JOHAN 10
10
Tanyü Kekhwen Jokejvü
1Ale hagun ka zo tsentsü shüti, “Temi lihigüe tanyü chwida khenpvü nyu yü mvuo kechaki pela yü kehünyu le kerühu nyu lo mehon seketyü nyu. 2Ai temi lihigüe chwida khenpvü zen keyünyu, tsünyu le tanyü kekhwen nyu. 3Khenpvü kekhwen gü le khinshye pe tsünyu tsü hünyo; lo tanyü le tsünyu khwenyü hünyo; lo tsügü le a-npvü a-tanyü zan ko-o tsüdan khwen hünyo. 4A-le a-npvü a-hon dan zen kü chwilo, lo a-le tsüdan mhundyü ki hü, lo a-tanyü dan le a-sithen hünyo, kechamvule tsüdan le a-khwen sha kethyü genyu. 5Lo tsüdan le me kechanyu sithen mvule tin sen-o nrhi lati; kechamvule tsüdan le me kechanyu khwen sha hü kemvu genyu.”
6Tson-o Jisu le jokejvü hilope anyugun ka zoshü; ai anyugun le Jisu le anyugun ka zo keshü a-kon shalo mvula.
Jisu le Tanyü Kekhwen Kegwagü
7Tsügenyu Jisu le anyugun ka, “Ale hagun ka zo tsentsü shüti le, ale tanyü dan khenpvü gü. 8A mhundyü ki keryü nyu le aphu kerühu nyu lo mehon seketyü nyu nti; ai tanyü dan le tsüdan khwe nyü hü mvu. 9Ale chwida khenpvü gü; temi lihigüe agenyu yü kethyü gü le a-kenilo ti. Tsünyu kekhwen gü le zen chwi lo yüo a-chvü hyulo ti. 10Kerühu nyu le rühu titse lo boshvu titse lo tha nke titse kethyü kerüchün a-me thakecha rüchün-o ryü hü mvu. Ale meno kerhün hyulo titse lo tsü hyu chonlo titse kethyü genyu ryü.
11“Ale tanyü kekhwen kegwa gü. Tanyü kekhwen kegwa gü le a-tanyü genyu a-phou hoshü hünyo. 12Tanyü le a-hon kemvu, tanyü kekhwen ketsin gü kemvu, meno a-jonshye zen kehünyu le teken gunkeryü hyushü yatselo, tanyü dan khelao tinla hünyo, tson-o teken no tsüdan tenlo njüo tsüdan no nren nru tinla hünyo. 13Kechamvule a-le meno a-jonkeshe kerüchün a-me tanyü dan phin we rüchün hü kemvu genyu. 14Awe tanyü kekhwen kegwa gü; lo ale a npvü ahon dan shabin nyo, lo ahon dan ko asha bin nyo. 15Apvü le asha kebin hontse ako Apvü shabin nyo. Ale tanyü dan genyu aphou hoshü titse bin nyo, lo hinyu binkemvu a tanyü kechae bin zun. 16Ale tsüdan ko zen gunryülo mvulo shvu, lo tsüdan le akhwen nyülo ti; tson-o aphu kesin pe dan me thyü, lo anyugun kekhwen-e nme thyü ti.
17“Lo Apvü le akeso le, kechamvule ale aphou loni titseo hoshü gü kezhü genyu. 18Temi nme-e aka tsü selo mvule ale anpvü tsü hoshü gü zhü. Hoshü titse kethyü a kekvu le bin nyo, lo khinilo titse kethyüe a kekvu le bin nyo. Jo hile Apvü kanyu hyulo laso.”
19Jo tsügü genyu Judanyu dan nyu jo kechacha thyü soryü la. 20Anyugun temi kechon le, “A-le tero gwakemvu zen hünyo! Lo kenunyu! Hagun le nyuthyüo a-jo nyü hü nla?”
21Kechanyu le zo-o, “Jo hile tero gwakemvu le zen kehü jo kemvu. Tero gwakemvu nme le a-yhütyü keponyu yhütyü thyü ngwashü logwa ole?”
Judanyu Le Jisu Kenikela
22Lo tsügwünkho ka tsüle Jerusalem Kershvuka thyü ketsüni kethyü nga tilo la, lo tsüle tsangse ki laso. 23Lo Jisu le Kershvuka nyu Solomon kasü hensin nyu nsin nshye tse bin. 24Tsügenyu Judanyu dan le ryüo a-hunpvülo njüo a-ka, “Ditsü laki thyü nle agun no sha ntsenlo mvu bin tila? Nle Khrista gü letselo nle agun ka zo ntsen shüla ta.”
25Tsüselo Jisu le anyugun ka, “Ale hagunka zoshüe hagun le tenyen hümvu; lo ale Apvü zan sen-o tha thyü kehü tsüle a jünzo hünyo. 26Ai hagun le a tanyü dan kemvu genyu tenyen hümvu. 27A tanyü dan le akhwen sha, lo ale tsüdan sha, lo tsüdan le a sithen hünyo. 28Tson-o ale kethonthen kerhün khipe tsüdan tsü hünyo; lo tsüdan le thame kae nkela loho, lo temi nme-e a ben nyu tsüdan se sentinla loho. 29Tsüdan khipe atsü kela Apvü tsü le tha seni nyeki gon; lo temi nme-e Pvügü ben nyu tsüdan se sentin loho. 30A, lo Pvügü ayi le nme.”
31Tsontsin Judanyu dan le tso pe a-jon titse sola. 32Ai Jisu le tsüdan ka, “Pvügü ka a tho kegwa kechon thyü pe hagun hi; thatho tsüdan digü genyu hagun le tso pe a jon titse bin nla?”
33Judanyu dan le Jisu ka zoni, “Ntho kegwa genyu agun le tso pe njon mvu, ai Sunggigü kenkhin jo kezo genyu; lo nle temi nme, ai nle nnpvü nle Sunggigü letse kehü genyu.”
34Jisu le anyugun ka, “Hagun tejvü nyu, ‘Hagun le teronyu’ tse Sunggigü le zo, tson kethyü thu njü mvu ole? 35Lo ngun le shabin nyo ketsinlesü le kezo dan tsü ketsin kethonthen, lo Sunggigü le temi tsüdan tsü kope teronyu tson, a-le a-jolo pe ketsü temi dan ka. 36Ale Sunggigü Nyu, tson keshü genyu, hagun we tsüle Sunggigü le A-npvü a-le nshün letseo nipe kazü nyu keshü gü ka, Nle Sunggigü nkhin hünyo tson tila? 37Ale Apvü tho thyü hü mvu tselo hagun atenyen nya. 38Ai ale tsü thyü hü tselo, hagun le a tenyen mvue a thogü we tenyenlo ta. Tsonlo yatselo hagun le Pvügü le anyunki bin kethyü lo ale Pvügü nyu ka bin tsekethyü sha lo rüchünlo ti.” 39Tsüselo anyugun le Jisu tenlo titse niso, ai a-le anyugun ben nyu tinla.
40Tson-o a-le Jordan ri nken chwio Johan le me baptaiz thyü kehü bin ki gü bin tinla. 41Lo temi kechon le a-ki ryülo; tson-o anyugun le, “Johan we nduntho nme-e thyüshü mvu, ai Johan le temi ligü rüla zokeshü le a-ketsin nti.” 42Tson-o tsükatsü temi kechon ki-e a-tenyenlo.
Currently Selected:
JOHAN 10: REGSBSI
Highlight
Share
Copy
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
