BINZEN 39
39
Josef lo Potifar Nu
1Ishamel tsipwen dan le Josef zen Ijipt ki tsügü Potifar tse kethyü raja gü hensin nyu kedanyu nme ka jwela, tsügü le raja ka rikhun nyu sokeda thyü bin. 2Npugü le Josef zen hüo, a-thyü pe no gwakenyelo. A-le a-npugü Ijipt nyu gü kanyu bin hü, 3tsügü le Npugü le Josef zen hüo a-le nyuthyü yo aphu gwakenye kebin hyulo. 4Potiphar le a-shwi pe a-kenyüo no a-go thyülo; tson-o a-no a-ka lo a-hon aphu kentsen gü thyüshü. 5Tsügerho Josef genyu Npugü le jochü pe Ijiptnyu gü kakhün, a-kanyu kebin aphu lo a-low nyu shü. 6Potifar le a-ketyüketsü nti a-me tha aphu khipe Josef tenyen la.
Josef le kethon keda lo zegwa, 7tsüselo a-npugü nu le Josef shwi a-yhüdyü lo lao no a-zenzhü lotse so. 8A-le nmvu le tseo tsügi ka zoshü, “Ale hika kebin genyu, a npugü le kanyu kebin dan nme rüchün a-nyun leho mvu laso. A-le ano a-hon aphu kentsen gü thyüshü laso. 9Ale kanyu a-hon aphu so kekvu sen bin, a-le n nti a-me thame pe aben ka shükemvu ndi. Tsonya tselo ale dihontse serikemvu thyüo mu pe Sunggigü ntsun tila?” 10Tsügi le khenyütsen Josef ka zo bin-e, a-le tsügi zenhü mvula.
11Ai khenyü me Josef le kanyu a-thothyü titse yü, lo tsüka ka günyu gonyu temi nme ndi. 12Tsüselo tsügi le a-phi sülo-o a-ka zoshü, “Ryü azen jülo.” Ai a-le a-phi khelao tin kamhun ki chwila. 13A-le aphi khelao kamhun ki tinchwi kela ka, 14tsügi le a-kanyu gonyu ju koshüo zoshü, “Hi shwishü ta! Anye pfü le zenryü kanyu keshü Ibrinyu higü le ngun nshwe bin nle. A-le ajütsen ki ryü asü titse ndoso, ai ale nrasen shüla. 15Ale nrasen kebin nyülo-o, akhoka a-phi khelao tinchwi laso.”
16Tsügi le Josef npugü le ka ki ryü kemvuthen a-phi pe bin njü. 17Tson-o a-le tsü pe a-ka zoshü. “Nle zenryü hika keshü Ibrinyu do gü tsüle a-jütsen ki ryü a nshwe le. 18Ai ale nrasen keshü ka, a-phi khelao kamhun ki tinchwi la le.”
19Tsüselo Josef npugü le nthün sa-o 20Josef ten pe raja gü do le bin kehü doka nyu shülao a-le tsüki bin. 21Ai Npugü le Josef zen hüo jochü pe a-tsü, tson-o doka kekhwen keda gü le a-shwi pe a-kenyü la. 22A-le Josef pe do kechanyu aphu kentsen gü thyüshü, lo dokanyu thatho aphu pe a-tenyen la. 23Doka kekhwe keda güle Josef tenyen kela dan nri mvula, Npugü le Josef zen hüo, a-tho aphu nyu a-no thyü pe gwalo kebin genyu.
Currently Selected:
BINZEN 39: REGSBSI
Highlight
Copy
Compare
Share
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
