LUKIN 1
1
1Koini na kara rui atung min anziak rang aval u na. 2Amu ngaiin ei na ril u anga aphut len ata amu le a thang aril ngai. 3Hasik han aphut len ata aveng koini sika antang thiara maziak ila santi ka ti, O Theophil. 4Hiva hi nei anchu ngai dora nei anthiang theina ranga.
Johon Baptispu Anzir Rui
5Judai rama Herod reng achang lai han, chaizung khat a raming Zakaria ama ha chaizung angkhat Abija tianga mi. A nungak Elizabet ham chaizung insungko mi. #1 Kr 24.10 6Anin u Pathian mita asa le Puma dan ankhip ani u. 7Nai nei u maka Elizabet ha aching hanuk atar ani rit u na.
8Nikhat chu Zakaria a don a chuka Puma Biakina chaizung sin a thona. 9Ei tho u dan anga ama don achuka marim ahui ahal ranga Puma Biakin sunga ava lut. 10Marim ahui anhal lai tak han mipuiin tualpanga bor azong u na.
11Pathian vanpalai maicham changtiang andinga ahong anlang, marim ahui ei anhalna han. 12Zakarian amuna achi. 13Tenchu vanpalai han, “Zakaria achi no ro, Pathianin na borzong alei riat, na nungak Elizabetin naipasal mazir inti a raming nei phua rang chu Johon. 14Na raisanna lani inti mitampa arai lasan unti anzir tik. 15Pathian riata milian ni inti, zu anri anhaina ton thei mak anzir len ata Ratha Anthiang bit inti. #Mip 6.3 16Israel mi tampa a Puma a Pathian kom hong tuang ret inti. 17Pathian matona Eliza anga arat le aliana se inti, pa le nai ngai munkhata hong ruai ret inti.” #Mal 4.5-6
18Zakarian vanpalai kom ei ti, “Hintin hin anin hontin kei riat rang? Atar ka ni zeia ka nungak um atar zeia.”
19“Koi hi Gabriel,” vanpalai han a masanga, “Pathian matona anding ana hongtir, hiva thangahui aril rang. #Dan 8.16; 9.21 20Ten ka thang iam mak chena ahun taka ani rang. Nei iam nok sika chong thei no ta ni, chong kuluia nei om rang ka chong tin adik maseng.”
21Havalai tak han mipuiin Zakaria amaruang u na: Ichangamo Biakin sunga ei sot sabak, ati u na. 22Ahonga suaka chongthei maka anralna ei mu ranga a iam u na chong thei lai lui ei ni sika a kut le a chonga.
23Biakina a hun ahek le a ina ase. 24Nukhon uala a nungak Elizabet anraia tha ranga in mamaka. 25Nukkhita, “Puman anasan Aman mi matona ka maimokna a khai zei,” ati.
Isua Anzir Rui
26Elizabet ei anrai tharuk changa Pathianin Gabriel a tir Galili khopui Nazaret a. 27Ama han reng David akhuka mi Josephin ei lak rang nungak Mari kom thang ahong bang. #Mt 1.18 28Ha vanpalai ahonga atina, “Na kom, phukdaina om rase, Puma na bila a om borsang ana mantung.”
29Mari achan anpona vanpalai koma thang ariata, itinamo ati. 30“Achi no ro, Vanpalaiin atia, Pathianin lungkham anamu, 31Von choi na tia naipasal mazir na ti, Isua atia raming phua na ti. #Mt 1.21 32Ama chu lian inti, Ansangkhit Naipasal atia anpai inti, akhuk David anga amam reng lani inti. #2 Sam 7.12,13,16; Isa 9.7 33Hatuka Jakob akhuka umor reng changa, a rengchangna nikhua hek no ni!”
34Marin vanpalai kom a tina, “Anthiang ka ni pasal le ngal lan remakung hontinmo nini?” 35Vanpalaiin a masanga, “Na kom Ratha Anthiang hong inti, Pathian ranak na chunga chum inti, hasik han ha naite anthiang ha Pathian nai anti inti. 36Na unai nu Elizabet ha re ro, nai nei lai no ni atina tenchu atun hin tharuk ani zei ei anraina. 37Asik chu Pathianin ei tho thei nok ngal om mak.” #Anp 18.14 38Marin ei ti, “Koi hi Pathian suak ka ni nei ti anga ka kom tung rase.” Hatuka vanpalaiin a mak.
