LUK 14
14
Jisu Le Zü nyuphou Kepvünyu Nme Thyüngwa Keshü
1Tsüselo Sabbath jon nme nyü Jisu le Farisinyu dan nyu kedanyu nme kanyu ho titseo yü ntsin mele a-nri ryü bin. 2Lo zü nyuphou kepvünyu nme le a-mhundyü ka kebin hyulo. 3Tsüselo Jisu le tejvü keshanyu lo Farisinyu dan nthon-o, “Sabbath jon nyü kehokenyünyu thyü ngwa keshü le tejvü le nmvu la?” tson-o ketso.
4Ai anyugun le nma tse gwünzin tinla. Tsontsin a-le temi tsügü kesüshüo a-no gwalo njüo tinla. 5Tsontsin a-le anyugun ka, “Hagun peha le hagun gada nmvue hagun thu le bin-o tsüle tekhwün kü nyu che tsüla yatselo, Sabbath jon nyüe tin fümvu gü süsen chwiryü mvu ti ole?” tson-o ketso.
6Tsüselo anyugun le jo tsü shashü njüo thame zokelo anyugun rhodyü la.
Me singü le Me Kensin gü
7Tsükatsü ho lotseo ko zen keryünyu dan le bin kegwanyu füo dun kebin hyushüo a-le anyugun ka jokejvü zoso: 8“Temi lihigüe hagun no senhü ho nyu ryü lotse hagun koshüe gü kedanyu bin nyu bin tinla nya; a-le hagun nyeki teshwen kepvünyu peha koshü bin-e shalo keho genyu. 9Lo hai mihvu ko keshü gü le ryüo nka, ‘Temi ligü bin phashülo tse solo,’ nle kejo-o gü bin ketsenyo tsingü ki dun tinla ti. 10Tsügenyu mele nkoshü yatselo, gü bin ketsenyo tsin ka dunlo chi; tson yatselo nko keshügü le ryülo a-le nka, ‘A pvügü, nle gü bin ketetso din ki dunlo chi,’ tson so-e sha loho. Tsonlo nko ryüo ho kebin nyu aphu mhundyü ka teshwen pvükvu nrün genyu. 11Kechamvule temi lihigüe a-npvü a-thyü pe gon kehünyu thyü pe shenla ti, lo temi lihigüe a-npvü a-thyü nshen kehünyu thyü ngon shüti.”
12Tsükatsü Jisu le a-ko keshü gü ka, “Nle lonyü nmvue nhennyu me zen-o ho titselo, npvü nshen nmvue ntsagü sikezen nyu nmvue nshvunye nmvue nkazonkazin kenya nyu nti ko nya nye. Tsüdan we nkoni zen gü honi lae shamvu. 13Ai nle lika hikae me zen-o ho titselo, thakendinyu, phouhanyu, phayhonnyu, a-yhütyü keponyu, tsüdan kolo nye; tsonyatselo nle jochü pvülo ti.” 14Anyugun le thame sen-o njün ketunlo keho genyu; tsüntimvule kentsen nyu le rhünni keso nyü njün ketun shüti.”
Keho Rüla Jokejvü
(Mt 22:1-10)
15Tsükatsü anyugun ho kebin nyu nme le jo tsü shashü njüo Jisu ka, “Sunggigü kedanyu ho kelonyu le kengvü tsin,” tson.
16Ai a-le temi tsügü ka, “Temi nme le keho ndo sa pe bin njü, tson-o a-le temi kechon koshü. 17Lo a-le ho nrün mün ka a-gonyu nishüo nchwenyu kokeshünyu dan ka, ‘Ryülo, tha aphu ndolo kelasi genyu,’ tsonkethyü zoshülo tseshü. 18Ai anyugun aphu anyugun jo kememe tseo tha nmeme zo küla. A-kerigü le a-ka, ‘Ale low nme heishü laryü, tsügü shwishü mvuloshvu le, nle a njün lo a hoshülo,’ tsonla. 19Lo kecha nme le, ‘Ale zen-o thathyü kehü methu kepen pvün hei njü laryü, ale tsügü tsüdan shwishü tile, nle a njün lo a hoshü lo,’ tsonla. 20Lo kecha nme le, ‘Ale tenu nme lope bin njü nyo, tsügenyu ale ryülo mvule,’ tsonla.
