LUKA 18
18
Thukhen Diktat Lou Gentehna
1Huan lunglel lou a thum gige ding ahi chih atheihna ding un akiang uah gentehna agen hi. 2“Koi lai khua hiam ah thukhenmi khat a-om a, huai mi'n Pathian alau kei a, mihing leng khawk asa kei hi. 3Huai khua ah meithai khat a-om a; ama'n, ka melma tung ah phu hon laksak in, chi in akiang ah ahoh zihzeh hi. 4Huan amah sawt khop a-ut kei a; himahleh anung in alungsim in ‘Pathian lau lou in mihing khawk sa kei mah leng; 5hiai meithainu'n hon hihbuai ziak in aphu ka laksak mai ding, huchi lou in zaw, hong zihzeh taleh ahon hihbuai den kha ding,’ achi hi.
6“Huan Toupa mah in, thukhen midiktat lou thugen za un. 7‘Atung uah dohzou tadih mahleh leng amitel, asun-azan a amah samte phu Pathian in alaksak kei dia hia?’ 8K'on hilh ahi, aphu uh alaksak pah ding. Himahleh Mihing Tapa ahong pai chiang in leitung ah huai bang ginna ahon mu diam?” achi hi.
Pharisai Leh Siahkhonmi Thumna
9Huan midiktat hih kigingta a, midang tengteng musit kuate hiam kiang ah hiai gentehna leng agen hi. 10“Tempul ah thum ding in mi nih ahohtou ua; khat Pharisai ahi a, khat siahkhonmi ahi.
11“Pharisai adingh a, amah kia in hichibang in athum hi: ‘Pathian, midang negute, dikloute, angkawmte bang ka hih louh ziak leh hiai siahkhonmi bang leng ka hih louh ziak in na tung ah ka kipak hi.’ 12Nipikal teng in nihvei an ka ngawl zel; ka neih teng sawm-a-khat ka pe zel,” achi hi.
13“Siahkhonmi'n bel gamlatak a dingh in, van lam leng adak ngam kei a, ‘Pathian, kei mikhial, ka tung ah zahngai in,’ chi in a-awm akitum hi. 14K'on hilh ahi, amasa sang in huai mi pen siamtang in a-inn ah apaikikta hi. Kingai thupi peuh aniam ding ua, kingainiam pahtawi in a-om ding,” achi hi.
Jesu'n Naupang Neute Avualzawl
(Mat 19.13-15; Mar 10.13-16)
15Huan akhoih ding in akiang ah anaupang neute uh ahon pi ua; nungzuite'n huai amuhtak un ana tai uhi. 16Himahleh Jesu'n akiang ah amaute asam a, “Naupang neute ka kiang ah hon paisak unla, kham kei un, Pathian lalgam huchibang mite a ahi ngal a. 17Chihtaktak in ka hon hilh ahi, kuapeuh Pathian lalgam naupang neu in akipahpih bang a kipahpih lou asung ah alut kei hial ding,” achi hi.
Hauhna In Lam Akhak
(Mat 19.16-30; Mar 10.17-31)
18Vaihawmmi kuahiam in akiang ah, “Sinsakpa hoih, tangtawn hinna tanna ding in bang ka hih dia?” chi in adong hi.
19Jesu'n akiang ah, “Bangziak a hoih hon chi? Mi khat kia ngal lou kuamah hoih a-om kei, huai tuh Pathian ahi. 20Thupiakte: Ang kawm ke'n, Tual that ke'n, Gu ke'n, Hek ke'n, Na nu leh pa zahtak in, chihte, na thei vele,” achi hi.
21Ama'n, “Huai tengteng ka tuailai chil a kipan ka zui zel,” achi hi.
22Huan Jesu'n huai azaktak in akiang ah, “Tu in thil khat na sam lai; na neih tengteng zuak inla, gentheite kiang ah hawm in, huchi in van ah gou na nei ding; huan hong pai inla, hon zui in,” achi hi. 23Amah bel, huai thute azak in, ahauh mahmah ziak in alungkham mahmah hi.
24Huchi in Jesu'n amah a-en a, “Mihaute Pathian lalgam lut haksa hi na e! 25Pathian lalgam a mihausa alut sang in phimbil a sangawngsau lutsuak abaihlamzaw,” achi hi.
26Huai thu zate'n, “Huchi ahih in kua hotdam in a-om thei dia?” achi uhi.
27Ama'n, “Mihing hih vual louh Pathian hihtheih ahi,” achi hi.
28Peter in, “Ngai in, kou bangkim nusia in ka hon zui uh,” achi hi.
29Ama'n akiang uah, “Chihtaktak in ka hon hilh ahi, ‘Kuapeuh Pathian lalgam ziak a, inn hiam, zi hiam, unaute hiam, nu le pa hiam, tate hiam paisan photphot, 30tu damsung mahmah in asang a tamzaw mu lou ding kuamah a-om kei, hun hong tung lai ding a tangtawn hinna toh,’ ” achi hi.
Jesu'n Asihna Ding Agelkholh Athumveina
(Mat 20.17-19; Mar 10.17-31)
31Huan sawm-le-nihte akiang ah apituam a, akiang uah, “Ngai un, Jerusalem a hohtou ding i hi ua; zawlneite thugelh tengteng Mihing Tapa tung ah atung ding hi. 32Zentelte kiang ah piak in a-om ding a, nuihza bawlna in azang ding uh, zumhuaitak in abawl ding ua, achilphih ding uhi. 33Huan avo ding ua, athat ding uh; ni thum ni in athounawn ding,” achi hi. 34Huai thute atheisiam kei ua, athugen alak uah sel in a-om, bang gen ahia chih leng athei kei uh.
Mittaw Hihdamna
(Mat 20.29-34; Mar 10.46-52)
35Huan hichi ahong hi a, Jeriko atun ding kuan in, mittaw kuahiam lam gei ah khutdoh in ana tu hi. 36Huai mi'n mipi paiging aza a, bangchi thu ahia chih adong hi.
37Amau, “Nazaret Jesu apai ahi,” chih ahilh uhi. 38Huchi in “Jesu, David Tapa, ka tung ah zahngai in,” chi in akikou hi. 39Amasate'n dai ding in atai ua, himahleh, “David Tapa, ka tung ah zahngai in,” chi in akikou nak semsem hi.
40Huchi in Jesu adingh a, akiang a hon pi ding in thu apia hi. 41Akiang ahong tun in, “Na tung ah bangchi a ka hih ahia na deih?” achi a, ana dong hi. Ama'n, “Toupa, muh theih ka ut,” achi hi.
42Jesu'n akiang ah, “Mutheita in, na ginna dampih na hi,” achi hi.
43Huan thakhat in amu thei pah a, Pathian phat kawm zel in amah azuita hi; huan mi tengteng in huai amuh un, Pathian aphat uhi.
Currently Selected:
LUKA 18: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
