JOHAN 7

Jisu Sikezen nyu dan Le Tenyen Mvu Kela

1Tson-o Jisu le Galil lojvü nyu ho tinla; Judanyu dan le a-dushvula titse a-fülo kela genyu a-le Judia lojvü ki hünyü mvula. 2Lo tsüle Judanyu le Then nyu bin-o Nga kehü jon kho nnila. 3Tsügenyu a-sikezennyu dan le a-ka, “Nle senthyükelonyu dan no nle thyükehü ntho hyulo nrün genyu Judia lojvü ki gun lochi. 4Temi lihigüe a-zan no chwilo nyülo kebuo thame thyü hü kemvu genyu, nle tha hidan thyü kebin si genyu kazü aphu no shalo chi.” 5(Lo tsüle a-sikezen nyu dan-e a-tenyen kemvu genyu.)

6Tsügenyu Jisu le anyugun ka, “A gwünkho we timvu zun; ai hagun gwünkho we tizin bin hünyo. 7Kazü le hagun ntsüla loho; ai ale a-tho le gwamvu letse zo keshügenyu a ntsü kehü gwünzin. 8Hagun nga ka gun lo nye, a we a jon le ryü mvu zun kethyü genyu gunlo ho.” 9Tson-o a-le anyugun ka jo tsü zo shüla njüo Galil lojvü nyu bin tinla.

Then Nyu Bin-o Nga Kethyü

10Ai a-sikezennyu dan le nga nyu gunla ntsin a-le ndo mvule kebuo nga nyu gun. 11Lo Judanyu dan le nga ka tsü a-füo,“A-le dikipon bin nla?” 12Tson-o temi dan le a-rüla zo pe keyhun kerun sola. Peha le, “A-le temi kegwa nme le,” tse. Lo kechanyu le, “Nmvu, a-le temi sa kehü gwünzin,” tson sola. 13Ai Judanyu kenshvu genyu temi nme-e a-zan zoshwi shü mvula.

14Ai nga lvuka Jisu le Kershvuka nyu gü me senthyü. 15Tsügenyu Judanyu dan le anyugun dunthyüo, “Temi higü hile lesüka nyu kegun gwünsha mvulo nyu tsethyüo lesü shalo la?”

16Jisu le anyugun ka, “ale pe senthyü kehü hile a jo mvule a nikeshü gü jo. 17Temi lihigüe Pvügü kenyü thyü hü yatselo jo tsüle Sunggigü kanyu chwiryü le anpvü akanyu chwiryü yo tsü shaloti. 18Temi lihigüe a-npvü a-kanyu tha zo kehünyu le a-npvü a-zan kechwi fü hü nyo, ai lihigüe a-nikeshü gü zan fü kehünyu le, tsüle a-ketsin,lo ketsinkemvu nme-e a-nyun ka ndi. 19Mosa le tejvü gü khipe hagun tsüshü mvu ole? Ai hagun temi nme-e tejvü tsü thyü lo zen hümvu. Hagun le nyu genyu adushvu kela ndo hü nla?”

20Temi dan le, “Nle tero gwakemvu gü zen kehü hile la? Segü le n dushvu kela ndo hü nla?”

21Jisu le anyugun ka, “Ale tha nme thyüshü ntsin hagun we tsü le hagun dunthyü kü. 22Mosa le gikerü jvü khipe hagun tsüshü (tsüle Mosa kanyu mvule hagun bon nyu kanyu) lo hagun le Sabbath jon nyü me girü hü nyo. 23Hagun le Mosa jvü gwünrho lalo kenshvu genyu Sabbath jon nyü me girü hü yatselo; ale Sabbath jon nyü me thyü ngwa keshü genyu hagun le a genyu hagun kenyü mvu ole? 24Tegwen ki kehyu gü ge kegwa keshvu rüchün mvule a-ketsin gü nyu rüchün lo nye.”

Hile Khrista Gü Ole?

25Tsügenyu Jerusalem nyu peha le, “Temi higü hile anyugun le dushvula titse fü kehü gü kemvu ole? 26Liki li, a-le lihontse tha zo bin nyo, lo temi nme-e a-ka thame zo bin kemvu le. A-le Khrista gü tse kethyü sharhinyu dan le shalola ketsin ole? 27Lihi thyüe nle temi higü hile dikipon gunryü yo tsü shabin nyo; ai Khrista le gunkeryü we a-le dikipon gunryü yo temi le tsü shalo ho.”

