JENESIS 50
50
1U Joseph u dem kynsan ha ka met u kpa, u da ïam, bad doh ïa u. 2Nangta u Joseph u hukum ban kyllan jingiwbih ïa ka met u kpa jong u. Ki nongkyllan jingiwbih ruh ki leh kumta. 3Ki shim por sawphew sngi ban pyndep ïa ka, namar ka bam por katta ban kyllan jingiwbih ïa ka metïap. Ki nong Ijipt ki pynlong ka jingïambriew ïa u hynñiewphew sngi.
4Haba la kut ka por ïambriew, u Joseph u ong ha ki rangbah synshar u syiem, “Sngewbha rah ïa kane ka khubor sha u syiem: 5#Jen. 47:29-31‘Shuwa ba i pa in ïap, i la pynsmai ïa nga ba ngan leit tep ïa i ha ka jingtep ba i la pynkhreh ha Kanaan. Kumta shah ba ngan leit tep ïa i pa, bad hadien kata ngan sa wan phai pat.’ ”
6U syiem u jubab, “Khie leit, tep ïa la u kpa, kumba phi la kular ban leh kumta.”
7Kumta u Joseph u la leit ban tep ïa la u kpa. Baroh ki rangbah synshar jong u syiem, ki bakhraw batri na ka ïing jong u, bad ki bakhraw batri jong ka ri Ijipt, ki ïaleit ryngkat bad u Joseph. 8Ki ba-ha-ïing ha-sem jong u, ki hynmen ki para jong u, bad ki ba-ha-ïing ha-sem baroh jong u kpa jong u, ki ïaleit ryngkat bad u. Kiba sah ha Goshen ki long tang ki khun rit, bad ki langbrot, ki blang, bad kiwei kiwei de ki jingri jong ki. 9Ki briew kiba shong ha ki kali kulai bad ha ki kulai ruh ki ïaleit synran ïa u; kumta ka kynhun ka long kaba bun.
10Ynda ki poi ha ka jaka shoh kew kaba ha Atad, kaba sha mihngi na ka Jordan, ki ïapynlong hangta ïa ka jingïambriew kaba jur bad kaba kthang mynsiem; bad u Joseph u pyndep ïa ka jingïambriew ïa la u kpa sa hynñiew sngi.
11Haba ki Kanaan kiba shong ha kata ka ri ki ïohi ïa kita ki briew kiba ïambriew ha Atad, ki ïa-ong, “Kane ka rukom ïambriew ki nong Ijipt kaba da sngew lung mynsiem shisha!” Dei namar kata ba la khot kyrteng ïa kata ka jaka Abel Misraim.
12Kumta ki khun shynrang u Jakob ki leh kumba u la hukum ïa ki; 13#Ki Kam. 7:16ki la bah ïa ka met jong u sha Kanaan bad ki tep ïa ka ha kata ka krem kaba don ha ka lyngkha ha Makhpelah, sha mihngi na Mamre, kaba u Abraham u la thied na u Ephron u jait Hit ban pynlong jaka tep ïa ka. 14Ynda u Joseph u la lah tep ïa la u kpa, u leit phai pat sha Ijipt ryngkat bad la ki hynmen ki para lem bad kita baroh kiba leit ontep ïa u kpa jong u.
U Joseph u pynshngain ïa la ki hynmen
15Hadien ka jingïap u kpa jong ki, ki hynmen u Joseph ki ïa-ong, “Tip kan jia aïu keiñ lada u Joseph u dang buhnud bad thmu ban pynhiarkput ïa ngi namar ka kam sniew ba ngi la leh ïa u?” 16Kumta ki phah khubor sha u Joseph da kaba ong, “Shuwa ba i pa in ïap, i la bthah ïa ngi ban kyrpad ïa phi ba phin map ïa ka jingleh kam sniew jong ngi ïa phi. 17Kumta ngi kyrpad ïa phi ba phin map ïa ka kam sniew kaba ngi, ki shakri jong U Blei u kpa jong phi, ngi la leh.” U Joseph u ïam haba u ïohsngew ïa kane.
18Nangta ki hynmen jong u hi ki ïawan bad ki ïadem ngon ha khmat jong u. “Ngi long ki mraw jong phi,” ki ong.
19Hynrei u Joseph u ong ha ki, “Wat sheptieng; ngam lah ban buh ïa lade ha ka jaka jong U Blei. 20Phi shisha phi la thmu sniew ïa nga, hynrei U Blei u la pynphai ïa kata sha kaba bha, khnang ba bun ki briew kiba dang im mynta kin ïoh im namar kaba la jia. 21Phim donkam ban sheptieng. Ngan sumar sukher ïa phi bad ïa ki khun ki kti jong phi.” Kumta keiñ u la pynshngain ïa ki da ki ktien kiba sbun kiba ktah ïa ka dohnud jong ki.
Ka jingïap u Joseph
22U Joseph u shong u sah ha ka ri Ijipt bad ki ba-ha-ïing ha-sem jong u kpa jong u; u la ïap noh haba u la dap shispah shiphew snem ka rta. 23U la im haduh ba u da ïohi ïa ki khun bad ki ksiew jong u Ephraim, bad haduh ba u da ïohpdiang ïa ki khun jong u Makhir, u khun jong u Manasseh. 24Te u Joseph u ong ha la ki hynmen, “Nga la jan ïap, hynrei U Blei un ri un da ïa phi, bad un ïalam noh ïa phi na kane ka ri sha kata ka ri kaba u la kular skhem ha u Abraham, ha u Isaak, bad ha u Jakob.” 25#Eks. 13:19; Josh. 24:32; Heb. 11:22Nangta u Joseph u ong ïa la ki briew ban smai. “Kular ïa nga,” u ong, “ba ynda U Blei u ïalam noh ïa phi sha kata ka ri, phin rah lang ïa ka met jong nga nangne.” 26Kumta u Joseph u ïap ha Ijipt haba u la dap shispah shiphew snem ka rta. Ki kyllan jingiwbih ïa ka met jong u, bad hangta ha Ijipt ki buh ïa u ha ka synduk ïapbriew.
Currently Selected:
JENESIS 50: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
