JENESIS 34
34
Ka jingshah batbor ka Dinah
1Ha kawei ka sngi ka Dinah, ka khun jong u Jakob bad ka Leah, ka la leit jngoh ïa ki katto katne ki kynthei Kanaan. 2Haba u Shekhem u khun jong u Hamor u jait Hib, uba long u khlieh jong kata ka thain, u la ïohi ïa ka, u la shim ïa ka, bad u la batbor ïa ka. 3Hynrei haba u shem ba ka samla ka long kaba i-ieit kat haduh ba u la ïapmat ïa ka, bad u la pyrshang ban ïoh ïa ka jingsngewieit na ka. 4U la ïathuh ha u kpa jong u, “Nga kwah ba phin pynïoh ïa ka Dinah kum ka tnga ïa nga.”
5U Jakob u la tip ba la pynkheiñ burom ïa ka khun jong u; hynrei namar ba ki khun shynrang jong u ki dang don sha ki pyntha bad la ki jingri, um shym leh ei ei tad haduh ba kin da wan phai. 6U Hamor u kpa jong u Shekhem u la leit ban ïakren bad u Jakob, hamar ba ki khun shynrang jong u Jakob ki la wan phai na ki pyntha. 7Haba ki ïohsngew shaphang kata, ki la kyndit bad bitar shla ba u Shekhem u la leh ïa kaba kum kane bad ba u la ibeiñ ïa ka jaitbynriew Israel da kaba batbor ïa ka khun jong u Jakob. 8U Hamor u ong ha u, “U khun jong nga u Shekhem u la ïapmat ïa ka khun jong phi; sngewbha shah ïa u ban shongkurim ïa ka. 9To ngin pynlong ka jingïateh kular ba kan don noh ka jingïashongkha khleh hapdeng jong ngi bad ki jong phi. 10Nangta phi lah ban shong ban sah hangne ha ka ri jong ngi; phi lah ban shong ban sah hangno hangno kat ha kaba phi kwah, phi lah ban khaïi laitluid, bad ban don la ka jong ka jaka ka puta.”
11Nangta u Shekhem u ong ha u kpa jong ka Dinah bad ha ki hynmen shynrang jong ka, “Sngewbha pdiang ïa kane ka jingkyrpad jong nga, bad kat kaba phi kwah ngan ai. 12Ong phi kwah aïu ngan ai, bad pynshongdor katba phi sngewbit ïa ka nongleitkurim, ngan ai ha phi kat kaba phi pan, tang lada phi shah ïa nga ban shongkurim ïa ka.”
13Namar ba u Shekhem u la pynkheiñ burom ïa ka Dinah ka para jong ki, ki khun shynrang jong u Jakob ki la phai ktien ïa u Shekhem bad u Hamor u kpa jong u da ka buit shukor. 14Ki ïa-ong, “Ngim lah ban ai ïa la ka jong ka para ba kan ïashongkurim bad u briew u bym shym la otsher; kata kan long ka jingjahburom ïa ngi. 15Ngin mynjur tang ha kane: ba phin long kum ma ngi da kaba ki shynrang jong phi baroh kin shah otsher. 16Te kumta ngin kohnguh ba kan don ka jingïashongkha khleh hapdeng jong ngi. Ngin shong ngin sah hapdeng jong phi, bad ngin ïalong kawei ka jaitbynriew bad phi. 17Hynrei lada phim pdiang ïa kaba ngi ong, bad phim shah otsher, ngin shim noh ïa ka bad ngin leit noh.”
18Kine ki kyndon ki ibit ibiang ïa u Hamor bad ïa u Shekhem u khun jong u, 19bad uta u samla ruh um shym la pynslem ban leh ïa kata kaba la ai jingmut, namar ba u la ibha eh ïa ka khun jong u Jakob. U long ruh uba donburom tam na ki ba-ha-ïing ha-sem jong u baroh.
20U Hamor bad u Shekhem u khun jong u ki la leit sha ka jaka long dorbar ha ka khyrdop shnong bad ki kren ha la ki para shnong; 21“Kine ki briew ki long kum ki paralok; ai ba kin shong kin sah bad ngi ha kane ka ri, bad kin leit kin wan laitluid. Ka ri ka long kaba kylluid bad kan biang ïa ki ruh. To ngin ïashongkurim bad ki khun kynthei jong ki, bad ngin ai ruh ïa la ki jong ba kin ïashongkurim bad ki. 22Hynrei kine ki briew ki kohnguh ban shong ban sah hapdeng jong ngi tang ha ka kyndon ba ngin otsher ïa ki shynrang jong ngi baroh, kumba ki ruh ki la shah otsher. 23Hato ki jingri jong ki bad baroh kaba ki don, kin ym long ki jong ngi? To ngin ïamynjur ba ki lah ban shong ban sah hapdeng jong ngi.” 24Baroh ki nongshong shnong jong kata ka nongbah ki la ïamynjur ïa kaei kaba u Hamor bad u Shekhem ki ai jingmut, bad baroh ki shynrang ki la shah otsher.
25Lai sngi hadien, katba kita ki rangbah ki dang ïa-ud pang na ka jingotsher jong ki, ar ngut na ki khun shynrang u Jakob, u Simeon bad u Lebi, ki hynmen shynrang jong ka Dinah, ki la shim ïa la ki waitlam bad ki leit rung shapoh ka nongbah, bad ki pynïap lut ïa ki shynrang baroh, kynthup ïa u Hamor bad u Shekhem u khun jong u. 26Nangta ki la ïalam noh ruh ïa ka Dinah na ïing u Shekhem, bad ki ïaleit noh. 27Hadien kata ka jingpynïap, kita kiwei pat ki khun shynrang jong u Jakob ki la lute ïa kata ka shnong ban pynhiarkput namar ka jingpynkheiñ burom ïa ka para jong ki. 28Ki la shim ïa ki kynhun jingri, ki jingri, ki kada, bad baroh katba don ha shnong bad ha lyngkha. 29Ki shim lut ïa kiba ishongdor, ki la kurup ïa ki kynthei bad ki khynnah baroh, bad ki rah lut kat kaba don hapoh ïing.
30Nangta u Jakob u ong ha u Simeon bad ha u Lebi, “Phi la pynjynjar ïa nga; ki Kanaan bad ki Peris, bad kat kiba don ha kane ka ri, mynta kin sa shun ïa nga. Ngam dei uba bun paid; lada ki ïa-tylli lang kawei pyrshah ïa nga, bad ki ïaleh ïa nga, ma nga bad ka ïing jong nga baroh ngin sa shah pynjot.”
31Hynrei ki jubab, “Ngin ym shah ban leh ïa ka para jong ngi kum ka nuti.”
Currently Selected:
JENESIS 34: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