21“Tsüselo gogü le ryüo jo tsü lope a-npugü ka zoshü. Tsontsin ka tsünyu npugü le a-kenyü mvu salo njüo a-gogü ka, ‘Nle gü nyida gü tsonda ki-e lo tsonba ki-e tha kendinyu, lo phouhanyu lo a-yhütyü keponyu lo phayhonyu zen-o hinyu whütse ryülo chi,’ tsonshü. 22Tsüselo gogü le, ‘A npugü, nle thyülo tse keshügü tsü thyülo laso, ai ntsokae bin peha le nrun bin zun.’ 23Tsüselo Npugü le a-gogü ka, ‘Nle gü tsoncho da nyu lo tsonba ki-e me ko zen ryüo aka kesü thyü shülo. 24Kechamvule ale hagun ka zoshü ti, nchwenyu ko keshü dan tsüle nme-e a-le keho ndo kenjü nyu hi ryüo ntsinlo keho genyu!’ ”
Jisu Le Senthyükelo Ketsinnyu
(Mt 10:37-38)
25Tsüselo temi danda le a-zen kehü ka, a-le rani gü tsüdan ka, 26“Temi lihigüe aki ryüo a-npvü a-pvü a-jvü lo a-nunyu lo a-nyenyu lo a-tsasikezen nyu lo a-lüginyu lo tsüntimvule a-phue tepen mvulo kemvu we, tsünyu le ale senthyükelonyu letse zolo nrün ndi. 27Temi lihigüe a-npvü a-krus pen mvu tseo a sithen kehünyu le ale senthyükelonyu letse lo nrün ndi.
28“Khelo, tsonlo hagun peha le tsokhwen nme khwenti tselo, nchwenki a-le bin kegwa thyülo njüo tha dikho pe tsü khwen tiyo, nmvue a-le tha tsügü thyü gü tilo tile mvuyo, tsekethyü rüchün kemvu segü le bin nla? 29Tsonmvuo keshanyu laka a-le a-binzenlo njüo thyü gü tilo hola yatselo, mele tsü kehyunyu aphu a-shwinyüo, 30‘Ha! Temi higü le hithyü tse njüo thyü kügü ti loho la se hile!’ tson so-e sha loho le.
31“Nmvue rajanyu nme le raja kechanyu nme zen kega titse kegun ka, ‘A-le bin kegwa thyülo njüo, a-le temi yie tseryü zen gü kechanyu temi yie nki a-zen-o kega titse ryü kezhü gü zen keteno logwa tile mvuyo, tse kethyü rüchün kemvu raja segü le bin nla? 32Lo tsüle thyü loho yatselo a-zen kega titse kebin gü le nithen ki kehü ka a-le a-lokethyünyu nishüo gü gwathola nrün rüla ketso hünyo. 33Tsügenyu tsühontse hagun dan nyu temi lihigüe a-hon kebin khe tepen-o ale senthyükelonyu thyülo nrün ndi.
A-keyh"n Kendi Tsip
(Mt 5:13; Mk 9:50)
34“Tsühontse tsi tsüle gwa, ai tsi-e a-keyhün ndila yatselo nyu lope gwün nyhünlo tila? 35Tsüle nnyon-e lo thakechae gwün pe gwalo hümvu; meno khepe shwenla kehü gwünzin le. Temi lihigüe a-nyetin le kebin nyu no nyülo chi!”
Currently Selected:
LUK 14: REGSBSI
Highlight
Share
Copy
Want to have your highlights saved across all your devices? Sign up or sign in
Rengma Naga (S) CL Bible - KENSHÜN LESÜ Naga (S) CL Bible
Copyright © 1995 by The Bible Society of India
Used by permission. All rights reserved worldwide.
