KUITIR 27
27
Paul Roma Ase
1Itali na rakuang le koini nei se na rang achat suale hanke Paul le atei senkhat anthung Augasta sipai bila Julias tia mi khat raza ruaipu kuta a betok u. 2Hanke koinin Adramuttini khuana rakuang khata na chuanga na se ha rakuang ha Asia ram tipuilian kola khua muntina a lut tira Makedonia Thesalonika na Aristarka ha koini bila a om. 3Zing khua vara Sidon khuana na va luta hatuka Julias in Paul rang a sadima atho na amal arual ngai kom asena aning avan hian ranga chong apek. 4Nuka havan ata rakuang na man thoka a maton tiang thinthi ei tam sika Kupra mualanlan rali tira na se. 5Hatuka Kilikia na le Pamphulia matona tipuilian na rakana Lusia ram Muria khuana na va suak. 6Hava muna raza ruaipun Itali se ranga Aleksandria rakuang khat a muna hava rakuanga ana makhal.
7Nuka nikhua sotpa na se re reta antak sabaka Knidas kol na va suakle thinthi sika lon lai mak me na Salmoni kho kol tiang Krita mualanlan ralina na se. 8Nuka antak sabaka tang kol tiang na se tira Rakuang Munhui atia munkhat na va suak Lasai khopui kola.
9Hantin han nikhua tampa aliama hanuk bungoi tha an len sua zei atia ti lama se antaka Paulin hangai rang ha ei ti: 10“Pu ngai ka riat zei hi nei sena hi achan nei siata nei hek rang ke hava ha neinun le rakuang rong ni mak koinim ni inti.” 11Tenchu raza ruaipun Paul achong neka rakuang a vei ulian le rakuang puma chong a tel siai a. 12Hatuka ha rakuang anbena mun ha nudin aneng ei sa nok sika mi tampa havan ata anphet ranga ei ril. Phoiniki ei va suak zam ngeta hava han nudin ei diar thei u na ranga hava mun ha Kreta na rakuang munkhat hava ha sim sak le mar saka andung.
Tipuia Phaivua
13Hava suale sim thinthi ana sabaka ahong le hava han amanin a malung vong u a chuk zei ati na rakuang a kheka Kreta kola a dep sabaka ase u. 14Tenchu nikhua tomte suale mualanlan tiang ata thinthin rat sabaka a hong suk.Hava phaivua ha achong u na “Euroklaidon” ati u. 15Hava han rakuang ha ro bila thinthi mator thei maka koinin ei anlan na ranga nei tho. 16Nuka Kloda atia mualanlan asinte khat arali tira na sena antak sabaka rakuang ha na manngir thei. 17Hava han kuangluri a kheka rakuang athunga a mandet u akola Surti atia tang panga a sena nuka hava anchina akhar na masuma hantin han ase. 18Phaivua a chalaka ei na sika hanuk nikhuana chu neinun tin a pei u. 19Ninthum nikhuana amanin akut chunga rakuang neinun a pei u. 20Hatuka nikhua sotpa peia ani, arasi, ei anlang nok sika hanuk achalaka rua le phaivua ei hong sika zokna nei man rang sabeina ankhai tir zei.
21Hava han alom u na nikhua sotpa bungoia a om suale Paul amani bila andinga, “O ka pu ngai, ka he nei tel u na Kreta ata rakuang anthan noka hiva siatna le ahekna ei om nokna ranga chong ei ni. 22Tenchu atun chu ka chong hiva hi anngam u ro! Asik chu nangni hi tute thi u no ta ni; rakuang rong ke ei siat rang. 23Asik chu koi hi Pathian mi hanuk kei biak han a vanpalai khat mizan zan ka kola andinga ei ti, 24‘Paul achi no ro! Kaisar a makunga anding na nang. Hatuka enro, na bila ase ngai ha Pathianin amani aloma nang ei na pek keng.’ 25Hasik han ka pu ngai, anngam u ro! Asik chu Pathian kei iam a om, ka koma ei na ril anga hantin han ni inti. 26Tenchu mualanlan khat peia sena va chul inti.”
27Hantin han koinin Adria tipuiliana andon chu chunga zan somleimanlina na na suaka hava han zan chim ripa avei ngaiin a mankhi u na hova ram mo nei hong nai ani zei atia a mandon u na. 28Hatuka ti amai u na lam somanni alanthuk akol uala ase u na amai ret u na lam somleiranga ani. 29Hava han koinim lunga lam na va suak ngai ati na rakuang nuk tianga thir chinki ri manli denga khuavar raka a om u. 30Hatuka rakuang avei ngai ha arot rang ei val u, a maton beta ri adeng rang avala rakuang ha tipuiliana ei masum u. 31Hasik han Paulin raza ruaipu le sipai ngai ha, “Amani hi rakuanga a om u nokten nangni hi zokna manthei u no ta ni,” ei ti. 32Hanke sipai ngaiin rakuang ri a at u na tia a masul u.
33Hanuk sun ahonga ni zei hava lai tak han Paulin mi dora ha alak te lua chu asak anek lak ranga a mathema ei ti, “Avian ni somleimanli ani zei nangnin nei maruang u ite sak nek tho luia anchama nikhua nei tiar u. 34Hasik han kei na mathem a ni u zei sak tho u ro, asik chu hava ha nangni nei dam u na rang asa ni inti, asik chu tute na lu u na na sam sangkhat ngal siat u no ni,” ei ti pe. 35Hava ha ei tia Paulin vaipol alaka a maton u na Pathian kom raisanna arila hava suale hava ha akhiaka asak. 36Hava hanke ei lan ngam kiar u hanuk amanim ei sak u. 37Rakuanga han aloma koini raza anni somsari aruk na ni. 38Na loma na khop suale amanin gom dora tipuiliana a masula apai u na rakuang ei rik ei man zang u.
Rakuang Akui
39Sun ani le hava mun mandang thei u lai maka tenchu munkhat amu u na bali bila tangkol hatuka anril u na a thei ten sova tang kola rakuang ha abang rang. 40Amani han rakuang ri dora a at u na tipuiliana a mathan u. Hanuk ei anthung a sut lilip u, nuka thinthi maton amalaia achuka a doma bali bil tang tiang ase. 41Tenchu hin tiang, hin tiang tipuilian anchunna taka ti sunga lung apo khatin rakuang aman ok, hava han athunga se thei lai mak tenchu a nuk tianga kellaiherin a suka a kuia ase.
42Hava han sipai ngaiin ankhit ngai ha athat ranga ei anril u nuka ti anliaia lam arota ase viak u ngai atina. 43Tenchu raza ruaipun Paul ha arung ranga ei mandona hangai ha ha ei mansuk u ata ei manbang hatuka hintin hin chong ei pek, ti anliai athei ngai ha, amani ha mana antoma tanga va kal u rase. 44Hatuka anniang ngai doran thing pek mo ole rakuanga ei man tak pei hava ha sura tanga kal u rase hantin han alom u na tanga a kala azok u.
Currently Selected:
KUITIR 27: RANGBSI
Highlight
Share
Copy
Want to have your highlights saved across all your devices? Sign up or sign in
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.
