लू‍कस 20

येसुसी आकुस ही पत्त नू मेन्ना

(मत्ता 21:23-27; मर 11:27-33)

1उन्‍दुल येसुस धर्मेसी मन्दिर ही चाली नू आलारिन सिखाब'आ लगियस अरा दौ कत्‍था मेन्‍त'आ लगियस ख़ने, मुध नैगर अरा नॆग सिखाब'उर अरा सेयान आलर आसी गुसन बरचर। 2अरा आसिन बाचर, “इबड़ा नलखन नीन नॆखा आकुस ती नन्‍दय, अरा निंगा इबड़न नन्ना ही आकुस नॆ चिच्‍चा? अदिन एमन तेंगा।” 3आस आरिन आनाकिर्ताचस, “ऎन हूँ निमन ओन्‍टा कत्‍था मेन्‍दन अदिन तेंगा। 4यॊहनस गे नॊड़रत'अना ही आकुस धर्मेस चिच्‍चस का आलर चिच्‍चर?”

5ख़ने आर ई पत्त नू ताम तामिम कछनख्रर। अरा बाचर “नाम धर्मेस आकुस चिच्‍चस अन्ने ब'ओत होले, आस ब'ओस अन्नु हूँ नीम एन्‍देरगे यॊहनसिन मल पत्ताचकर? 6अरा आलर आकुस चिच्‍चर एन्ने ब'ओत होले, ओर्मा आलर नमन पखना ती लोड़ग'ओर। एन्‍देरगेका आर पत्ताचर का यॊहनस धर्मेसी कत्‍था तिंगुस रहचस।” 7औंगे आर किर्त'अर बाचर, “ऎम बलदम का आद एका तरती रहचा।” 8ख़ने येसुस आरिन बाचस, “नीम एंगन मल तिंकर औंगे ऎन हूँ निमन मल तेंगोन इबड़ा नलखन नॆखा आकुस ती नन्‍दन।”

मलदौ उर्बर ही जोक्‍खा ख़िरी

(मत्ता 21:33-46; मर 12:1-12)

9तहाँ येसुस आलारिन ई जोक्‍खा ख़ीरिन तेंगा हेलरस।#यसा 5:1 “ओर्त आलस ओन्‍टा अंगुर ही बटकी कमचस, अरा उर्बर गे अदिन ठिका चिच्‍चस। अरा तान बग्‍गे उल्‍ला गे नन्न राजी केरस। 10फिन आस पानना ही बेड़ा नू ठिका होच्चका उर्बर गुसन अंगुर ही जोक्‍क ख़ंजपा ओन्‍द्र'आ गे ओन्‍टा जॊंख़ासिन त‍इय्‍यस। लिकिन उर्बर आसिन लौचर दरा नीदी त‍इय्यर। 11फिन आस नन्ना जॊंख़ासिन त‍इय्यस। आसिन हूँ आर लौचर दरा आसिन लज्‍जे मॊख़ताचर ती नीदी त‍इय्यर। 12फिन आस तिसरसिन त‍इय्यस। अरा अबड़र आसिन हूँ कुहुरकुट्टा लौचर दरा ओथ्रर चिच्‍चर। 13तहाँ बटकी उर्बस बाचस, ‘ऎन एकासे ननोन? ऎन एंग्‍है चोन्‍हा ख़द्दासिन त‍इय्योन, होले आर आसिन म‍ईन ननोर दने।’ 14लिकिन उर्बर तंग्‍दासिन ईरियर ती ताम ताम कछनख्र'आ हेलरर, ‘ईस गा ज‍ईपुंई र'अदस, बरा, ईसिन पिटोत, होले बटकी नम्‍है दिम मनो।’ 15अरा आर आसिन अंगुर बटकी ती बहरी ओथ्रर ती पिटियर। अन्‍ति बटकी उर्बस आरिन एन्‍देर ननोस? 16आस बर'ओस ती इबड़ा बटकी ठिका होच्चका उर्बारिन पिटोस, अरा अंगुर बटकी ही ठिका नन्‍ना उर्बर गे चि'ओस।” इदन आलर मेंजर ती बाचर, “धर्मेस एन्ने अम्‍बन नना नेक‍अन।”

