LUKA 15
15
Belam Mang Gentehna
(Mat 18.12-14)
1Huan siahkhon mite leh mikhialte tengteng in athu za ding in akiang ahon zuan uhi. 2Pharisaite leh laigelhmite'n, “Hiai mi'n mikhialte akithuahpih a, akiang uah an ane chi in aphun tuak uhi.” 3Huchi in ama'n akiang uah hiai gentehna agen hi.
4“Nou lak ah kuahiam in belam zakhat nei henla, alak ua khat mangsak taleh gamdai ah sawmkua-le-kuate nusia in, amang pen amuh nawn masiah kua ahia zong lou ding? 5Huan amuh nawn in kipaktak in aliangzang ah apua hi. 6Inn atuntak in, alawmte leh avengte asamkhawm a, akiang uah, ‘Hon kipahpih un, ka belam mang ka mu nawnta,’ achi hi. 7K'on hilh ahi, huchi mah bang in, midik sawmkua-le-kua kisik tuan ding neiloute sang in mikhial khat kisik, tung a van a mi akipahna athupizaw ding hi.
Makhai mang
8“Huan numei kuapeuh in makhai sawm nei in khat mangsak taleh khawnvak de in, inn phiat in amuh nawn masiah kua ahia hoihtak a zong lou ding? 9Huan amuh nawn in, alawmte leh avengte asamkhawm a, ‘Hon kipahpih un, ka makhai mansak ka mu nawnta,’ achi hi. 10K'on hilh ahi, huchi mah bang in, Pathian angelte ma ah, mikhial khat kisik tung ah kipahna a-om nak hi,” achi hi.
Tapa taimang
11“Mi kuahiam in tapa nih anei hi: 12Anaupangzaw pen in, apa kiang ah, ‘Pa, gou ka tan ding a tuak teng hon pia in,’ achi hi. Huchi in akiang uah agoute ahawmta hi. 13Huan ni sawt lou nung in atapa naupangzaw pen in atan ding tuak tengteng alakhawm vek a, gam gamlapi ah azinta a, huai ah nuamtat lua in agoute amawk zatmangta hi. 14Huan azatbei zoh vektak in, huai gam ah kial thupitak ahong tung a; nek ding ahong tasamta hi. 15Huchi in huai gammi khat ava bel a; ama'n vok an pe ding in alou ah asawl hi. 16Huan thil hawng vok in anekte ua kihihvah a-ut mahmah a; kuamah in lah bangmah ape ngal kei ua. 17Huan amah-le-amah ahong kiphawkkhiaktak in, ‘Ka pa kiang a kilohte an nek seng louh atamtam maizen toh, kei lah hiai ah gilkial a si ding himai veng in!’ 18Ka thou ding a, ka pa kiang ah ka pai ding a, akiang ah, ‘Pa, van a tung ah leh nangmah mitmuh in thil ka hihkhial; na tapa a seh tak ka hita kei; 19na kiang a kiloh khat bang in hon bawl in, ka chi ding,’ achi hi. 20Huchi in athou a, apa kiang ah apaita hi. Huan gamlapi a a-om lai in, apa'n ana mu a, alainat mahmah a, atai a, ava pom a, atawp tonton hi. 21Huan atapa in akiang ah, ‘Pa, van a tung ah leh nangmah mitmuh in thil ka hihkhial; na tapa a seh tak ka hita kei,’ achi hi. 22Himahleh apa'n asikhate kiang ah, ‘Puan hoihpen hon lakhe pah unla, silhsak un; akhut ah zungbuh, akhepek ah khedap bunsak un; 23bawngnou thautak hon la unla; gou un, i ne ding ua, nopbawl in i om ding uh. 24Hiai ka tapa asi a, ahong hing nawnta hi; amang a, i mu nawnta uhi,’ achi a. Huchi in kipaktak in a-om panta ua.
25“Huan atapa upazaw pen lou ah a-om hi; inn ahong tun kuan in bangpeuh tumging leh lam husa azata hi. 26Huchi in asikha khat asam a, tua bang ahia? chi in adong hi. 27Huan ama'n akiang ah, ‘Na nau ahong tung a, damtak a amuh nawn ziak in na pa'n bawngnou thautak agou hi,’ achi a.
28“Amah aheh a, alut nuamta kei hi. Huchi in apa ahong pawtkhia a, amah ahong sam hi. 29Himahleh ama'n apa kiang ah, ‘Ngai in, kum hiai zah na nna semta ing a, na thu a lah talek ngei lou ing a; ka lawmte toh kipahna ka bawlna ding in kelnou khat leng na hon pe ngei kei hi. 30Himahleh hiai na tapa kizuakte kiang a na sum nemang vekpa ahong tuntak a maw, amah a ding a bawngnou thautak na goh!’ chi in adawng hi. 31Huan ama'n akiang ah, ‘Ka tapa, ka kiang a om gige hi chin a, ka neih tengteng nang a ahi.’ 32Kipak leh nuamtak a om ding ahi; hiai na nau asi a; ahong hing nawn a; amang a, i mu nawnta ahi,” achi hi.
Currently Selected:
LUKA 15: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
