GENESIS 29
29
Jakob Laban In A Tung
1Huai nung in Jakob a pai zel a, suahlam tate gam a tungta hi. 2A et leh ngai in, pawn ah tuileh a na om a, a kiang ah belamhon thum a kual uh. Huai tuileh a kipan belamhonte tui a dawnsak uhi. Tuileh kong a suang om a lian mahmah hi. 3Huai ah belamhon tengteng a paikhawm ua; tuileh kong a kipan suang a khuksuan ua, suang tuileh kong a, a omna ngei ah a koih uhi.
4Jakob in a kiang uah, “Ka unaute aw, koilam mi na hi ua?” a chi hi.
Amau, “Haran khaw mi ka hi uh,” a chi uh.
5Aman a kiang uah, “Nahor tapa Laban na thei uhia?” a chi a; amau,
“Thei e” a chi uhi.
6Aman a kiang uah, “Damlai a hina maw?” a chi a;
amau, “Damlai mah uh, En in, a tanu, Rakil leng belamte pii ding in a hong kuan” a chi uhi.
7Aman, “Ngai un, ni a sanglai mahmah hi, gan pikhawm leng a hun naikei. Belamte tui dawnsak unla, va khah un” a chi hi. 8Amau, “Ka hih theikei ding uh, belamhon tengteng a pikhawm ua, tuileh kong a kipan suang a khuksuan mateng uh. Huaikhit chiang in belamte tui ka dawnsak zel uhi” a chi uhi.
9Amau a houpih lai in Rakil a pa belamte toh a hongtung a; aman huai belamte a chin zel ahi. 10Hichi ahi a, Jakob in a nu sanggampa Laban tanu Rakil leh a nu sanggampa Laban belamhon a muh in a va naih a, tuileh kong a kipan suang a khuksuan a, a nu sanggampa belamte tui a dawnsak hi. 11Jakob in Rakil a tawp a, ngaihtak in a kapta hi. 12Jakob in, “A pa tanau leh Rebekah tapa ahi” chih Rakil a hilh hi. Rakil a tai a, a pa a va hilhta hi. 13Hichi ahi a, Laban in a sanggamnu tapa Jakob tanchin a zaktak in, amah dawn ding in a tai a, a pom a, a tawp a, a inn ah a pita hi. Jakob in huai thu tengteng Laban a hilh hi. 14Laban in a kiang ah, “ka guh mah leh ka sa mah na hi,” a chi hi. Huchi in kha khat a kiang ah a omta hi.
Rakil Leh Leah Loh Dingin Jakob In Laban Nna A Sem
15Laban in Jakob kiang ah, “Ka tupa na hih ziak in a mawkin ka nna nasem dia hia? Bang na loh dia? Honhilh in” a chi hi. 16Laban in tanu nih a nei a; a upa zaw min Leah ahi a, a naupang zaw min Rakil ahi. 17Leah mit a nou a, Rakil bel chinou hoihtak ahi a, a mel leng a hoih mahmah hi.
18Jakob in Rakil a it a, “Na tanu naupang zaw Rakil toh kiteng ding in kum sagih nang nna k’on sepsak ding” a chi hi.
19Laban in, “Amah ahihleh midang kiang a ka piak sang in nang kiang a ka piak mah a hoihzaw ve. Ka kiang ah om nilouh in,” a chi hi. 20Jakob in Rakil kitenpih ding in kum sagih a nna a sep sakta hi. Himahleh Rakil a it mahmah ziak in ni tamlou chik bang in a thei hi.
21Jakob in Laban kiang ah, “Ka luppih theihna ding in ka zi honpia in, ka hun lah a kimta ngal a” a chi hi. 22Laban in huai khua a mi tengteng a kaikhawm vek a, Ankuang a luita hi. 23Hichi ahi a, khomial tung in a tanu Leah a pi a, Jakob kiang ah a pilut a; aman a na luppih hi.
24Laban in a sikhanu Zilpah a tanu Leah kiang ah a sikhanu ding in a pia hi. 25Hichi ahi a, zingsang a hong hih in, ngai in, Leah a na hi maimah hi. Jakob in, Laban kiang ah, “Ka tung a na thilhih bangchidan ahia? Rakil toh kiteng ding in na nna ka sem ka hia? Bangziak a honkhem maimah na hia?” a chi hi.
26Laban in, “Ka gam uah huchibang a ta upa zaw ma a a nau zaw piak dan ahi kei. 27Hiai minu nipikal zou phot inla, huchi in, kum sagih dang ka nna nasep zoh chiang in a nau zaw leng k’on pe ding” a chi hi.
28Jakob in huchibang in a hih a, ni sagih a zouta a; a tanu Rakil a zi ding in a peta hi. 29Laban in a sikhanu Bilhah a tanu Rakil kiang ah a sikhanu ding in a pia hi. 30Rakil leng a luppih a, Leah sang in Rakil a it zaw a, Laban nna kum sagih dang a semta hi.
Jakob Tate
31 Toupa’n Leah pen huat in a om chih a thei a, a sul a honsaka; Rakil bel a ching hi. 32Leah a gai a, tapa a nei a, a min Reuben a sa hi. “Toupa’n ka gimdan a muta. Tu’n zaw ka pasal in a hon itta ding” a chi hi. 33A gai nawn a, tapa a nei nawn a; “Toupa’n huat a ka om a zak ziak in hiai leng a honpia hi” a chi hi. Huchi in a min Simeon a sa hi. 34A gai nawn a, tapa a nei nawn a; “Tuin tapa thum ka neihsak ziak in, ka pasal in a hon zuita ding” a chi hi. Huaiziak in a min Levi a sa hi. 35A gai nawn a, tapa a nei nawn a; “Tutung in zaw Toupa ka phat ding,” a chi hi. Huaiziak in a min Judah a sa a; ta a nei nawn tadih kei hi.
Currently Selected:
GENESIS 29: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
