22Serug chun kum sâwmthum a niin naupasal Nahor a nei a:
23Nahor a nei hnungin Serug chu kum za hni a la dam a, naunuhmeihai le naupasalhai a nei nâwk a.
24Nahor chun kum sâwmhni le pakuo a niin naupasal Tera a nei a:
25Tera a nei hnungin Nahor chu kum za khat le sâwm le pakuo a la dam a, naunuhmeihai le naupasalhai a nei nâwk a.
26Chun, Tera chun kum sâwmsari a niin naupasal Abram, Nahor le Haran a nei a.
Tera thlahai
27Chun, hienghai hi Tera thlahai chu an nih. Tera chun naupasal Abram, Nahor le Haran a nei a. Haran chun naupasal Lota a nei a.
28Haran chu a piengna rama Kaldaihai khuo Urah, a pa Tera hmaa chun a thi a.
29Chun, Abram le Nahor chun nuhmei an nei a; Abram nuhmei hming chu Sarai a ni a; Nahor nuhmei chu Haran naunu Milka a ni a, Milka chu Iska unaunu a nih.
30Chun, Sarai chu a ching a, nau hrim a nei naw a.
31Tera chun a naupa Abram le, a naupa naupasal (Haran naupa) Lota le, a mo, a naupa Abram nuhmei Sarai chu a ṭhuoi a; Kanaana fe dingin Kaldaihai khuo Ura inthawk chun an suok tlâng ta a; nisienlakhawm, Haran an hung tlung a, chutaka chun umhmun an khuor ta a.
32Tera dam sûng chu kum za hni le panga a nih; chun, Tera chu Harana chun a thi ta a.
Currently Selected:
INṬANNA 11: HMOVBSI
Highlight
Share
Copy
Want to have your highlights saved across all your devices? Sign up or sign in
Hmar OV (Re-edited) Bible (Millennium) - Pathien Lekhabu Inthieng
Copyright © Bible Society of India, 2016.
Used by permission. All rights reserved worldwide.
