JOHONIN 10
10
Berarung le Ankhina
1Isuan, “Atak taka keina ti ni u zei, bera makota lut lui tana atei tiang changa alut chu anru le mi suam ani. 2Tenchu makot tianga alut chu ama ha bera rungpu ani. 3Suak khar angak han ama rang keng ei malong pe, hatuka bera ngaiin um ama rol ariata hatuka ama ham bera ngai a raming chipa a paia, hatuka apanga aruaia. 4Hanuk abera ngai dora apanga amasuak tik lem, man ansa tira ase pe na, hatuka a bera ngaiin ama rol ariat u na. 5Tenchu mitei nuk chu zi u ngai maka, haneka ama ata keng ei rota ei se, asik chu mitei rol riat u mak.”
6Isuan hiva ankhina le akom u na chong arilam, i mo ei ril ha lei riat pe thei u maka.
Berarung Asa Isua
7Hasik han Isuan athar reta, “Ataka keina ti ani u zei, koi hi bera ngai ranga suakkhar dik ka ni. 8Ka mana aleia hong ngai dora chu anru le mi suampu ani u, asik chu bera ngaiin amani rol riat pe u mak. 9Koi hi ke suakkhar, koia alut tak pei chu zokna man inti, asunga lut thei unti, apangam suak thei unti, hatuka sul sak nam laman inti. 10Anru chu anruk rang, athat rang le ansiat rang duaia ahong keng, koi kei hong chu nangni ngai damna nei chang thei u na ranga le nei iam thei u na rang keng.
11“Koi hi bera rung adik khit ka ni, A bera ngai ranga ei damna tenpeia aphal ngam. 12Ei lo rathula bera rung ngai chu atak ni mak, ama ata tatak ei ni nok sika han, koiarasi ei hong amu le a bera ngai a maka a rota ase rang keng hatuka koiarasin bera ngai chu hong bon tia hatuka anthek zit unti. 13Ama chu rot inti asik chu ei lo ei ni sika, bera ngai mandon no ni. 14-15Koi hi bera rung asa khit, Pain ei na riat anga koiin um Pa chu ka riat hava ang taka ka bera ngai ka riat hatuka amani nin um ana riat u. Amani ranga thi tenpeia anphal ngam ka ni. #Mt 11.27; Lk 10.22 16Bera atei ka la donsa, hava ngai ha hiva ina bera ni u mak, hava ngai ham ava lak ka nang, amanim ka rol la riat unti; hatuka rahuang khat lachui unti, arung rang um angkhat ei la ni rang.
17“Hasik han Pa han ei na dit, omzia chu kei damna ten peia anchan zot keng ka ni, hava ha kei man zit ret theina ranga; 18ka kom ata tuten la viak thei no ni, asik chu koi ka ninga kei zotna ata keng, hava phalna ranga ningneina don ka ni, hatuka aman ret theina ningneina ham ka don; havan tina atho ranga ka Pa han ei na pek.” 19Hiva chong ngai sika Juda mipui kara athara ansenna ei hong suak. 20Amani kar ata senkhatin, “Ama hi kachaiin ei sur achang keng, ichangamo a chong nei rangai u?” ati u na.
21Hanuk senkhat retin, “Hiva chong ngai hi chu kachaiin ei sur chong ang nimak, kachaiin mitacho mo aman var thei ngai?” ati u na.
Isua Aheng u
22Hava lai tak ha Biakin adarna Panta chu Jerusalema aleia oma, hava lai tak han nudin ani na. 23Hatuka Isua chu, Biakin kola Solomon a in tuamaia aleia cheia, 24Hava han Juda ngaiin ahual u na, “Ni ituk ngal mo neina lama thoi rang? Anthiang phata na ril ro nang hi Messia mo na ni?” ati u na.
25Isuan, “Hava ha keina ril sua u keng ani zei, nangni hakeng ana iam u nok, Pa ningneina le ka sin tho ngai doran koi ka ruia ei na man riat u keng ani zei. 26Tenchu iam u mak chena, asik chu ka bera ni u mak che. 27Ka bera ngaiin chu ka rol ariat u, hatuka koiin um ka riat u, amani hanin um ka nuk ana zi u. 28Hatuka taituan damnam ka man chang u na, thi u lai no ni; hatuka tuten ka kom ata anan pot thei om lai no ni. 29Ka Pa han ka koma ei na pek ngai baka alian om lai mak. Pa zahual sungatam tuten hong apot thei no ni. 30Pa le koi hi angkhat na ni.”
31Hava suale chu Juda ngaiin ei dengna rang lung ava rut u na. 32Isuan amani kom, “Pa ata sin asa na moton u na atampa ka thona, hanle hova sin kei thona ngal mo lung le neina deng u?” ati na.
33Hatuka amani han, “Sin asa nei tho sika lung le na deng zot mak me, tenchu Pathian nei ero sika han min miring nei ni uama ichangamo na nininga Pathiana ne an belbo hasik han ani!” #Lev 24.16
34Isuan, “Nangni na Dan lekhabu lena anziak hale Pathianin, ‘pathian ngai na ni u ati,’ ati na a masanga. #Sam 82.6 35Pathian chong ei hong tungna mi ngai ha, ama han Pathiana abelbo ten lekhabun ei ti chu umora adik ni mak mo. 36Hantin aniten, Pa han a manthianga ramuala ahong tirin, hanum mo Pathian an ero nei la ti u rang, asik chu koi len han Pathian Sapa ka ni, kei anti sika mo? 37Ka Pa sin atho ka ni nok ten na iam u no ro. 38Tenchu Pa sin kei tho sunga na na iam ngal u nokam ka sin tho asa thang ha chu iam u ro, asik chu nangni ngaiin, Pa hi ka bila a om ti le koi um Pa na kei om nei riat thei u na ranga.”
39Amani ngaiin Isua asur rang ati ret u le chu akut u ata anpiala asena.
40Hatuka Isua chu Jordon varala Johonin baptisma ei pek chachakna muna asena ava oma. #Jn 1.28 41Hava han a koma mi atampa ahong u na, “Johonin ite boidong sin ei tho om mak tenchu hiva mi aruia ei ril ngai dora adik zit,” ati u na. 42Hava han mi atampa han ama chu a iam u na.
Currently Selected:
JOHONIN 10: RANGBSI
Highlight
Share
Copy
Want to have your highlights saved across all your devices? Sign up or sign in
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.
