LUKA 11

Jesu Sinsak, Toupa Thumna

(Mat 6.9-13; 7.7-11)

1Huan hichi ahong hi a, Jesu koi lai mun hiam ah athum a, athum khit in anungzui mi khat in akiang ah, “Toupa, Johan in anungzuite thumdan ahilh bang in hon hilh sam in,” achi hi.

2Huan ama'n akiang uah, “Na thum chiang un hichibang in na chi ding uh, achi hi:

Ka Pa uh, van a om,

na min kizahtak hen,

na gam hong tung hen.

3Niteng in ka nek khop uh

an hon pia in.

4Ka khelhnate uh hon ngaidam in, kou leng kuapeuh bat hon neite ka ngaidam uhi;

Khemna ah hon pilut ke'n.

Gilou lak ah hon hu zaw in.”

Thum Teitei Ding A Thuhilhna

(Mat 7.7-11; Luk 18.1-8)

5Huan akiang uah, “Na lak ua kuahiam in lawm nei henla, zan lai in akiang a hoh in, ‘Lawm, tanghou phel thum hon leitawisak ve. 6Ka lawm zin in ahon tawn a, ama a lui ding bangmah ka nei kei,’ chi henla; 7ama'n insung a pan in, ‘Hon hihbuai ke'n; tu'n zaw kong khak ahi, ka tate leng ka kiang ah lupna ah a-ihmuta uh; thou in ka hong pe thei kei chi in dawng taleh, ka hon hilh ahi,’ 8alawm ahih ziak in thou in ava pe kei na a, anget ngutngut ziak in thou in adeih zahzah ava pe ding hi.

9“Huchi in ka hon hilh ahi, ‘Ngen un, piak in na om ding uh; zong un, na mu ding uh; kiu un, honsak in na om ding uh. 10Kuapeuh angen in angah a, kuapeuh azong in amu a, akiu peuhmah honsak in a-om ding hi.’ 11Nou lak a papen, ata in tanghou ngen taleh kua ahia suang pe ding? Ahihleh ngasa ngen taleh kua ahia gul pe ding? 12Ahihkeileh, aktui ngen taleh aikam ape dia hia? 13Huchi in nou migilou in bawn na tate thil hoih piakdan na theih uleh, na Pa uh van a om in angente Kha Siangthou pe na tel in chia!” achi hi.

Jesu Leh Beelzibul

(Mat 12.22-32; Mar 3.20-30)

14Huan Jesu'n dawi pau thei lou khat adelhkhia hi. Huan hichi ahong hi a, dawi apawttak in pau thei lou ahong pauta; huchi in mipi'n lamdang asa mahmah uhi. 15Himahleh akhen in, “Dawimang Beelzibul ziak in ei ve dawite adelhkhiak zel,” achi uhi. 16Akhen in, amah ze-etna ding in, van a kipan chiamtehna angen uhi. 17Ama'n angaihtuah uh athei a, akiang uah, “Koi gam leng amah kidou peuh amangthang a; inkuan khat leng amah kidou amangthang hi. 18Setan leng amah akidouleh agam bangchi in adingkhe dia? Beelzibul ziak in dawite adelhkhia, na hon chi uh maw; 19ke'n Beelzibul ziak a dawite delhkhia ka hihleh, na tate un kua ziak in ahia adelhkhiak uh? Huaiziak in amau noute hon vai hawmsak dingte ahi ding uh. 20Himahleh ke'n Pathian khutzung ziak a dawite delhkhia ka hihleh Pathian lalgam na kiang uah ahong tung khinta hi.

21“Mihat in hiamzat kim tawi a a-inn aven sung teng, asum bittak in a-om gige hi. 22Himahleh amah sang a hatzaw in ahong sual a, azoh chiang in, amuan agalvan kim asut a, sum alaksak a ahawmzak zel hi.

23“Kuapeuh ka lam a pang lou tuh hon dou ahi a, kuapeuh hon lakkhawmpih lou in ahihzak hi.

Dawi Nin Kik Nawnna Mihing

(Mat 12.43-45)

24“Dawi nin paimi sung a kipan apawt in, khawlna zong in tui omlouhna mun peuh ah avakvak hi. Huan khawlna himhim amu kei a, ka pawtna inn ah ka kik nawn mai ding,” achi hi. 25Ava tun in phiatsiang leh zephoih in amu hi. 26Huaitak in ava pai a, amah sang a gilouzaw dawi dang sagih ahon pi a, huai mi sung ah alut ua, ateng uhi. “Huai mihing omdan nanung, amasa sang in ahoih kei zaw tham hi,” achi hi.

Hamphatna Dik

27Huan hichi ahong hi a, huai thute agen lai in, mipi lak ah numei khat akikoukhia a, akiang ah, “Nang hon painu gil leh, nang hon vaktu nawi ahampha e,” achi hi. 28Ama'n bel, “Pathian thu za a zuite mihampha ahi zaw uh,” achi hi.

