तइरकर 8
8
सउलस कलीसियन सस्ती नन्दस
1सउलस स्तेफनोसिन पिटना नू हुँकारी नंजकाचस। अउलम येरुसलॆम ता कलीसिया गे कोड़हे खिलपत बरचा। तइरकारिन अम्बर जम्मर गोट्टा यूदेया राजी अरा समारिया राजी नू बींड़रर केरर। 2भगतर स्तेफनोसिन मंडियर चिच्चर अरा आस गे कोड़हे खोबरारर। 3लिकिन सउलस कलीसिया आबोन सस्ती नना लगियस। एड़पा एड़पा नू कोर्च कोर्च मुक्कारिन अरा मॆतारिन घिडराच घिडराच जेहेल नू सज'आ लगियस।#तइ 22:4,5; 26:9-11 4एकार छितिर बितिर मंजका रहचर आर एसन एसन केरर असन दौ कत्था तेंगा लगियर।
समारिया नू फिलिप्पोसी दौ कत्था तेंगा कुद्दना
5तहाँ फिलिप्पोस समारिया ता ओन्टा नगरे नू केरस ती अइय्या ता आलारिन मसीसी पत्त नू तेंगा लगियस। 6एकाबारी गोंहड़ा फिलिप्पोसी ब'अनन अरा आसी नंजका अजगुत नलख ही चिन्हा गुट्ठिन ईरियर ती आर आसी सिखाब'अनन चिहुंक लगे मेना लगियर। 7नॆखा नॆखा नू मलदौ बॊलता गुट्ठी रस्सकीचा, अबड़ा आर ती जॊरसरिया चिच्चियारनुम उरखा। अरा कैनो बग्गे लकवा बेमरहर अरा लेंगड़ा आलर कोड़े मंजर। 8औंगे आ नगरे ता आलर रिझ्र'आ लगियर।
सिमॊन टोन्हा
9सिमॊन नामे ही ओन्टा आलस आ नगरे नू रहचस। आस नस'आ लगियस ती समारिया ता आलारिन अकबक नना लगियस। अरा तंगन कोहाँ आल ब'आ लगियस। 10सन्नी कोहाँ उर्मी आलर आसी कत्थन मेना लगियर ती ब'आ लगियर, “ई आलस गुसन कोहाँ सवंग बारना धर्मेसी सवंग र'ई।” 11अरा आर आसी कत्थन मेना लगियर, एन्देरगेका आस नगदे उल्ला गूटी टोन्हा सवंग ती आरिन अनचका बाचका उइय्का रहचस। 12लिकिन धर्मेस आलारिन राजी नन्ना ही पत्त नू अरा येसु मसीसी नामे ही पत्त नू फिलिप्पोस दौ कत्था मेन्त'आ लगियस ख़ने, आर आसी कत्थन पत्ताचर ती मॆतर मुक्कर ओर्मर नॊड़रर। 13सिमॊनस हूँ पत्ताचस ती नॊड़रस ती आस फिलिप्पोसी गने गुड़ियारस। अरा आस फिलिप्पोस ती मंजका चिन्हा अरा कोहाँ अजगुत नलख गुट्ठिन ऎरा लगियस ती हैकटरस।
14तहाँ येरुसलॆम नू र'ऊ तइरकर मेंजर का समारिया ता आलर धर्मेसी कत्थन इंझ्रर ख़ने, आर पतरस अरा यॊहनसिन आर ही गुसन तइय्यर। 15आर इरबर असन केरर ती आर समारिया आलर गे नेम्हा बॊलतासिन ख़क्खा गे गोहरारर। 16अक्कु गूटी आर ही नू नॆख'आ मइय्याँ हूँ नेम्हा बॊलतस मल इत्तका रहचस। आर उर्बा येसु नामे ती नॊड़रका लेका रहचर। 17तहाँ पतरस अरा यॊहनस आर ही मइय्याँ ख़ेक्खा उइय्यर अरा आर नेम्हा बॊलतासिन ख़क्खियर।
18सिमॊनस ईरयस का तइरकर तम्है ख़ेक्खन आलर मइय्याँ उइय्नर ख़ने नेम्हा बॊलतासिन ख़क्खनर। ख़ने आस आर ही गुसन रुपिया ओन्द्रस, 19अरा बाचस, “एंगा हूँ ई सवंग आबोन चि'आ का ऎन नॆख'आ मइय्याँ ख़ेक्खा उइय्योन आर नेम्हा बॊलतासिन ख़क्खनर नेकअन।” 20लिकिन पतरस आसिन बाचस, “निंग्है रुपिया निंग्है गने नठार'आ नेकअन, एन्देरगेका नीन धर्मेसी इनाम आबोन रुपिया ती ख़क्खा गे सोचकय। 21ई पत्त नू निंगा एन्द्रा हूँ हिसा महले बटा मलकी, एन्देरगेका निंग्है जिया धर्मेसी मुन्दहारे उजगो मलकी। 