Marin Elizabet ava En
39Hava suale han anrapa Mari ansina tang ram khopui Judai rama asena. 40Zakaria in ava luta Marin Elizabet apham. 41Marin ei pham Elizabetin ariata a von sunga naite singansa, Elizabet ha Ratha Anthianga abita. 42Anring pana ankheka, “Nang hi nupang kara chanasa na ni na rila mara ham ani. 43Ichangamo hintin aliantak ka chunga ei tung rang, ka Puma nu ana en ahong. 44Nei na pham kei riat le ka von sunga naite antom. 45Nang a iam nu van asa na ni asik chu Puma chong ei kip rang ei ni sika.”
Marin Anpakna La Tho
46Marin ei ti, #1 Sam 2.1-10
“Ka rathan Puma a manpak;
47Ka ratham a raiasan Pathian anan dampu sika,
48Asik chu asuak annuai mangil mak! #1 Sam 1.11
Atun ata chu mi doran van asa na ti inti,
49Asik chu Pathian ranak anei han
Ka chunga sin alianpa ei tho sika a raming chu anthiang.
50Ama lalchi tho ngai chu akhuk
kipa lungkham amu.
51Aban alian le sin alianpa a thona milian
ngai chu ei mandon le amasiat.
52Reng alian ngai chu a sutmun ata amasula, #Job 5.11; 12.19
annuai ngai a mansang.
53Ancham ngai sak asapa ngai le aman khop
a nei ngai kut koronga a man se.
54Na chipui ngai kara achongtin ha
ariattita asuak Israel ahongsan.
55Abraham lungkham ei mu rang ariat tita, #Anp 17.7
a nai ngai um umor tenpei.”
56Mari ha Elizabet le thanthum a oma a ina a kir ret.
Johon Baptispu ei Anzir
57Elizabet nai ei nei hun asuak le chu naipasal a mazira. 58Puma ei satzia azil akiang ngaiin ariata, Elizabet a bila amanin arai a mansan u.
59Hapta khat suale vun at ranga ati u na a raming um a pa raming anputa Zakaria ati rang ati u na. #Lev 12.3 60Tenchu a nun, “Johon ke nei ti rang,” atina.
61“Hava raming le nei anphana ngal ommak do,” ati pe u na.
62Ankhina le a pa a rakel u na, “Imo raming nei phua zot,” ati u na.
63Zakarian anziakna a zonga a maziaka, “A raming chu Johon.” Hatuka mipui anlai huak. 64Havalai tak han Zakaria achong ret theia, Pathian a manpak. 65A kho mi ngaiin achi u na, hava rui ha tang ram tiang Judana avan thek. 66Ariat doran andonna a neia hatuka a rakel u, “Hiva naite hi imo ei ni rang?” Anthiang vang Puma ranak a bila om.
Zakarian alei Ril
67Johon a pa Zakaria Ratha Anthiang abita, Pathian chong arila:
68“Tho Puma manpak u rei, Israel Pathian ha!
A mi ngai asan ranga a honga a mazok zei.
69Koini narang Sandampu lian tak ana pek,
a suak David akhuk ata.
70Tiana ami a deari anthiang le a khomak ansamna,
71Anadui ngai ata anan zok ranga,
anan mumak ngai ata anan zok ranga.
72Na chipui ngai lungkham mu ka ting atina
hatuka a chongtin anthiang ha mangil maka.
73Na chipui Abraham koma chongtin ha.
74Anadui ngai ata na mazok inti,
achi thak luia a sin anan tho ranga.
75A makunga na damsung anthianga asa dima a oma.
76“Ka nai nang hi Pathian Ansangkhit a deari lanti na ti. #Mal 3.1
Puma matona a lampui asin ranga lei se na ti.
77Nei siatna u ngai anduala zok un na ti atina a mi ngai ava ril.
78Koini na Pathian chu lungkhamna abit.
Aman sandamna ra-ang le na el inti,
79hatuka thina ralima om ngai vanram ata el inti, #Isa 9.2
Phukdaina tiang nei phet theina rang, na ke phet rung inti.”
80Ha naite ha taksa le rathana ansona. Israel mipui matona anlang man pei chu philchar rama a om.
Currently Selected:
LUKIN 1: RANGBSI
Highlight
Share
Copy
Want to have your highlights saved across all your devices? Sign up or sign in
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.
