JOHAN 2

Kana Khua A Kitenna

1Huan ni thum ni in, Galili gam a Kana khua ah kitenna a om a, huai ah Jesu nu a om hi. 2Jesu leh a nungzuite leng kitenna ah a chial uhi. 3Uain a beitakin Jesu nun a kiang ah, “Uain a tasamta uh e,” a chi hi.

4Jesu’n a kiang ah, “Numei, nang n’on theihsak ding bang ahia om? Ka hun a tung naikei hi” a chi hi.

5A nu’n sikhate kiang ah, “Na kiang ua a gen peuhmah hihzel un” a chi hi. 6Huan Judate silsiang dan bang in suang tuibel guk, buk sawmli mun nih hiam, mun thum hiam ta chiat, huai ah a tung uhi. 7Jesu’n a kiang uah, “Tuibelte tui in dimsak un” a chi hi. A gong toh kikim in a dimsak chiat uhi. 8A kiang uah “Tuin dim unla, nekbawl thusa kiang ah paipih un” a chi hi. Huchi in a paipihta uhi. 9Nekbawl thusa in, tui uain a hongsuak a chiama, a hong kipatna a theikei a, tuidim sikhate’n a thei uhi, mouneipa a samta a, a kiang ah, 10“Michih in a tung in uain hoih a hawm ua, a tam deuh a dawn nung un, a hoihlou a hawm uh; nang bel tutan in uain hoih na kem lailai a” a chi hi.

11Jesu’n hiai a thillamdang hihpatna Galili gam Kana khua a a hih ahi; a thupina a langsakta a; a nungzuite’n amah a gingta uhi.

12Huan huaikhit in Kapernaum khua ah a hohsuk a, amah leh a nu toh, a unaute toh a nungzuite toh; huai ah ni tamlou chik a om uhi.

Pathian Biakin Siansakna

(Matt. 21.12-13; Mk. 11.15-17; Lk. 19.45-46)

13Huan Judate Paikan Ankuangluina a naita a, Jesu Jerusalem khua ah a hohtou hi. 14Pathian biakin a bawng, belam leh vakhu zuak leh dangka kheng a tute a mu hi. 15Huan khauhual in zepna ding a bawl a, belam leh bawng avek un Pathian biakin a kipan a delhkhia a, dangka khengte dangka a sungbua a, a dohkante uh leng a sawnpuk sak hi. 16Vakhu zuakte kiang ah, “Hiai thilte hiai a kipan paipih un, ka Pa inn sumsinna mun in bawlkei un” a chi hi. 17Huan “Na inn a ka phatuamngaihna in a hon gai ding” chih gelh ahi chih a nungzuite’n a theinawnta uhi.

18Huchi in Judate’n a kiang ah, “Hiai na thilhih chiamtehna bang ahia n’on lah theih?” chi in a dong uhi.

19Jesu’n a kiang uah, “Hiai in hihse le uchin, ni thum sung in ka tung ding nawn ding” chi in a dawng hi.

20Huan Judate’n, “Hiai in kum sawmli leh guk lam ahi, nang ni thum sung in na tungding ding maw?” a chi uhi.

21Himahleh amah sapum inn thu gen ahizaw hi. 22Huaiziak in, misi lak a kipan a thohnawn in, a nungzuite’n huai thugen a theinawnta uhi. Laisiangthou thu leh Jesu thugen a gingta uhi.

Jesu Kikangkoihna

23Huan Paikan Ankuangluina Jerusalem khua a omlai in, a thillamdang hihte a mu ua, mi tampi in a min a gingta uhi. 24Himahleh Jesu bel a lak uah a kikangkoih a, mi tengteng a thei hi. 25Mihing thu kuamah hilhchet a kiphatmawh louh ziak in; Amahmah in mihing sung a om peuhmah a thei ngal hi.

Currently Selected:

JOHAN 2: PAITBSI

Highlight

Copy