JENESIS 30
30
1Hynrei ka Rakhel kam shym ïoh khun na u Jakob, kumta ka la bishni ïa la ka hynmen, bad ka ong ha u Jakob, “Ai khun ïa nga, lane ngan ïap noh.”
2U Jakob u la sngewbitar ïa ka Rakhel bad u ong, “Ngam lah ban shim ïa ka jaka U Blei. Dei ma u uba khang ïa pha ban ïoh khun.”
3Ka ong, “Hangne ka don ka mraw jong nga ka Bilhah; thiah bad ka, ba kumta kan ïoh khun na ka bynta jong nga. Da kane ka rukom ngan ïoh long kmie lyngba jong ka.” 4Kumta ka ai ïa ka Bilhah ha u tnga jong ka, bad u la ïathiah shongkha bad ka. 5Ka Bilhah ka la punkhun, bad ka kha khun shynrang ïa u Jakob. 6Ka Rakhel ka ong, “U Blei u la bishar hok ïa nga. U la shahshkor ïa ka jingduwai jong nga bad u la ai khun shynrang ha nga”; kumta ka la khot kyrteng ïa u, u Dan. 7Ka Bilhah ka la punkhun biang, bad ka la kha khun shynrang uba ar ïa u Jakob. 8Ka Rakhel ka ong, “Nga la ïakhun ka jingïaleh kaba jwat bad la ka hynmen, hynrei nga la jop”; kumta ka la khot kyrteng ïa u, u Naphtali.
9Haba ka Leah ka sngewthuh ba ka la wai ban ïoh khun, ka la ai ïa ka mraw jong ka, ka Silpah ha u Jakob kum ka tnga jong u. 10Nangta ka Silpah ka la kha khun shynrang ïa u Jakob. 11Ka Leah ka ong, “Nga la long kaba donbok”; kumta ka la khot kyrteng ïa u, u Gad. 12Ka Silpah ka kha sa uwei pat u khun ïa u Jakob, 13bad ka Leah ka ong, “Katno nga long kaba kmen! Mynta ki kynthei kin khot ïa nga kaba kmen”; kumta ka la khot kyrteng ïa u, u Asher.
14Ha ka aïom ot kew, u Reuben u la leit sha lyngkha bad u lap ïa ki mandriek#30:14 mandriek: Kine ki dei ki jait jingthung ïa kiba la ngeit ba ki lah ban pynkoit ïa ka jinglyngki bad la ju pyndonkam kum ki jingpynshoh jingieit., kiba u la wanrah sha ka kmie jong u ka Leah. Ka Rakhel ka ong ïa ka Leah, “Ai lem katto katne ki mandriek jong u khun jong pha.”
15Ka Leah ka jubab, “Hato pham pat sngewhun ba pha la knieh noh ïa u tnga jong nga? Mynta pat pha pyrshang ban shim sa ïa ki mandriek jong u khun jong nga.”
Ka Rakhel ka ong, “Lada phan ai ïa nga ïa ki mandriek jong u khun jong pha, pha lah ban thiah bad u Jakob mynta ka miet.”
16Haba u Jakob u la wan na lyngkha ha ka por janmiet, ka Leah ka leit shaw ïa u bad ka ong, “Phi dei ban thiah bad nga mynta ka miet, namar nga la siewdor ïa phi da ki mandriek jong u khun jong nga.” Kumta u ïathiah shongkha bad ka ha kata ka miet.
17U Blei u jubab ïa ka jingduwai ka Leah, bad ka la punkhun bad ka kha ïa u khun uba san ïa u Jakob. 18Ka Leah ka ong, “U Blei u la ai ha nga ïa ka bainong jong nga, namar nga ai ïa la ka mraw ha la u tnga;” kumta ka la khot kyrteng ïa u, u Issakhar. 19Ka Leah ka la punkhun biang bad ka kha ïa u khun uba hynriew ïa u Jakob. 20Ka Leah ka ong, “U Blei u la ai ha nga ïa ka jingai kaba kordor. Mynta u tnga jong nga un sa pdiang ïa nga, namar nga la kha ïa u hynriew ngut ki khun shynrang”; kumta ka la khot kyrteng ïa u, u Sebulun. 21Hadien ka la kha khun kynthei, ïa kaba ka la khot kyrteng ïa ka, ka Dinah.
22Nangta U Blei u la kynmaw ïa ka Rakhel; u la jubab ïa ka jingduwai jong ka bad u la pynlah ïa ka ban ïoh khun. 23Kumta ka la punkhun bad kha khun shynrang. Ka ong, “U Blei u la shim noh ïa ka jahburom jong nga da kaba ai khun shynrang ïa nga. 24To U Trai un ai ïa nga sa uwei u khun”; kumta ka la khot kyrteng ïa u, u Joseph.
