लूकस 18
18
नेंवई ननुस अरा रड़ियाही ही जोक्खा ख़ीरी
1येसुस तंग्है चेलर गे मल हेन्दवारना ती सगरोम गोहरारते र'अना र'ई इदन तेंगा गे ई जोक्खा ख़ीरिन तिंगियस। 2“ओन्टा पद्दा नू ओर्त नेंवई ननुस रहचस, आस धर्मेसिन गा मल एल्चालियस अरा आलारिन हूँ मल गदन'आ लगियस। 3आ पद्दा नू ओर्त रड़ियाही आली रहचा। आ आली आस गुसन बरच बरच ब'आ लगिया, ‘एंग्है अरा एंग्है बैरीसी मझी ता नलखन नेंवई नना चि'आ।’ 4जोक्क उल्ला गूटी गा आस अदिन मल मेंजस, लिकिन ख़ॊख़ा तान तानिम बाचस, ‘ऎन धर्मेसिन मल एल्चदन अरा आलारिन हूँ मल गदन'अदन। 5अन्नु हूँ ई रड़ियाही आली एंग्है गुसन रेंघ'ई, अदगे ऎन अदिन नेंवई ननोन, होले आद घड़ी घड़ी बर'ओ ती एंगन अम्बन ख़ड़द'आ।’”
6उर्बस बाचस, “मेना ई मलदौ नेंवई ननुस एन्देर बाचस? 7होले एन्देर धर्मेस तंग्है चज्जिका आलारिन नॆ उल्ला माख़ा आसिन गोहरारते र'अनर आर गे नेंवई तिजाम मल ननोस का? एन्देर आस आर ही पत्त नू दिरी ननोस का? 8ऎन निमन ब'अदन, आस लॆम आरिन नेंवई ननोस। अन्नु हूँ मनवा ख़द्दन ऎन इकला फिन बर'ओन, आ बारी ख़ॆख़ेल नू एंगन पत्त'ऊ आलारिन ख़क्खोन का?”
फरिसीस अरा ऊज'उसी जोक्खा ख़ीरी
9फिन येसुस नॆ तमन उजगो मननर ती नन्नारिन ख़ाँड़नर आर ही पत्त नू ई जोक्खा ख़ीरिन तिंगियस। 10“ऎंड़ आलर धर्मेसी मन्दिर नू गोहरार'आ केरर। ओर्तोस फरिसीस अरा नन्नस ऊज'उस रहचस। 11फरिसीस गा इज्जस ती एन्ने गोहरारस, ‘अना धर्मे, ऎन निंगन धन्यवाद नन्दन का ऎन नन्ना आलर लेक्खा ख़ड़'ऊ, अरा मलदौ ननू अरा भडुवा मलदन महले ई ऊज'उस लेक्खा हूँ मलदन। 12ऎन हप्ता नू दुई हॆल उपास नन्दन, अरा ऎन एंग्है उर्मी अर्जाचका ही दसमांस हूँ चि'अदन।’ 13लिकिन ऊज'उस गेच्छम इज्जस ती मेर्ख़ा तरा मॆन ऎरा हूँ मल बिद्दियस, अन्ति तंग्है एवंख़न ठोकोर ठोकोर बाचस, ‘अना धर्मे! ऎन पपहा आलन मइय्याँ सोग्गे ऎरा।’ 14ऎन निमन ब'अदन, हूस मला ईस धर्मेसी ऎरना नू उजगो मनरकी एड़पा केरस। एन्देरगेका नॆ तंगन कोहाँ नन्दस आस सन्नी मन्तार'ओस। अरा नॆ तंगन सन्नी कम'ई आस कोहाँ मनतार'ओस।”#मत्ता 23:12; लूक 14:11
येसुस ख़द्दारिन बरकत नन्दस
(मत्ता 19:13-15; मर 10:13-16)
15उन्दुल जोक्क आलर ख़द्दारिन येसुस गुसन ओन्द्रर का आस ख़द्दर ही मइय्याँ तंग्है ख़ेक्खा उइयरकी आसीस ननोस। लिकिन चेलर इदन ईरियर ती येसुसिन अम्बोर थोकबोकामब'आ ब'अरकी आरिन केप्पर। 16लिकिन येसुस ख़द्दारिन तंग्है गुसन मीख़ियस ती बाचस, “ख़द्दारिन एंग्है गुसन बर'आ चि'आ, आरिन अमा छेक'आ, एन्देरगेका नॆ इबड़ा ख़द्दर लेक्खा तमन किइय्या ननोर आरिन धर्मेस राजी ननोस। 17ऎन निमन ओन्टा मानिम कत्था ब'अदन, एकासे ख़द्दर अयंग बंगर गे सोंपरनर, अन्नेम एका ओर्तर धर्मेस गे सोंपरनर आरिन दिम धर्मेस राजी ननोस।”#मत्ता 18:3
उरुब आलस अरा जनमजुग ही उज्जना
(मत्ता 19:16-30; मर 10:17-31)
18ओंग्होल ओर्त मुद्धस येसुसिन मेंजस, “अना गुरु, नीन दौ आलय हिकदय, एंगा धर्मेस गने जनमजुग ही उज्जना ख़क्खा गे एन्देर नन्ना मनो?” 19ख़ने येसुस आसिन बाचस, “नीन एंगन बॆस एन्देरगे ब'अदय?, धर्मेसिन अम्बरकी नॆ हूँ बॆस मलकर। नीन सोचदय का ऎन धर्मे हिकदन? 20आलारिन अमके पिटा, नन्ना आली गुसन अमके काला, अमके ख़ड़'आ, बेगर नू अमके ब'आ, निंग्है अयंग बंगन मईन नना, धर्मेसी इबड़ा पॆसकन नीन अख़दय।”#निर्ग 20:12-16; व्य 5:16-20
