JENESIS 37
37
U Joseph bad la ki hynmen shynrang
1U Jakob u ïaishong ïaisah ha ka ri Kanaan, ha kaba u kpa jong u, u la shong la sah, 2bad kane ka dei ka khana shaphang ka longïing longsem jong u Jakob.
U Joseph, u samla uba la khathynñiew snem ka rta, u ap sumar ïa ki langbrot bad ki blang lem bad la ki hynmen shynrang jong u, ki khun shynrang jong ka Bilhah bad ka Silpah, ki tnga kliar jong u kpa jong u. U Joseph u wanrah ki jingïathuh bymsngewtynnat ha la u kpa shaphang kaei ba ki hynmen jong u ki leh.
3U Jakob u kham ieit ïa u Joseph ban ïa ki khun shynrang jong u baroh, namar ba la kha ïa u haba u la tymmen. U la suh ïa u kawei ka sopti jynsur kaba jrong kti. 4Haba ki hynmen shynrang jong u ki la ïohi ba u kpa jong ki u kham ieit ïa u Joseph ban ïa ki baroh, ki la isih shibun eh ïa u kat haduh ba kim kren bha kren miat shuh ïa u.
5Shisien u Joseph u la phohsniew, bad haba u la ïathuh ïa ka ha la ki hynmen shynrang, ki la kham isih shuh shuh ïa u. 6U ong, “Shahshkor ïa ka jingphohsniew jong nga. 7Baroh ngi ïadon lang ha lyngkha ba ngi ïateh song ïa u kew, ha kaba ka song jong nga ka khie joit bad ka ïeng beit. Ki song jong phi pat ki tawiar sawdong ïa ka song jong nga, bad ki ïanguh ïa ka.”
8“Hato me pyrkhat ba men sa long u syiem bad synshar ïa ngi?” Ki hynmen shynrang jong u ki ong. Kumta ki la nang kham isih shuh shuh ïa u namar ki jingphohsniew jong u bad namar kaei kaba ba u la kren shaphang jong ki.
9Nangta u Joseph u phohsniew sa kawei pat ka jingphohsniew, bad u la ïathuh ha la ki hynmen shynrang. “Nga la phohsniew sa kawei pat ka jingphohsniew, ha kaba nga la ïohi ïa ka sngi, u bnai, bad ïa ki khlur khatwei tylli ba ki ïanguh ïa nga.”
10U la ïathuh ruh ïa ka jingphohsniew ha la u kpa, bad u kpa jong u, u la mai ïa u, “Ka jingphohsniew aïu kaba kum kata? Hato me pyrkhat ba ka kmie jong me, ki hynmen shynrang jong me, bad ma nga ngin ïawan bad nguh ïa me?”
11 #
Ki Kam. 7:9
Ki hynmen u Joseph te ki la bishni ïa u, hynrei u kpa jong u, u ïai puson shaphang kata baroh.
La die noh ïa u Joseph bad la ïalam ïa u sha Ijipt
12Ha kawei ka sngi haba ki hynmen shynrang jong u Joseph ki leit ïalam bam phlang ïa ki jingri jong u kpa jong ki sha Shekhem, 13u Jakob u ong ha u Joseph, “Nga kwah ba men leit sha Shekhem, ha kaba ki hynmen shynrang jong me ki ap sumar ïa ki kynhun jingri.”
U Joseph u jubab, “Nga kloi.”
14U Kpa jong u, u ong ïa u, “Khie leit khmih la ki hynmen shynrang jong me ki suk ki saiñ bad la ki kynhun jingri ki bit ki biang ne em, nangta sa wan phai noh bad ïathuh ïa nga.” Kumta u kpa jong u, u la phah ïa u na ka them Hebron.
15U Joseph u poi ha Shekhem bad katba u dang ïaid sakma kylleng ïa ka shnong ha kaba uwei u briew u ïohi ïa u bad u kylli, “Phi wad ïano?”
16“Nga wad ïa la ki hynmen shynrang, kiba ap sumar ïa ki kynhun jingri jong ki,” u jubab. “Phi lah ban ïathuh hangno ki ïadon?”
17Uta u briew u jubab, “Ki la ïaleit. Nga la ïohsngew ba ki ong ba kin leit sha Dothan.” Kumta u Joseph u leit beh nadien jong ki bad u lap ïa ki ha Dothan.