Chiamtehna Zon Louh Ding

(Mat 12.38-42)

29Huan mipite akiang a ahong kikhop lai un, Jesu'n, “Hiai khang giloute ahi uh; chiamtehna azong ua; himahleh Jonah chiamtehna chih louh akiang uah chiamtehna piak ahi kei ding. 30Nineveh a mite a dia chiamtehna Jonah ahih bang in, Mihing Tapa leng hiai khangte chiamtehna ahong hi ding hi. 31Thukhen ni chiang in, Simlam kumpinu hiai khangte kiang ah adingh dia, siam louh atangsak ding; Solomon pilna ngaikhe ding in kawlmong a kipan ahong ngal a; ngai un, Solomon sang a thupizaw hiai ah a-om hi. 32Thukhen ni chiang in, Nineveh khua a mite hiai khangte kiang ah adingh ding ua, siam louh atangsak ding uh, Jonah thuhilh ziak in akisik ngal ua; ngai un, Jonah sang a thupizaw hiai ah a-om hi.

Khawnvak A Pan Sinsakna

(Mat 5.15; 6.22-23)

33“Kuamah in khawnvak akimu lou ding in asel kei a, loh nuai ah leng akoih ngei sam kei uh, alut mite'n vak amuhtheihna ding un akoihna ah akoih zel uhi. 34Na pumpi khawnvak na mit ahi; na mit achiimleh na pumpi leng avek in avaksuak nak hi; achiim keileh bel na pumpi amial vek nak hi. 35Huchi in na sung a vak om mial ana hi kha ding e, pilvang in. 36Huchi in na pumpi koi lai peuh mial lou a, avek a avakkhiakleh khawnvak vak petpet in atatvak bang in avakkhe vek ding,” achi hi.

Pharisaite Leh Laigelhmite Demna

(Mat 23.1-36; Mar 12.38-40)

37Huan agen lai in Pharisai khat in amah kiang a an ne ding in achial a; huchi in alut a an ane hi. 38Pharisai in an um amuh in, an nek ma a khut asil louh lamdang asa mahmah hi. 39Toupa'n akiang ah, “Nou Pharisaite'n nou leh kuang polam na silsiang ngeitak ua; na sunglam uh lah lepgukna leh gilou in adim hi. 40Mihaite aw, polam bawlpa'n sunglam leng abawl kei a hia? 41Himahleh na neihte uh migenthei kiang a thilthawnpiak ding in zang un; huchi in ngai un, nou a ding in bangkim asiang vek hi.

42“Nou Pharisaite aw, na tung uh agik e; pudina, pardi leh anteh-louhing teng sawm-a-khat na pia ua, diktatna leh Pathian itna na limsak kei uhi; himahleh huaite ei ve na hih ding uh, adangte hih lou tuan lou in. 43Nou Pharisaite aw, na tung uh agik e! Sinagog ah tutphah hoihpente leh dawr mun a chibai bukte na ngaisang uh. 44Laigelhmite leh Pharisai lepchiahte, na tung uh agik hi! Han chiamteh louh, atung a thei lou a mi apaina zel bang na hi uh,” achi hi.

45Huan dan thei mi khat in akiang ah, “Sinsakpa, hiai thu na gen kou leng hon tai na hi,” chi in adawng hi. 46Huan ama'n, “Dan thei mite aw, nou leng na tung uh agik! Puakgik, puak haksa pipi mite na suan ua, nou lah huai puakgikte na khutzung khat un leng na khoih ngei kei uh. 47Na tung uh agik! Na pipute uh thahsa zawlneite han inn na lam ngal ua. 48Huchi in na pipute uh thilhihte na theihpih un na hoihsakpih uh ahi; amau athat ua, nou ahan innte na lam uhi. 49Huaiziak in ‘Pathian pilna in leng, akiang uah zawlneite leh sawltakte ka sawl dia, akhen athat ding ua, akhen asawi ding uh,’ achi hi. 50Zawlnei tengteng sisan, leitung pian tung a kipan a kisuah, hiai khangte tung ah phu alak theih ding in achi hi. 51Abel sisan suah a kipan, Zakariah, maitam leh tempul kikal a sisan suah tan in; ahi, ka hon hilh ahi, hiai khangte tung ah phu akila ding. 52Nou dan theite aw, na tung uh agik e! Theihna chabi na paimangpih ua; nou lah na lut ngal kei ua, mi alut dingte na dal uhi,” achi hi.

53Huai a kipan apawt in, laigelhmite leh Pharisaite'n amah atawng ua, thu chiteng gensak teitei tum in leh, 54apaukhelh zenzenleh mat tum in atang gige uhi.

Currently Selected:

LUKA 11: PAITBSI

Highlight

Copy