JOHONIN 20

Than Korong

(Mt 28.1-8; Mk 16.1-8; Lk 24.1-12)

1Pathian nikhua zingphit mansana azing miaka Mari Magdalini chu thana ase na hatuka than lung chu ankhai vinga ava muna. 2Hasik han atan chiana Simon Pitor le a zolai khat ret Isuan ei madit koma asena, “Than ata Puma chu min alak viaka achoi u zei. Hatuka hontiangmo ei siak ani u zei. Koinin chu riat mak me” ava ti u na.

3Hatuka Pitor le a zolai khat ret ha asuaka than tiang ase u na. 4Anin u atan rita ase u na. Hava a zolai angkhat han Pitor chu akhel vinga mansana thana a lei va suaka. 5Hatuka anbuna asung ava venga puan annal ngai chu a om chita ava muna tenchu asunga va lut maka. 6Simon Pitor chu ama anuka ava suaka, than sunga ava lut lena puan annal ngai chu anbuk chita ava muna. 7Isua alu tianga puantuidui a om ha puan annal ngai bila om maka, abinga anzual rapa alei oma ava muna. 8Hatuka hava zolai mansana thana alei va suak ham asunga ava luta hankeng ava mu le chu ei iam ani zei. 9Asik chu athi ngai bil ata ei lan thui rang ti Pathian lekhana chong ha ei la riat thei u nok a la ni na. 10Hava suale chu a zolai ngai ha a in dena akir ret u na.

Mari Magdalini koma Isua Anlang

(Mt 28.9-10; Mk 16.9-11)

11Mari chu than kola anding chiana achapa a oma, hatuka ei chap chuchunga than sung ava venga; 12hatuka vanpalai anni puan ngui ansil chu Isua ruak ei zalna han angkhat a lu sip tiang atei khat ha ake thuan tiang ansut u na ava muna. 13Amani han, “Nupang ichangmo nei chap?” ati u na. Ama han akom u na, “Ka Puma chu ana choi pe viak u zei, hontiangmo ei na va re pe u ani zei! Kei riat lai nok,” ati na a masanga.

14Hatuka anuk tiang anhoi le chu Isua anding chu a muna; tenchu ama ha Isua keng ati na riat thei lai maka. 15Isuan, “Nupang, ichangmo nei chap?” Tumo nei ravan atina a rakela.

Aman chu rahuan a en pu khat ni inti, ti mandon achoia hatuka a koma, “Ka pu, nangin nei khai viak aniten nei va siakna mun na ril ro ba hatuka koi ngal sena va lak ka ting,” ati na.

16Isuan ama ha, “Mari!” ati na. Ama chu amaton tiang anhoia akom, Hebrai chonga “Rabboni!” ati na. A omzia chu “Minchupu” tina ani.

17Isuan akoma, “Na la ton di no ro, asik chu atun ten hin Pa koma ase rang la kal makung. Tenchu ka parual ngai kom se tan la akom u na, Ka Pa, na Pa u, ka Pathian hanuk na Pathian u koma akal rang ka ni zei ati, ati na na va ril pe ro,” ati na.

18Hasik han Mari Magdalini chu a zolai ngai koma asena, ama han Puma ei mu le akoma chong ei ril ngai dora ava mantheia.

Isua Zolai ngai Koma Anlang

(Mt 28.16-20; Mk 16.14-18; Lk 24.36-49)

19Hava nikhua ha hapta ei anphutna mansa nikhua azing bupa Juda ulian ngai anchi tuara a zolai ngai chu in suakkhar akal tita ankhom u na; hava han Isua chu akar u na ahong andinga, “Na chung u na phukdaina om rase,” ati na. 20Hava ati suale akom u na a kut le a kang aman muna. A zolai ngai chu Puma ei mu u na arai amansan sabak u na. 21Isuan akom u na, “Na chung u na phukdaina leng rase, ati reta. Ka Pa han koi ei na hongtir anga nangnim keina tir u,” ati na. 22Hava ati suale achung u na a thinthi a sema hatuka, “Ratha Anthiang chang u ro. 23Mi masial ngai nei madual u tak pei anduala om inti, hatuka mi masial ngai nei madual u nok tak pei chu andual luia om inti,” ati pe na. #Mt 16.19; 18.18

Isua le Thoma

24Isua akom u na ahong lai han a zolai somleianni ngai bila Thoma, “Anphir” ei ti u ha chu abil u na lei om maka. 25Hasik han a zolai atei ngaiin, “Koini chu Puma na mu sua zei,” ati pe u na. Thoma han akom u na, “A kuta khorka anhemna anuk ka muna ka kut maria nget le ka tona hanuk akang mer ka kut le ka matuai nok maseng iam no ning,” ati na.

26Hapta khat suale a zolai ngai chu in sunga avan chun ret u na hava han Thoma ham a oma. Suakkhar dora ankhar zitam nisela hava han Isua chu abil u na a hong andinga hatuka, “Na chung u na phukdaina om rase,” ati na. 27Hava suale aman Thoma koma, “Hiva hin na kut maria le hong matuai tan ka kut anni hong en ta; Hanuk chu na kut hong son tan la ka kang mer hong matuai tan na malung songankhar chu manbang tan iam ta ro,” ati na.

28Thoman akoma, “Ka Puma, ka Pathian!” ati na a masanga.

29Isuan akoma, “Nei na mu sika nei na iam? Mu lui ta na koi a na iam ngai chu itukmo borsang ei tung u rang ani na,” ati na.

Hiva Lekhabu Derdin

30Isuan a zolai ngai mit muna boidong sin atei atampa ei man lang pe ani na, tenchu hava ngai ha hiva lekhabuna anziak sua lai maka. 31Tenchu Isua hi Krista, Pathian Naipasal ani ti nei iam thei u na ranga hiva ngai, ei anziak ani, hanuk chu nangnin nei iam tir u na lehan ama na han damna nei manthei u na ranga.

Currently Selected:

JOHONIN 20: RANGBSI

Highlight

Copy