Ka jingïasaid jong u Jakob bad u Laban
25Hadien ka jingkha ïa u Joseph, u Jakob u ong ha u Laban, “Pyllait noh ïa nga, ba ngan ïoh leit phai noh sha la ïing. 26Ai ha nga ïa ki tnga jong nga bad ïa ki khun jong nga kiba nga la ïoh da kaba trei na ka bynta jong phi, bad ngan leit noh. Phi tip haduh katno nga la shakri hok ïa phi.”
27U Laban u ong ha u, “Shah ba ngan ong ïa kane: nga la ïoh jingtip da kaba wad na U Blei ba U Trai u la kyrkhu ïa nga namar jong me. 28To kheiñ ïa ka bainong jong me, bad ngan siew ïa ka.”
29U Jakob u jubab, “Phi tip kumno nga la shakri ïa phi bad kumno ki kynhun jingri jong phi ki la roi ha ka jingsumar jong nga. 30Kaba khyndiat kaba phi don shuwa ba ngan wan ka la roi kyrhai, bad U Trai u la kyrkhu ïa phi kat shaba nga leit. Mynta ka la dei ka por ïa nga ban peit sa na bynta ïa lade.”
31“Ngan siew aïu ïa me?” u Laban u kylli.
U Jakob u jubab, “Ngam donkam bainong ei ei. Ngan ïai bteng ban sumar ïa ki kynhun jingri jong phi lada phi mynjur ïa kane ka jingai jingmut: 32Shah ba ngan ïaid hapdeng ki kynhun langbrot jong phi mynta ka sngi bad ban shim ïa baroh ki khunlangbrot baïong bad ïa ki khunblang baroh kiba thohbria bad thohbroin. Kata kan long ka bainong kaba nga kwah. 33Hadien habud phin sa shem da kaba suk lada nga lah lehhok. Haba phin wan ban khmih ïa ka bainong jong nga, lada nga don ki blang ki bym thohbria bad ki bym thohbroin, lane kino kino ki khunlangbrot ki bym ïong, phin tip ba nga la tuh ïa ki.” 34U Laban u jubab, “Nga mynjur. Ngin leh kumba phi ai jingmut.” 35Hynrei ha kata ka sngi u Laban u shim noh ïa ki blang shynrang baroh kiba thohshuid bad kiba thohbroin, bad ïa ki blang kynthei baroh kiba thohbria bad kiba thohbroin, ne kiba thohlieh; u shim noh ruh ïa ki khunlangbrot baïong baroh. 36U phah peit ïa ki ha ki khun jong u, bad nangta u la leit noh na u Jakob lem bad kata ka kynhun langbrot ha ka jingjngai kumba lai sngi lynti. U Jakob u ai bam ai dih ïa ki kynhun jingri kiba dang sah jong u Laban.
37U Jakob u shim ïa ki tnat kiba dang im na ka dieng lieng, u diengsoh almond, bad u dieng Sning, bad u khoh snep ha katto katne jaka haduh ba ki tnat dieng kin da paw ka met lieh. 38U buh ïa kita ki tnat dieng ha khmat ki kynhun langbrot ha ki shyngoid dih um jong ki. U buh ïa ki hangta, namar ki langbrot ki ju ïa-pakor haba ki wan dih um. 39Kumta haba kita ki langbrot ki la seng khun ha khmat kita ki tnat dieng, ki kha ki khunlangbrot kiba thohshuid, kiba thohbria, bad kiba thohbroin.
40U Jakob u buh pynkhlad ïa ki langbrot na ki blang bad u pynphai ïa ki khmat jong ki sha kito kiba thohshuid bad kiba ïong na ka kynhun u Laban. Ha kane ka rukom u pynroi ïa la ka kynhun jingri bad u buh pynkhlad ïa ki na ka jong u Laban.
41Haba ki jingri kiba kham khlaiñ ki ïa-pakor, u Jakob u buh ïa ki tnat dieng ha khmat jong ki ha ki shyngoid dih um, ba kin dup seng khun hapdeng kita ki tnat dieng. 42Hynrei um shym buh ïa kita ki tnat dieng ha khmat ki jingri kiba kham tlot. Tang hapdeng khyndiat por u Laban u la ïoh ïa baroh ki jingri kiba tlot, bad u Jakob pat u ïoh baroh ki jingri kiba khlaiñ. 43Ha kane ka rukom u Jakob u kylla long uba riewspah eh. U la don shibun ki kynhun jingri, ki mraw, ki ut, bad ki kada.
Currently Selected:
JENESIS 30: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
