KI KAM 6
6
Ki hynñiew ngut ki nongïarap
1Hadien katto katne por, katba ka jingdon ki synran ka nang ïai kiew, la don ka jingïania hapdeng ki Jiw kiba kren Grik bad ki Jiw kiba kren ktien tynrai. Ki Jiw kiba kren Grik ki la kam ba ïa ki riewkynthei la leh klet ha ka jingsam pisa kaba man ka sngi. 2Kumta ki khat-ar ngut ki apostol ki la khot lang ïa ka kynhun riewngeit baroh kawei bad ki la ong, “Kam long kaba dei ïa ngi ban leh klet ïa ka jingïalap ïa ka ktien U Blei khnang ban pynïaid ïa ka kam pisa tyngka. 3Kumta te, ko hynmen ko para, to jied hynñiew ngut ki rangbah napdeng jong phi ïa kiba la ithuh ba ki long kiba dap da U Mynsiem Bakhuid bad ka jingstad, bad ngin buh ïa ki ban khmih ïa kane ka kam. 4Ma ngi hi, te, ngin ai ïa ka por jong ngi baroh ha ka jingduwai bad ha ka kam ka jingïalap.”
5Ka kynhun baroh kawei ka la sngewbha ïa ka jingtyrwa jong ki apostol, kumta ki la jied ïa u Stephan, u briew uba dap da ka jingngeit bad da U Mynsiem Bakhuid, bad u Philip, u Prokhoros, u Nikanor, u Timon, u Parmenas, bad u Nikolas, u Jentil uba na Antiokh uba mynshuwa u la kylla sha ka niam Jiw. 6Ka kynhun ka la aiti ïa ki ha ki apostol, kiba la duwai bad buh ïa la ki kti halor jong ki.
7Bad kumta ka ktien U Blei ka la ïai saphriang. Ka jingdon jong ki synran ha Jerusalem ka la nang kiew bad nang kiew, bad bun bah ki lyngdoh ki la pdiang ïa ka jingngeit.
Ka jingkem ïa u Stephan
8U Stephan, u briew uba la kyrkhu eh da U Blei bad uba dap da ka bor, u la leh ïa ki kambah bad ki kamphylla hapdeng ki briew. 9Hynrei la pyrshah ïa u da katto katne ngut ki rangbah kiba long ki dkhot ka synagog jong ki briew kiba la laitluid (kumba la khot ïa ki), kaba kynthup ïa ki Jiw na Kyrini bad na Aleksandria. Ma ki bad kiwei pat ki Jiw na ki thain ka Kilikia bad Asia ki la ïasdang ban ïasaidnia bad u Stephan. 10Hynrei U Mynsiem u la ai ha u Stephan ïa ka jingstad kum kane ba haba u la kren, kim shym lah ban pynrem ïa u. 11Kumta ki la pynbam pisa ïa ki katto katne ki rangbah ban ong, “Ngi la ïohsngew ïa u ba u da kren pyrshah ïa u Moses bad pyrshah ïa U Blei.” 12Ha kane ka rukom ki la pynkhih ïa u paidbah, ïa ki tymmen ki san, bad ïa ki nonghikai ka hukum. Ki la kem ïa u Stephan bad ki la ïalam ïa u ha khmat ka Dorbar. 13Nangta ki la wallam katto katne ngut ki rangbah ban ïathuh lamler shaphang jong u. “Une u briew,” ki la ong, “u ïai kren borabor pyrshah ïa ka templ bakyntang bad ïa ka hukum u Moses. 14Ngi la ïohsngew ïa u ba u ong ba une U Jisu uba na Nasareth un sa pynkyllon ïa ka Templ bad pynkylla ïa ki rukom kiba la wan sha ngi lyngba u Moses!” 15Kita baroh kiba shong ha ka Dorbar ki la khmih shlip ha u Stephan bad ki la ïohi ba ka durkhmat jong u ka la long kum ka durkhmat jong u angel.
Currently Selected:
KI KAM 6: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
