GENESIS 11
11
Babel Insang
1Huan lei a mi tengteng in pau khat leh paudan khat anei uhi. 2Huan hichi ahong hi a, suahlam a kipan akisuan zel lai un, Shinar gam ah phaizang amu ua; huai ah atengta uhi. 3“Kisa un, teklei i bawl ding a, hoihtak in i hal ding,” akichita uhi. Suang sik in teklei anei ua, suang hukna sik in longnai anei uhi. 4“Kisa un, khopi i bawl ding a, avum in van sun ding in insang i bawl ding ua, i min i thangsak ding uh. Huchi lou in zaw leitung pumpi ah thehdalh in i om kha ding,” achi uhi. 5Mite tate' khopi leh insang lam en ding in Toupa ahohsuk hi. 6Toupa'n, “Ngai dih ua, mite pum khat ahi ua, avek un lah pau khat anei ngal ua; hiai thil ahih pan uhi. Tu'n zaw athil hihtupte uh leng kham vual ahita kei ding. 7Kisa un, i va hohsuk ding ua, pau akitheihtuah louhna ding un, apau uh i va suk lamdangsak ding,” akichi uhi. 8Huchi in Toupa'n amaute huai a pan leitung tengteng ah adalhsak hi. Huchi in akhopi bawl uh atawpsanta uhi. 9Huaiziak in amin Babel achi ua; Toupa'n leitung tengteng ah amaute adalhsakta hi.
Shem Suante
(1 Kro 1.24-27)
10Hiaite Shem suante ahi uh. Shem kum zakhat a upa ahi a; tuichim tun nung kum nih nung in tapa Arpakshad anei hi. 11Arpakshad aneih nung in Shem kum zanga adam lai a, tanute leh tapate anei lai hi. 12Arpakshad in kum sawmthum-le-nga ahih in tapa Shelah anei hi. 13Shelah aneih nung in Arpakshad kum zali-le-thum adam lai a, tanute leh tapate anei lai hi. 14Shelah in kum sawmthum ahih in tapa Eber anei hi. 15Eber aneih nung in Shelah kum zali-le-thum adam lai a, tanute leh tapate anei lai hi. 16Eber in kum sawmthum-le-li ahih in tapa Peleg anei hi. 17Peleg aneih nung in Eber kum zali-le-sawmthum adam lai a, tanute leh tapate anei lai hi. 18Peleg in kum sawmthum ahih in tapa Reu anei hi. 19Reu aneih nung in Peleg kum zanih-le-kua adam lai a, tanute leh tapate anei lai hi. 20Reu in kum sawmthum-le-nih ahih in, tapa Serug anei hi. 21Serug aneih nung in Reu kum zanih-le-sagih adam lai a, tanute leh tapate anei lai hi. 22Serug in kum sawmthum ahih in tapa Nahor anei hi. 23Nahor aneih nung in Serug kum zanih adam lai a, tanute leh tapate anei lai hi. 24Nahor in kum sawmnih-le-kua ahih in tapa Terah anei hi. 25Terah aneih nung in Nahor kum za-le-sawmkua adam lai a, tanute leh tapate anei lai hi. 26Terah in kum sawmsagih ahih in tapate Abram, Nahor leh Haran anei hi.
Terah Suante
27Hiaite Terah suante ahi ua: Terah in tapa Abram, Nahor leh Haran anei a; Haran in tapa Lot anei hi. 28Haran ahihleh apianna gam, Kaldaite khua Ur ah, apa Terah ma in asi hi. 29Abram leh Nahor in zi anei ua; Abram zi min Sarai ahi a, Nahor zi min Haran tanu Milkah ahi. Haran ahihleh Milkah pa leh Iskah pa ahi. 30Sarai achiing a; ta himhim anei kei. 31Terah in atapa Abram, atapa Haran tapa Lot, amou, atapa Abram zi Sarai api a; Kanaan a hoh ding in Kaldaite khua Ur a kipan apawtkhekhawm uhi. Haran ahong tung ua, huai ah ateng uhi. 32Terah damsung kum zanih-le-nga ahi a, Haran ah Terah asi hi.
Currently Selected:
GENESIS 11: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
