JOHONIN 15

Arang Diktak Isua

1“Koi hi gerep akung ka ni, ka Pa hi rahuan a thopu ani. 2Ka baka anra nok chu aman ei pei ani. Hatuka abaka anra tak chu aman ei rathial sa ani atampa mara ei kur sa theina ranga. 3Nangni keina manchu u na lehan anthial sua keng na ni u zei. 4Nan zompui tit u ro, hatuka Koiin um nan zompui tit u ka ting. Akungpuia abak akop nok ten atheia anra thei ni mak. Hava anga han nangnim ka koma na om u nok ten anra thei u no ta ni.

5“Koi hi gerep kung nangni ha abak na ni u zei. Ka koma a om tak chu hanuk koi um akoma kei omna tak chu amara kur sabak inti. Asik chu koi nok anten nangnin ite nei tho thei u om mak. 6Hatuka koia a om nok tak chu abak anga anvora ei chara ei anpei. Hatuka hava ang thingbak chu min ei rakhoma ei buma moi thonana ei hal ani. 7Nangni ngai ka koma na om u na, ka chong ham na kom u na a om ten nei zot u tak zong u ro hava ha na mansua u zei. 8Mara akura nei om u na lehan ka Pa ei anlianna nei manlang thei u na ani. Hatuka havan tin han ka zolai um nei chang u ani. 9Pa han koi ei na dit anga koiin um nangni ngai kei na dit u. Kei na dit u na hin om u ro. 10Nangnin ka chongmak ngai dora na tel u ten keina madit u na na om un na ti, Koi um ka Pa chongmak ngai dora kei tel tuara aman ei na ditna na kei om anga.

11“Ka raisanna na kom u na ei om theina rang le na raisan u na ei kip theina ranga hiva chong ngai hi keina ril u. 12Ka chongmak chu hiva hi ani; koiin keina dit u anga, nangni ngai um andit ansiat u ro. #Jn 13.34; 15.17; 1 Jn 3.23; 2 Jn 5 13Min a mal ngai ranga ei damna aphal diai thei khop anditna lian khit chu omlai mak. 14Ka chongmak ngai dora na tel zit u ten ka mal na ti u ka ting. 15Hava pang suak na ti u lai no ning, asik chu apumapa han imo ei tho suakin riat ngai maka; atun chu hava rathula ka mal keng kei na ti ani u zei asik chu ka Pa kom ata kei riat ngai dora nangni koma keina ril zit sua u keng na ni u zei. 16Nangnin neina thang u ni makung haneka koi keng anan thang u ka ni. Asik chu nei van ra thei u na ranga le mara nei don babang thei u na ranga keina phun u ani. Ka raminga Pa koma nei zong u tak aman ei na pek thei u na ranga han. 17Nangni ngai nei andit ansiat thei u na rang ngala hiva chong keina mak pe u ani.

Ramual Mumak

18“Ramual min ana mumak u ten nangni ana mumak u mana koi keng ei na mumak mansa ti riat u ro. 19Nangni ngai hi ramual ata ni u tan la chu ramualin ata anga ei na dit u rang ani na, tenchu nangni ngai chu ramual ata ni u mak che. Haneka Koiin ramual ata keina thang u sika ramualin ei na mumak u na ani. 20‘Suak hi apuma neka alian ni mak,’ ti chong keina ril u ha riat tit u ro. Min koi ana sinsak ten nangnim ei na sinsak u rang keng. Hanuk ka chong atel u ten, na chong u ngai um ei tel u rang ani. #Mt 10.24; Lk 6.40; Jn 13.16 21Tenchu ka mi nei ni u sika hiva ngai dora na chung u na la tho unti. Asik chu koi ana honga tirpu riat u mak. 22Kei hong nok nisela hanuk chu akom u na chong kei ril nok nisela chu asia anlo u no ni ba. Tenchu atun ei masial u ngai rathula anon rua nei lai mak. 23Koi anan mumak tak chu ka Pa ham ei mumak keng. 24Tuten la tho ngai lui sin akar u na tho ving non lang chu asia anlo u no ni ba. Ten atun chu kei tho ngai dora amu sua u zeia hatuka koi le ka Pa ha ei na mumak rit ani u zei. 25Amani Dan lekhabuna anziak anga ei hong kip nget theina ranga; ‘Amanin asik akong abui thaka ei na mumak u.’ #Sam 35.19; 69.4

26“Tenchu, Pa kom ata ana san u rangpu nangni koma kei hong tir rang Pa kom ata Ratha dik tak ahong tik chu aman ka rui manriat inti. 27Hatuka nangni lenin um manriat un na ti asik chu aphut len ata ka bila om na ni u na.

Currently Selected:

JOHONIN 15: RANGBSI

Highlight

Copy