28Lo Jisu le Kershvuka nyu me senthyü nra sen-o, “Hagun le asha lo ale dikipon ryü yo tsüe sha, ale a kendo thyü ryü mvu, a nikeshügü tsüle ketsin, lo hagun le a-sha hümvu. 29A we le a-shabin; kechamvule ale a-kanyu chwiryü, lo a-le a nikeshü genyu.”

30Tsüselo anyugun le a-ten kelo ndo sola; ai a-jon le ryü mvu zun kethyü genyu temi nme-e a-ben shwenpe a-ge shümvu. 31Lo temi kechon le Jisu tenyenlo njüo anyugun le, “Khrista le keryü ki a-le temi higü le thyükeshü nyeki nduntho thyü chonshü ti le nyu tsethyü yo no?” tson sola.

Jisu Tenlo Lotse Me Nikeshü

32Farisinyu le temi dan le Jisu rüla zo sa kehü shalo; tsüselo peshünyu lo kedanyu lo Farisinyu tsele a-tenlo lotseo lonyu nishü. 33Lo Jisu le, “Ale jon keshanyu ka hagun zen sin bin tseo a nikeshü gü ki gun lati. 34Hagun le a fü ti, lo a kebin bin nyu ryü loho.”

35Tsügenyu Judanyu dan le anyugun npvü kenthon-o, “Temi higü hile nle a-hyu loho letse, lo a-le dikipon güla ti ole? A-le gü Griknyu senthyü tinla ti ole? 36A-le hagun le a fü ti, lo a hyu loho, lo hagun le a kebin bin ki ryü loho, tson kehü jo hile nyu la?”

Kerhün Züri

37Lo nga kekhin nyü Jisu le solo njüo jozo tetso-o, “Temi lihigüe teri kehünyu no ryüo tsülo lo. 38Temi lihigüe a tenyen kelo gü we ketsin lesü nyu kezo hontse a-ge kerhün züle tsun chwiryü ti.” 39A-le a-tenyen kelo nyu no hyulo nrün Kapu gü rüla zoshü; lo Jisu le zankechwi thyülo kemvu zun genyu Kapu güe khishü mvu zun.

Temi Le danhvu Thyükela

40Tsügenyu temi tsüdan peha le jo tsü shalo njüo, “Higü hile sidyükeshagü ketsin!”

41Lo kechanyu le, “Hile Khrista gü!”

Ai peha le, “Kha, Khrista le Galil nyu chwiryü ti ole? 42Khrista le David nyenyu lo David le nduka kebin rünyi Bethlehem nyu chwiryü titse Ketsinlesü le zoshü njü mvu ole?” 43Tson-o a-genyu temi dan no danhvu thyüla. 44Tson-o peha le a-tenlo nyü so; ai temi nme-e a-ge a-ben shwenshü mvula.

Kedanyu dan Le Tenyen Mvu Kela

45Lo Lokethyünyu dan le peshükeda ju lo Farisinyu dan ka ryü, lo tsüdan le anyugun ka, “Hagun le nyuthyüo a-zen ryü mvula?”

46Lo lokethyünyu dan le,“Temi nme-e a-hontse jo zolo mvu!”

47Tsügenyu Farisinyu dan le anyugun ka, “Me no hagun sala ole?” 48“Kedanyu nmvue Farisinyu peha le a-tenyenlo la ole? 49Ai tejvü sha hükemvu temi higü hile kesenkesü pvü tin laso!”

50Lo anyugun dan nyu temi nme nduka Jisu ki gunkeryü gü Nekodema le anyugun ka, 51“Ngun jvü le mejo shamvu lo metho shalo rimvuo me nkhin hü ole?”

52Anyugun le a-ka, “Nko Galilnyu ole? Swü gun yatselo, Galil nyu sidyükeshanyu nme-e soryü mvu tsekethyü nle sha loti.” 53Tson-o anyugun le anyugun ka ki gunla.

Currently Selected:

JOHAN 7: REGSBSI

Highlight

Copy