JOHAN 19

1Tsaseng wi Pilat na Jisu zanya nu ma kihhe. 2Süpahithu na aghazü pi aliwen sa pi ma pvü thsü. Mathu athsü kenmie pi ma mphi thsü, 3nu wa ma kiza, “Judah nyithu Kadimiwa, kesie kahangwa salo!” Mathu na ma cen cü.

4Pilat na kheneng akhemi wi shhu nu anyitenti wi khi, “Ghangchilo, hi ma kemeshensa jjügi mangla mu meyale kesa nthu ya chü thsüle kesalina hi ma ssinu nthu tuwi ghoben.” 5Tsalina Jisu na aghazü liwen pvünu athsü kenmie mphi nu akhemi wi shhu. Pilat na mathu kiza, “Ghangchilo, anyi tsüna ha le!”

6Keqhaikedi ntsathu nu Kekinyijjen ghikehiethu na ma mukeya wi magha nu khi, “Ma pi kross miwi jenlo! Ma pi kross miwi jenlo!”

Pilat na mathu wi khi, “Nthu ketanla ma ssi wa kross miwi jenlo, kepaghenanye hi ma kemeshensa jjügi mangla mu meya.”

7Mathu na ma luneng, “Ikhang na ayen kesü ben, nu tsü kenie wina ma keshü-u sadha, kepaghenanye ma ketanla ma pi Anyiza Tsawa le saden.”

8Pilat na ajüh hathu zakeya seng wi ma messi kayiya. 9Ma kheneng kadipen wi duya nu Jisu keü, “No khiewi na gho nu?”

Isala Jisu na ajüh nkhila. 10Tsalina Pilat na ma wi khi, “No hi ccüneng nten kwe? Hi no teshichi nyelela pi kross miwi jenya kemehai kekhang keben tsü no nchü kwe?”

11Jisu na luneng, “Anyiza na pi no nkecü tsü no imiwi kekhang nmi. Tsalina hi ghan pi nkwen wi kechiwa kesami diki le!”

12Pilat na ha zakeya wi ma Jisu khushiale alen bha. Isala anyitenti na magha nu “Keujüla no anyi hawa khushi lethu, no Rom Kadimiwa pvüshang nyele! Thowa na ma ketanla ma pi Kadimiwa saten khe ma Rom Kadimiwa keshun jüh khiben le!”

13Pilat na ajüh zakeya seng wi Jisu ssinu akhemi wi shhu nu ma pi ghankenan pen “Alon pi Kezhü” (Ibri jüh wina “Gabatha”) kesa wi tsü donki thsü. 14Tsüna Shhukeya Kho kesa ghena kekiden ghanan lapvü jüwi sadha. Pilat na anyithu wi khi, “Ae, nthu Kadimiwa tsüna ha le!”

15Mathu na magha nu khi, “Ma pathilo! Ma pathilo! Ma pi kross miwi jenlo!”

Pilat na mathu keü, “Hi ya nthu kadimiwa ha pi kross miwi jen thsü mvu ben kwe?”

Keqhaikedi ntsathu na luneng, “Ikhang na kadimi kepa wi nmi, isani Rom Kadimiwa ketan le!”

16Tsaseng wi Pilat na Jisu pi kross miwi jenlo kesa pi mathu kwen wi chia.

Jisu pi Kross miwi Kejen

(Mat 27.32-44; Mrk 15.21-32; Luk 23.26-33)

Tsalina süpahithu na Jisu ssinu akhemi wi shhua. 17Jisu na ma kross pvüya nu apen kesü “Aligü pen” (Ibri jüh wina “Golgatha”) kesa wi tsü wa. 18Ciwi mathu na meshu keni pi ma gweghe jen, manyi pi ghapeli nu Jisu pi anonwa sala jen. 19Pilat na pala hati zhü pi kross miwi chi, “Nazareth nyiwa Jisu, Judah nyithu Kadimiwa.” 20Jisu pi kejen pen tsüna anyunutiwa tetsaki wi ghena anyi kejonla tsü siya. Tsüna Ibri, Latin, nu Grik wina zhütheng. 21Keqhaikedi ntsathu na Pilat wi khi, “Judah nyithu Kadimiwa tsüti nzhü lalo, isala anyi ha ma ketanla ‘Hi Judah nyithu Kadimiwale khile’ tsüti zhülo.”