18Na jngai ki la ïohi ïa u, bad katba un da poi hajan jong ki, ki lah da ïasylla pyrshah ïa u bad rai ban pynïap noh ïa u. 19Ki ïa-ong para ma ki, “Utai u nongphohsniew u la wan. 20Ale mynta to ngin ïa-pynïap ïa u, bad bret ïa ka met jong u ha kawei na ki pukri ba-tyrkhong. Ngi lah ban ong ba u mradkhlaw u la pynïap ïa u. Nangta ngin sa ïakhmih kan jia aïu ïa ki jingphohsniew jong u.”
21Haba u Reuben u la ïohsngew ïa ki, u la pyrshang ban pyllait im ïa u Joseph. “To ngin ym pynïap ïa u,” u ong. 22“Shu bret ïa u ha kane ka pukri hangne ha ka ri khlaw, hynrei wat pynmynsaw ïa u.” U ong kumta namar ba u mut ban pyllait im ïa u na ki, bad ban phah pat ïa u sha la u kpa. 23Haba u Joseph u wan ha la ki hynmen shynrang jong u, ki law noh ïa ka sopti jynsur jong u kaba jrong kti. 24Nangta ki la shim ïa u bad bret ïa u sha ka pukri, kaba la tyrkhong.
25Katba ki dang ïabam, kynsan ki la ïohi shi kynhun ki nong Ishmael kiba wan ïaid lynti na Gilead sha Ijipt. Ïa ki ut jong ki la pynkit ïa ki musli musla bad ki jingiwbih. 26U Judah u ong ha la ki hynmen ki para shynrang, “Kan myntoi aïu ïa ngi ba ngin pynïap noh ïa la u para bad buhrieh ïa ka kam pynïap briew? 27To ngin die noh ïa u ha kine ki nong Ishmael. Te ngim donkam ban pynmynsaw ïa u, naba u dei u para jong ngi, ka doh ka snam jong ngi hi.” 28#Ki Kam. 7:9Ki hynmen jong u ki ïamynjur, bad haba katto katne ki nongkhaïi na Midian ki ïaid lynti nangta, ki hynmen ki la sei noh ïa u Joseph na kata ka pukri bad ki la die noh ïa u ha kita ki nong Ishmael arphew tylli ki sbai rupa, bad ki ruh ki la ïalam noh ïa u sha Ijipt.
29Haba u Reuben u leit phai pat sha kata ka pukri bad shem ba u Joseph um don shuh hangta, u la kad ïa la ki jaiñ ha ka jingsngewsih. 30U leit phai pat sha la ki para, bad u ong, “U para um don shuh hangta! Ngam tip shuh ngan leh kumno.”
31Nangta ki la pynïap uwei 'langsohmoh bad ki wieh ïa kata ka sopti jong u Joseph ha ka snam jong u. 32Ki leit rah ïa kata ka sopti sha la u kpa, bad ki ong, “Ngi lap ïa kane. Khmih la ka dei ne em ka sopti u khun jong phi.”
33U ruh u ithuh ïa ka, bad u ong, “Ho-oid, ka dei ka sopti jong u! U mradkhlaw aïu re u la pynïap ïa u. Ïa u Joseph u khun jong nga la tar lyngkhot lyngkhai!” 34U Jakob u kad ïa la ki jaiñ ha ka jingsngewsih bad u kup da ka jaiñ khain. U la ïam sngewsih bun sngi na ka bynta u khun jong u. 35Ki khun shynrang bad ki khun kynthei jong u baroh ki la ïawan ban pyntngen ïa u, hynrei u kyntait ban shah pyntngen bad u ong, “Ngan leit noh sha ka ri kiba ïap bad ïai ïam sngewsih na ka bynta u khun jong nga.” Kumta u ïai ïam sngewsih na ka bynta u Joseph u khun jong u.
36Ha kajuh ka por, ha Ijipt, ki Midian ki la die noh ïa u Joseph ha u Potiphar, uwei na ki rangbah synshar jong u syiem, uba dei u kapten jong ki nongap phira ïa ka ïingsyiem.
Currently Selected:
JENESIS 37: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
