KI KAM 14
14
Ha Ikoniom
1Kajuh ka la jia ha Ikoniom: U Paul bad u Barnabas ki la leit sha ka synagog bad ki la kren ha kata ka rukom ba kiba bun ki Jiw bad ki Jentil ki la kylla long ki riewngeit. 2Hynrei ki Jiw ki bym shym la ngeit ki la pynkhih ïa ki Jentil bad ki la pynlong ïa ki ban ïaleh pyrshah ïa riewngeit. 3Ki apostol ki la sah slem hangta, ki da kren shlur shaphang U Trai, uba la pynshisha ba ka khubor jong ki shaphang ka jingaiei ka long kaba shisha da kaba ai ha ki ka bor ban leh ki kambah bad ki kamphylla. 4Ki briew jong ka nongbah ki la long arliang: Katto katne ngut ki la long na ka bynta ki Jiw, kiwei pat na ka bynta ki apostol.
5Te katto katne ngut ki Jentil bad ki Jiw, ryngkat bad ki nongïalam jong ki, ki la ïakut ban lehbeiñ ïa ki apostol bad ban lynthem maw ïa ki. 6Haba ki apostol ki la tip shaphang kata, ki la phet sha ki nongbah Lystra bad Derbe kiba ha Lykaonia, bad sha ka thain ba-marjan. 7Hangta ki la ïalap ïa ka Khubor Babha.
Ha Lystra bad Derbe
8Ha Lystra, la don u briew uba dkhoh naduh ba dang kha bad u bym pat ju lah ban ïaid. 9U la shong hangta bad u la pynshahshkor ïa ki ktien jong u Paul. U Paul u la ïohi ba u la ngeit bad ba u lah ban ïohkhiah, kumta u la khmih shlip sha u bad u la ong ha ka sur kaba jam, 10“To ïeng beit ha la ki kjat jong me!” Uta u briew u la kynthih bad u la sdang ban ïaid kylleng. 11Haba ki paidbah ki la ïohi ïa kaei kaba u Paul u la leh, ki la sdang ban pyrta jam ha ka ktien Lykaonia jong ki, “Ki blei ki la wan long kum ki briew bad ki la wan hiar sha ngi!” 12Ki la khot ïa u Barnabas da ka kyrteng Seus, bad ïa u Paul da ka kyrteng Hermes, namar ba u long u nongkren uba kham ha khmat. 13U lyngdoh jong u blei Seus, uba ka templ jong u ka ïeng kham pajih shabar shnong, u la wallam ïa ki masi dab bad ki syntiew sha ka khyrdop, naba ma u bad ki paidbah ki la kwah ban ai ka jingkñia sha ki apostol.
14Haba u Barnabas bad u Paul ki la ïohsngew ïa kaei kaba kin sa leh, ki la kad ïa la ki jaiñphong bad ki la mareh sha pdeng u paidbah, da kaba pyrta, 15#Eks. 20:11; Salm. 146:6“Balei phi leh ïa kane? Ngi hi ngi long tang ki briew kiba kum ma phi! Ngi don hangne ban pynbna ïa ka Khubor Babha, ban pynphai noh ïa phi na kine kiei kiei ki bymmyntoi sha U Blei uba im, uba la thaw ïa ka bneng, ïa ka khyndew, ïa ka duriaw, bad ïa baroh kat kaba don ha ki. 16Ha ka por mynshuwa u la shah ïa ki briew baroh ban ïaid ha ka mon jong ki. 17Hynrei u la ïai ai ka sakhi ïa ka jingdon jong u da kiei kiei kiba bha kiba u leh: U ai ha phi ïa u slap na sahit bneng bad ïa ki jingthung ha ki por babiang; u ai ha phi ka jingbam bad u pyndap ïa ka dohnud jong phi da ka jingkmen.” 18Wat da kine ki kyntien, ki apostol da kaba jwat ki la lah ban khang ïa u paidbah na kaba ai jingkñia ha ki.
19Katto katne ngut ki Jiw ki la wan na Antiokh kaba ha Pisidia bad na Ikoniom; ki la ïoh ïa u paidbah sha ka liang jong ki, ki la lynthem maw ïa u Paul bad ki la paring ïa u shabar shnong, da kaba pyrkhat ba u la ïap. 20Hynrei haba ki parabangeit ki la ïalumlang sawdong ïa u, u la ïeng joit bad u la leit phai pat sha shnong. Ha ka sngi kaba bud ma u lem bad u Barnabas ki la leit sha Derbe.
Ka jingleit phai pat sha Antiokh kaba ha Syria
21U Paul bad u Barnabas ki la ïalap ïa ka Khubor Babha ha Derbe bad ki la ïoh bun ki synran. Nangta ki la leit phai pat sha Lystra, sha Ikoniom, bad nangta sha Antiokh kaba ha Pisidia. 22Ki la pynkhlaiñ ïa ki riewngeit bad pynshlur ïa ki ban ïaineh skhem ha ka jingngeit. “Ngi dei ban ïaid lyngba bun ki jingjynjar ban ïohrung sha ka Hima U Blei,” ki la hikai. 23Ha kawei pa kawei ka balang ki la thung ïa ki nongsharai balang, bad da ki jingduwai bad ka jingshah jingit ki la aiti ïa ki sha U Trai, ha uba ki la buh ïa la ka jingshaniah.
24Hadien ba ki la ïaid lyngba ïa ka thain jong ka Pisidia, ki la wan poi ha Pamphylia. 25Hangta ki la ïalap ïa ka khubor ha Perga bad nangta ki la leit sha Attalia, 26bad na kata ka jaka ki la leit pat da ka lieng sha Antiokh, ka jaka ha kaba la aiti ha ki ha ka jingsumar jong ka jingaiei jong U Blei na ka bynta ka kam kaba mynta ki la pyndep.
27Haba ki la poi ha Antiokh, ki la lumlang ïa ki briew jong ka balang bad ki la ïathuh ha ki ïa kaei kaei baroh kaba U Blei u la leh bad ki, bad kumno u la plie ka lynti na ka bynta ki Jentil ban ngeit. 28Bad ki la sah slem hangta bad ki riewngeit.
Currently Selected:
KI KAM 14: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
