JOHONIN 2

Kana Khuana Inneina

1Hatuka ninthum changna nikhua han, Galili rama Kana khopuia mui ruaina khat a oma. Hava han Isua a nu anchela. 2Hanuk chu Isua le a zolai ngai um hava mui ruaina na han ankui ani u na. 3Hatuka nukhona zu ansam u le chu Isua a nu han akoma, “Gerep zu hi ansam keng ani u zei,” ava ti na.

4Isuan akom, “Nupang, hiva ruia nang le koi hi imo nei anphana, ka hun la hong tung mak,” ati na. 5Hatuka a nu han mi dorbondom ngai rang, “Aman ei na ti u dora tho u ro,” ati na.

6Hava han Juda ngai anthiangna dan anga lung tikola aruk ansut a oma, angkhakhatin atampa ngai litar razakhat seng achak thei ani na. 7Hatuka Isuan, “Tikola ngai dora ti manbit zit u ro,” ati na. Hankeng hava ngai dora chu ti aliama aman bit u na. 8Hatuka aman, “Atun chu havan ata luak lak u tan nek sak ansukpu koma choi u ro,” atina. Hankeng achoi u na. 9Nek sak ansukpu han ti gerep zu ei man chang sua ha atem beta ten ei suakna riat thei maka. Ti avaluak ngai han chu ariat u na. Nek sak ansukpa han makpa chu akuia 10akom, “Min gerep zu ati keng ei rasua mansa, hankeng atam ual min a nek suale ati nok ual ei rasua chachak. Tenchu nangin atun tenpei gerep zu ati nei la don,” ati na.

11Hantin han Isuan boidong sin ei phutna chu Galili rama Kana khopuia anina, hivan tin hin ei lianna ei man langa a zolai ngaiin ei iam thei un zei.

12Hava suale chu ama le a nu, a naipa ngai hanuk chu a zolai ngai lehan Kapernaum khuana ase u na, tenchu nikhua sot va om u maka. #Mt 4.13

Isua Jerusalema Ase

(Mt 21.12-13; Mk 11.15-17; Lk 19.45-46)

13Havalai tak han Juda ngai Zokna Panta ahonga nai zeia hankeng Isua Jerusalema ei se. #Ant 12.1-27 14Hatuka Pathian Biakina serat, bera, pharvali azuar ngai le sumru athul ngai chu ava muna. 15Hatuka, rirual le nganu ramoi asina serat le bera aloma Pathian Biakin ata a rasuana, sumru athul ngai sum abun pena, ei siak u na ngai dora ei malet pe zit. 16Hanuk chu pharvali azuar ngai koma, “Hiva neinun ngai dora hiva mun ata khai u ro, ka Pa in hi azuarna le anchokna in manchang u no ro,” ati na. 17Hatuka, “Na in sika ka tepannel na han moi anga achuang ka ni zei,” ti anziak ha a zolai ngai malunga ei hong chui ret ani na. #Sam 69.9

18Hatuka Juda ngai han, “Hiva boidongna sin nei thona nei na man mu dora hi hovan tina nei tho thei mo?” atia arakel u na.

19Isuan akom u na, “Hiva Biakin masiam u ro, koiin ninthum sunga manding ret ka ting,” ati na a masanga. #Mt 26.61; 27.40; Mk 14.58; 15.29

20Hatuka Juda ngai han, “Hiva Biakin hi kum sommanli le kum aruka ansin anina, nangin ninthum sunga nei manding rang mo?” ati u na.

21Tenchu ama aninga ataksa anga Biakin rui keng ei ril. 22Hasik han ei thi ata anthuiret suale chu hiva chong hi aman ei la ril nget keng atina a zolai ngai malunga ei la chui pe ret u ani na. Hava suale keng Pathian Lekhabuna chong le Isua chong ngai ei la iam u.

Isuan Miring Zia Ariat

23Isuan Zokna Panta laia changdong sin ei tho ngai amu u na mitampa han ama raminga a iam u na. 24Tenchu Isuan aning len ngala han amani chunga angamna don maka, asik chu aman mi dora ei riat zit ani na. 25Miring ruia ariatpui ranga aman tute ei nang ommak asik chu aman miring sunga a om dora ariat zita.

Currently Selected:

JOHONIN 2: RANGBSI

Highlight

Copy