22नीन निंग्है ई पाप गे जियन किर्त'आ अरा उर्बासिन गोहरार'आ होले, आस निंग्है ई मलदौ सोच आबोन छमा ननोस। 23ऎन ऎरदन का नीन इस्गहा ती निन्द्रका र'अदय अरा नीन पाप ही आकुस नू र'अदय।” 24ख़ने सिमॊनस आनाकिर्ताचस, “नीम एंगा गे उर्बस गुसन गोहरार'आ का नीम बाचकर अबड़ा कत्था ती एकदा हूँ एंग्है मइय्याँ अम्बो मना।” 25पतरस अरा यॊहनस तम्है गोवाह अरा उर्बासी कत्थन तिंका ख़ॊख़ा येरुसलॆम किर्रियर। अरा आर येरुसलॆम किर्रो बारी समारिया ही कैनो पद्दा नू दौ कत्था तेंगा कुद्दियर।
मंत्रीसी नॊड़रना
26फिन धर्मेसी पैकस फिलिप्पोसिन बाचस, “नीन चो'आ ती दखिन तरा येरुसलॆम ती गाजा काना ही टोड़ंग डहरे नू कला।” 27ख़ने आस चॊचस ती केरस। डहरे नू आस ओन्टा एथियोपिया ता करबेलवसिन ईरियस। आस एथियोपिया रानी कनदाकॆ ही मंत्री अरा खजानजी रहचस। आस येरुसलॆम महबा नना गे केरका रहचस। 28अरा अक्कु किर्रा लगियस। आस तंग्है रन्थ नू उक्कियस ती धर्मेसी कत्था तिंगू यसायासी पुथिन पढ़'आ लगियस। 29बॊलतस फिलिप्पोसिन बाचस, “कला ती रन्थ गने ऎका।”
30ख़ने फिलिप्पोस बुंगनुम आसी गुसन अंड़सियस अरा आसिन धर्मेसी कत्था तिंगू यसायासी पुथी पढ़नन मेंजस ती आसिन मेंजस, “नीन पढ़'आ लगदय अदिन बुझ्रदय का?” 31ख़ने आस बाचस, “नीकइम एंगन मल बुझाब'ओर होले ऎन एकासे बुझ्र'ओन?” तहाँ आस फिलिप्पोसिन अरगा ती तंग्है गने ओक्का गे मीख़ियस। 32आस नेम्हा पुथी ता ई भाग आबोन पढ़'आ लगियस,
“आस भेंडो बेसे पिटर'आ गे होतारस।
चुट्टिन खन्डुर ही मुन्दहारे कलेकसे र'ऊ भेंडो ख़द्दो बेसे
आस तंग्है बइय्यन मल चलख़स।
33आस ख़ाँड़तारस ख़ने आसी नेंवई दौ गने मना पोल्ला।
आसी बनस गुट्ठिन नॆ तंग्है तेंगा ओंगनर?
आसी उज्जना गा ख़ॆख़ेल ती चॊदतारकी किरकी रहचा।”#यसा 53:7,8
34आ मंत्रीस फिलिप्पोसिन बाचस, “नीन एंगन तेंगा का धर्मेसी कत्था तिंगुस इदन नॆख'आ पत्त नू तेंगा लगदस? तंग्है पत्त नू का नन्नर ही पत्त नू?” 35ख़ने फिलिप्पोस ब'आ हेलरस का नेम्हा पुथी ही ई कत्था ती ऒर नन्नुम येसुसी दौ कत्थन आस गे तिंगियस। 36आर कानुम कानुम ओन अड्डा नू अम्मु गुसन अंड़सियर। ख़ने मंत्रीस बाचस, “ऎरा, इसन अम्मु र'ई, एंगा नॊड़र'आ गे एन्देर बधा र'ई?” 37[फिलिप्पोस बाचस, “नीन सौंसे जिया ती पत्त'अदय होले नीन नॊड़र'आ ओंग्दय।” मंत्रीस बाचस, “ऎन पत्त'अदन का येसु मसीस धर्मेसी ख़द्दस हिकदस।”] 38ख़ने आस रन्थन इजत'आ गे आनियस। तहाँ फिलिप्पोस अरा मंत्रीस इरबारिम अम्मु नू इत्तियर अरा फिलिप्पोस आसिन नॊड़रताचस। 39आर अम्मु ती बहरी उरखर ख़ने, उर्बासी बॊलतस फिलिप्पोसिन चॊदस होच्चस। मंत्रीस आसिन अउर मल ईरियस। अरा आस तंग्है डहरे नू रिझ्रनुम केरस। 40लिकिन फिलिप्पोस असॊतोस नगरे नू ऎथ्रस। अरा आस कैसरेया अंड़सना गूटी उर्मी नगरे नू दौ कत्थन तेंगा लगियस।
Currently Selected:
तइरकर 8: KURUXBSI
Highlight
Share
Copy
Want to have your highlights saved across all your devices? Sign up or sign in
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