17फिन येसुस आर ही तरा ऎररकी बाचस, “फिन ईद एन्‍देर नेम्हा पुथी नू लिख्रकी र'ई?#भज 118:22,23

‘एका पखना आबोन राजमिस्‍त्रिर तरकूटी ताड़चका रहचर,

आ पखना दिम गोट्टा एड़पन बड़ियर ननू पखना मंजा केरा।’

18आ पखना नू खत्तर'ओर अबड़ा ओर्मर कुटकूटा मनोर क'ओर, अरा नॆखा म‍इय्याँ आद खत्तर'ओ आरिन ख़ोसो चि'ओ।”

19आ बारिम नॆग सिखाब'उर अरा मुध नैगर आसिन धर'आ बेद्दा लगियर, एन्‍देरगेका आर बुझुर ख़च्चिका रहचर का येसुस आर ही बिड़दो ई जोक्‍खा ख़ीरिन बाचकाचस। लिकिन आर आलारिन इल्‍चियर।

बॆलस कैसरस गे टिकस चि'अना

(मत्ता 22:15-22; मर 12:13-17)

20औंगे आर ताक ऎरर अरा जोह'ऊ आलारिन त‍इय्यर का धरम ही भेंस ननोर ती येसुसी एक‍अम कत्‍थन धर'ओर ती आसिन राजीख़ापुसी ख़ेक्खा नू अरा आसी अदिया नू चि'ओर। 21अबड़ा जोह'ऊ आलर येसुसिन मेंजर, “अना गुरु! ऎम अख़दम का नीन मानिम आबोन ब'अदय अरा सिखाब'अदय, अरा तीना मल ख़ाँड़दय, लिकिन धर्मेसी डहरेन मानिम गने सिखाब'अदय। 22एन्‍देर कैसरस गे टिकस चि'अना ठौका र'ई का मला?” 23आस आर ही चतरन अक्‍खस ती आरिन बाचस, 24“ओन्‍टा रोमी ढिबन एंगन ऎद'आ। इय्या नॆखा छपा अरा नामे र'ई?” आर बाचर, “कैसरसी।” 25ख़ने आस आरिन बाचस, “होले कैसरस गे एन्‍देर चि'अना र'ई, अदिन कैसरस गे चि'आ, अरा धर्मेस गे एन्‍देर चि'अना र'ई, अदिन धर्मेस गे चि'आ।” 26ई लेक्‍खा आर आलर ही मझी नू आसी बाचकन धर'आ पोल्‍लर, अरा आसी आनाकिर्ताचका ती अनचकरर अरा कलेकले मंजर केरर।

सदुकीर उज्‍जा चो'अना ही पत्त नू मेन्ना

(मत्ता 22:23-33; मर 12:18-27)

27तहाँ केचका ख़ॊख़ा उज्‍जा चो'अना र'अम मलकी ब'ऊ जोक्‍क सदुकीर#20:27 सदुकी यहूदी समाज ता ओन यहूदी धरम खोंड़हा हवे। येसुस गुसन बर'अरकी मेंजर,#त‍इ 23:8 28“अना गुरु! मूसस एमा गे एन्ने पॆसका चिच्‍चस का एकअम ओर्तस बिगर ख़द्द-ख़र्रा ही खे'अदस कादस, अरा आसी तंग्‍आली बछरकी र'ई होले, आसी भइय्योस अदिन बेंज्रना ती केचका तंग्‍है भइय्योस गे ख़द्द कुन्‍द्रत'अना र'ई।#व्य 25:5 29ओंग्‍होन सात भइय्योर रहचर। कोहँस बेंज्र'अरकी बिगर ख़द्द-ख़र्रा ही केच्‍चस केरस। 30ख़ने मझलस अदिन बेंज्रस। 31अरा सझलस अदिन बेंज्रस। अरा अन्नेम सतियो भइय्योर अदिन ओरोत ही ख़ॊख़ा ओरोत बेंज्रर ती जम्मर बिगर ख़द्द-ख़र्रा ही केच्‍चर। 32छेद्दे नू आ आली हूँ केच्‍चा केरा। 33होले केचकन्‍ती उज्‍जा चो'अना नू आद नॆखा मुक्‍का मनो? एन्‍देरगेका सतियो झन अदिन बेंज्रकाचर।”