21ख़ने आस बाचस, “ऎन गा इबड़ा उर्मी पॆसकन ख़द्दपरिया ती मन'आ लगदन।” 22इदन मेंजस ती येसुस आसिन बाचस, “अन्नु हूँ नीन अक्कुन गूटी ओन्टा कत्थन मल नंजकादय, नीन निंग्है उर्मी खुर्जिन बीसरकी कीड़र गे ख़ट्टा चि'आ। फिन बरा अरा एंग्है गने चॊंख़्र'आ। होले निंगा मेर्ख़ा नू इनाम ख़क्ख्र'ओ।” 23आस इदन मेंजस ख़ने नगदे हेन्दवारस, एन्देरगेका आस नगदे उरुब रहचस।
24येसुस आसिन ईरियस ती बाचस, “नॆ नगदे खुर्जी उइय्दस आसिन धर्मेस गे राजी नना अजम ससइत मनो। 25एका ओर्तस तंग्है खुर्जी मइय्याँ भरसा उइय्दस आसिन धर्मेस राजी नन्ना ती ओन्टा ऊँट सुजी ही भोंका नू तुरदना सेब्बा र'ई।” 26ख़ने इदन मिनू आलर बाचर, “होले नॆ बछर'आ ओंगोर?” 27आस आरिन बाचस, “आलर ती गा ईद मना पुल्ली, लिकिन धर्मेस ती ईद मनो दिम।” 28ख़ने पतरस बाचस, “ऎरा, ऎम निंग्है चेला मन्ना चड्डे एंग्है उर्मिन अम्बकम।” 29आस आरिन बाचस, “ऎन निमन मानिम ब'अदन, एका ओर्तस धर्मेस आलारिन राजी नना गे तंग्है एड़पा पलिन महले तंग्आलिन महले तंग्है भइय्योरिन महले तंग्है अयंग बंगारिन महले तंग्है ख़द्द-ख़र्रान अम्बका चिच्का र'अनर। 30आर ई जुग नू कइय्यों गुना ख़क्खोर, अरा बरना जुग नू धर्मेस गने जनमजुग ही उज्जनन ख़क्खोर।”
तंग्है खे'अना ही पत्त नू येसुसी पारेंडमूद मुन्द तेंगना
(मत्ता 20:17-19; मर 10:32-34)
31तहाँ येसुस बारो चेलारिन तंग्है गुसन मीख़ियस ती बाचस, “ऎरा, नाम येरुसलॆम कादत, अरा एवंदा कत्था मनवा ख़द्दन एंगा पत्त नू धर्मेसी कत्था तिंगुर ती लिख्रकी र'ई अबड़ा जम्मा मनो। 32एन्देरगेका नॆ यहूदी मलकर आर ही ख़ेक्खा नू ऎन सोंपतार'ओन क'ओन। अरा आर एंगन लज्जे मॊख़त'ओर अरा हींड़ोर, अरा एंग्है मइय्याँ तुप्पोर। 33अरा एंगन कोर्रा ती ल'ओर अरा पिटोर। अरा तिसर उल्ला ऎन उज्जा चो'ओन।” 34लिकिन आर इबड़ा कत्था गुट्ठिन ओन्टा हूँ मल बुझ्रर, अरा इबड़ा कत्था आर ती नुख़्रकी रहचा। अरा एन्देर बातारकी रहचा अबड़ा ही मनेन आर अख़अम बल्लर।
येसुस अन्धहा तिम्बुसिन कोड़े नन्दस
(मत्ता 20:29-34; मर 10:46-52)
35येसुस येरिहॊ नगरे हेद्दे अंड़सियस ख़ने, असन ओर्त अन्धहस सड़क हेद्दे ओक्करकी तेम्बा लगियस। 36आस गोंहड़ा ही ऎकना ही अरोन ख़क्खियस ख़ने आलारिन मेंजस, “ईद एन्देर मना लगी?” 37अबड़र आसिन तिंगियर, “नासरेत ता येसुस कट्टालदस।” 38ख़ने आस चिच्चियारस ती बाचस, “अना येसु! दाऊदसी ख़द्दायो#18:38 इसन ख़द्दस माने बनस।! एंगन सोग्गे ऎरा।” 39गोंहड़ा ही मुन्द र'ऊ आलर आसिन दन्दकाचर ती बाचर, “कलेकसे र'आ।” लिकिन आस अउरिम चिच्चियारस, “अना दाऊदसी ख़द्दायो! एंगन सोग्गे ऎरा।” 40ख़ने येसुस इज्जस ती आनियस, “आसिन एंग्है गुसन ओन्द्र'आ।” अरा आस हेद्दे बरचस। ख़ने येसुस आसिन मेंजस, 41“नीन एन्देर बेद्ददय का निंगा गे ऎन ननोन?” आस बाचस, “अना उर्बायो, ऎन ऎरा बेद्ददन।” 42येसुस आसिन बाचस, “ऎरा हो'आ, नीन उजगारकय एन्देरगेका नीन एंगन पत्ताचकय।” 43अरा आस आ बारिम ऎरा उंगियस, अरा धर्मेसी ओहमा नन्नुम येसुसी ख़ॊख़ा चॊंख़्रस। अरा ओर्मर इदन ईरियर ती धर्मेसी ओहमा नंजर।
Currently Selected:
लूकस 18: KURUXBSI
Highlight
Share
Copy
Want to have your highlights saved across all your devices? Sign up or sign in
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
