JENESIS 13
13
U Abram bad u Lot ki ïakhlad
1U Abram u leit noh shaphang shatei na ka ri Ijipt sha ka phang bashathie jong ka ri Kanaan lem bad ka tnga jong u bad baroh kat kiba u don, bad u Lot u la leit lem bad u.
2U Abram u la long uba riewspah shibun, ha ka jingdon ïa ki langbrot bad ki blang, kumjuh ruh ha ka jingdon ïa ka rupa bad ka ksiar. 3Te u la mihnoh nangta bad u la ïaid na kawei ka jaka sha kawei pat, da kaba leit sha Bethel. 4U la poi ha kata ka jaka hapdeng ka Bethel bad ka Ai ha kaba u la sher dara mynshuwa, bad ba u la lah tei ïa ka duwan. Hangta u la mane ïa U Trai.
5U Lot ruh u la don ki langbrot, ki blang, ki masi, bad kumjuh ruh la ka jong ka longïing longsem bad ki shakri shakor. 6Kumta ka jaka bam phlang kam biang ïa ki baroh ar ngut ban ïasah ryngkat, namar ba ki don shibun eh ki jingri. 7Kumta la mih ka jingïakajia hapdeng ki nongap jingri jong u Abram bad ki nongap jingri jong u Lot. (Ha kata ka por ki Kanaan bad ki Peris ki dang shong ha kata ka ri.)
8Kumta u Abram u ong ha u Lot, “Ki briew jong me bad ki briew jong nga kim dei ban ïakajia, namar ngi ïalong shi ïing shi sem. 9Kumta te to ngin ïakhlad noh. Jied ïa kano kano ka bynta jong ka ri kaba me mon. Me leit shawei, bad nga ngan leit shawei pat.”
10 #
Jen. 2:10
U Lot u la khmih sawdong bad u la ïohi ba ka them Jordan baroh kawei haduh Soar, ka don kyrhai ka um, kum ka Kper jong U Trai lane kum ka ri Ijipt. (Kane ka long ha shuwa ba U Trai un pynjot ïa ka Sodom bad ka Gomorrah.) 11Kumta u Lot u jied ïa ka them Jordan baroh na ka bynta ïa lade bad u leit noh shaphang mihngi. Da kumta keiñ kine ar ngut ki la ïakhlad. 12U Abram u la shong la sah ha ka ri Kanaan, bad u Lot u la shong la sah hapdeng ki nongbah ha ka them 13bad u la sher dara hajan ka Sodom, kaba ki briew jong ka, ki la long kiba bymman bad kiba la leh pop pyrshah ïa U Trai.
U Abram u leit sha Hebron
14Hadien ba u Lot u la mihnoh, U Trai u ong ha u Abram, “Nangto naba me ïeng, peit bha baroh sawdong. 15#Ki Kam. 7:5Ngan ai ha me bad ha ki khun ki ksiew jong me ïa ka ri baroh kat kaba me ïohi, bad kan long ka jong me junom. 16Ngan ai ha me bun ki khun ki ksiew ba yn ym don mano mano ba lah ban ñiew ïa ki baroh; kan kham jem ban ñiew ïa ki phngit pui pui ha ka khyndew! 17Mynta, khie leit bad khmih ïa ka ri baroh kawei, naba ngan ai ïa ka baroh ha me.” 18Kumta u Abram u kynriah noh ïa la ka dara, bad u wan shong wan sah hajan ki dieng kyntang jong u Mamre ha Hebron, bad hangta u tei ka duwan ha U Trai.
Currently Selected:
JENESIS 13: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