34येसुस आरिन बाचस, “ख़ॆख़ेल नू आलर बेंज्रनर अरा बेंजनर। 35लिकिन एका ओर्तर केचकन्‍ती उज्‍जा चो'अना ती मेर्ख़ा राजी नू उज्‍जा गे जॊगे मनोर, आर मल बेंज्र'ओर अरा मल बेंजोर। 36अरा आर फिन इकला हूँ मल खे'ओर, आर उज्‍जा चो'अना ही ख़द्द मंजर, ख़ने आर मेर्ख़ा पैकर लेक्‍खम र'ओर, अरा धर्मेसी ख़द्दर मनोर। 37लिकिन केचका आलर उज्‍जा चो'ओर। मूसस हूँ लघरना ख़ोप्‍पा ही कत्‍था ती इदन ऎद्ददस। अइय्या आस उर्बासिन अब्राहमसी धर्मे, इसाकसी धर्मे अरा याकॊबसी धर्मे एन्ने मॆख़दस।#निर्ग 36 38धर्मेस गा केचका आलर ही मला, उज्‍जना आलर ही धर्मेस हिकदस, एन्‍देरगेका आस नू जम्मर उज्‍जनर।” 39ख़ने जोक्‍क नॆग सिखाब'उर बाचर, “अना गुरु! नीन दौ बाचकय।” 40अरा इदही ख़ॊख़ा आर गे येसुसिन इन्द्रिइम मेना गे डिढ मल मंजा।

येसुस ब'अदस मसीस दाऊदस ती कोहाँ हिकदस

(मत्ता 22:41-46; 23:1-36; मर 12:35-40; लूक 11:37-54)

41तहाँ येसुस आरिन मेंजस, “आलर एन्‍देरगे मसीसिन दाऊदसी बनस ब'अनर? 42दाऊदस तानिम अस्सना-पाड़ना डंडी ही पुथी नू बाचस,#भज 110:1

‘धर्मे उर्बस एंग्‍है उर्बासिन बाचस का

नीन एंग्‍है तीना पक्‍के ओक्‍करकी एंग्‍है गने राजी नना,

43ऎन निंग्‍है बैरीरिन नास नंज ख़च्‍चोन।’

44दाऊदस गा तानिम आसिन उर्बस ब'अदस, होले आस दाऊदसी पिड़ही ता लेका मला आसी उर्बस हूँ हिकदस।”

45उर्मी आलर मेना लगियर ख़ने येसुस तंग्‍है चेलारिन बाचस, 46“नॆग सिखाब'उर ती चिहुंक र'आ। आर दिगहा किचरी अत्तरकी कुद्दका कुद्दनर, अरा बजार टोंका गुट्ठी नू मोंजरा ख़क्‍खा गे बेद्दनर। आर गोड़हा एड़पा गुट्ठी नू मुध मचिया गुट्ठिन अरा मदी गुट्ठी नू म‍ईन अड्डा गुट्ठिन ख़क्‍खा गे बेद्दनर। 47आर रड़ियाहीर ही एड़पन अमल'अनर, अरा आर धरम नू तमन कोहाँ ऎद'आ गे दिगहा दिगहा बिन्‍ती नन्‍नर। धर्मेस आर गे कोड़हे दंडे चि'ओस।”

Currently Selected:

लू‍कस 20: KURUXBSI

Highlight

Copy