GENESIS 17
17
Thukhun Chiamtehna Zeksum
1Abram kum sawmkua-le-kua a upa ahih in, Abram kiang ah Toupa akilak a, akiang ah, “Kei Pathian Bangkim hihthei ka hi; ka ma ah pai inla, hoihkim in om in. 2Nang toh i kal ah thu ka khung ding a, nakpitak in ka hon pungsak ding,” achi hi. 3Abram abokkhup a; Pathian in amah ahoupih hi. 4“Ngai in, ke'n zaw, na kiang ah ka thukhun ahi ka khun, nam tampite' Pa na hita ding. 5Na min leng Abram ahi nawnta kei ding a, na min Abraham ahi zawta ding; nam tampite' Pa ding a ka hon bawl tak ziak in. 6Nakpitak in ka hon chiphasak ding a, nang ah nam tampi ka bawl ding a, nang a kipan kumpipate ahong piangkhe ding uh.
7“Kei leh nang leh na suante, suan sawnsawnte tan in leng ka thukhun nang a ding leh na nung a na suante a ding a, a Pathian uh hi ding in, tangtawn thukhun ding in ka hihkip ding hi. 8Na kiang ah leh na nung a na suante kiang ah mikhual na hihna gam, Kanaan gam tengteng, tangtawn gou ding un ka hon pe ding, kei a Pathian uh ka hi ding,” achi hi.
9Pathian mah in Abraham kiang ah, “Nang ka thukhun na zui ding ahi. Na nung a na suante suan sawnsawnte tan in leng azui ding uhi. 10Hiai kei leh nang leh na suante kal a ka thukhun na zuih ding uh ahi. Na lak ua pasal peuhmah in zek asum ding ahi. 11Na zekvun sa uh na sum ding ua, huai tuh nang toh i kal a thukhun chiamtehna ahi ding hi. 12Na lak ua kuapeuh ni giat a upa, na suan sawnsawn tan un leng, na suan hi chitchiat lou leng na inn a piang hiam, mikhual kuapeuh a kipan dangka sum a na lei hiam leng, pasal peuhmah zek sum ding ahi. 13Na inn a piang leh na dangka sum a na leite leng zeksum ngeingei ding ahi. Ka thukhun tangtawn thukhun ding in na sa ah a-omta ding hi. 14Pasal zeksum louh leh azekvun sa a zeksum a om lou, achipihte lak a kipan satkhiak ahi ding; ama'n ka thukhun hihsia ahi,” achi nawn hi.
15Pathian mah in, Abraham kiang ah, “Na zi Sarai, amin Sarai na chi nawnta kei ding a, amin Sarah ahi zawta ding hi. 16Amah ka vualzawl ding a, huai lou leng amah ah tapa ka hon pe ding. Ahi, amah ka vualzawl ding a, namte nu ahita ding. Amah a kipan nam tuamtuam kumpipate ahong om ding uh,” achi hi. 17Abraham abokkhup a, anui a, alungsim in mi kum za a upa in ta anei ding maw? Sarah kum sawmkua a upa in ta anei ding maw? achi hi. 18Abraham mah in Pathian kiang ah, “Na ma ah Ishmael om thei maileh aw,” achi hi.
19Pathian in, “Hilou e, na zi Sarah in tapa ahon neihsak taktak ding a; amin Isak na sak ding ahi. Ka thukhun, anung a asuante a ding in tangtawn thukhun ding in akiang ah ka hihkip ding. 20Ishmael tungthu leng ka hon ngaihkhiaksak hi. Ngai in, amah ka vualzawlta a, chi tampi ka suangsak ding hi. Nakpitak in leng ka pungsak ding a, ama'n vaihawmmi sawm-le-nih asuang ding a, amah chi thupitak in ka bawl ding hi. 21Himahleh ka thukhun, Sarah in kum nawn hichi hun a ahon neihsak ding Isak kiang ah ahi ka hihkip ding,” achi hi. 22Akiang a thugen azoh in, Pathian in Abraham apaitouh santa hi.
23Abraham in atapa Ishmael leh a-inn a piang tengteng leh dangka sum a alei tengteng, Abraham inkuante lak a pasal peuhmah api a, Pathian in akiang a agen bang in, huai ni mah in azekvun uh asumsak chiat hi. 24Abraham zekvun asum lai in kum sawmkua-le-kua a upa ahi. 25Atapa Ishmael azekvun asum lai un kum sawm-le-thum a upa ahi. 26Huai ni mah in Abraham leh atapa Ishmael zeksum ahita uh. 27A-inkuanpihte lak a pasal tengteng, a-inn a piangte leh mikhual a kipan dangka sum a aleite leng, amah toh zeksum ahi vekta uhi.
Currently Selected:
GENESIS 17: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