22Pilat na luneng, “Hi mangwa zhüdha khe tsü zhüdha le!”

23Süpahithu na Jisu pi kejen seng wi ma thsümeni khuya nu gishü mejü sa pi süpahi kesüsü ji sa. Mathu na ma gwomejuwa ali na cü accü kecu kedegü yisü nkemiwa tsü la khuya. 24#Zak 22.18Süpahithu na khokho wi khi, “Ikhang ha nzanqhe lana; isala pi akezen sa nu thowa ji saten khe ghang nan na!” Hawa ha Ntsawajüh wi hati zhü pi ketheng tsü cenyale kesalina:

“Mathu na ithsümeni pi

mathu jawi gishüya,

nu igwomejuwa pi

akezen saben.”

Tsalina süpahithu na tsüti sa.

25Jisu kross kete wi ngan kebenthu na ma jja, ma jja pvünonwa, Maria Klopa wubvü, nu Magdalen Maria. 26Jisu na ma jja nu ma tizenghali keten sansikeyawa manyi na ma kete wi ngan keben muya; tsalina ma ma jja wi khi, “Ae, ma ntsa le!”

27Tsaseng wi ma sansikeyawa wi, “Ae, ma njja le!” Tsü nten na sansikeyawa na ma ssi wa ma jjen wi hang wa.

Jisu Keshü Cüki

(Mat 27.45-53; Mrk 15.33-41; Luk 23.44-49)

28 # Zak 69.21; 22.15 Jisu na khili ha pala tsüdila cenyadha kesa chüya; isanu Ntsawajüh tsü cenya thsüle kesalina ma khi, “Hi dighe yadha.”

29Akhu zza kesü wi kisengtssü kesse pi pongti chitheng; tsalina amissü pi kisengtssü witsü tenya, pi shonpheghe chan kesü wi bhenkiya nu pieki pi ma pang wi chicü. 30Jisu na kisengtssü tsü jjüya nu khi, “Ha cendha le!” Tsaseng wi ma li kejenca dugho nu shüa.

Apie pi Jisu Menni Kekicun

31Tsaseng wi Judah nyi kekhang kesenthu na Pilat wi mathu ya wala anyi pi kross miwi jen kethengthu ccü pashü thsüa, nu kross miwi mathu kamang pieshayale khie. Hawa ha manga ghanan ghena mathu wa ha khie, kepaghenanye mathu Sabbath tsathang wi akamang pi kross miwi ntheng thsü mvu sa. Kepaghenanye Sabbath tsathang tsüwa tsüna kemetha kemechan tsathang kesü saben. 32Tsalina süpahithu na wala Jisu gweghe pi kross miwi jen ketheng atuwa nu kepawa ccü la pashüa. 33Isala mathu na Jisu kete wi kegho wi ma shü kebenla mukeya ghena ma ccü npashüla. 34Isala süpahithu meshu kesü na apie pi Jisu menni kicun chi nu tsü meyi ajjü nu atssü na lle shhugho. 35(Tsü kemuwa na tsü sheipichi, nu ma sheikepi jüh tsüna atsentsa, ma atsentsawa khile kesa ma chüben; isanu nthu la nondiya thsüle kesalina.) 36#Bvü 12.46; Scs 9.12; Zak 34.20 Hawa ha Ntsawajüh wi zhü ketheng tsü sacenya, “Ma gü kesütanla pashü nben.” 37#Zek 12.10; Ccü 1.7 Ntsawajüh na apen kepa wi la khiben, “Anyithu na mathu pie pi kekicun tsü ghang den.”

Jisu pi Kevhü

(Mat 27.57-61; Mrk 15.33-41; Luk 23.50-56)

38Tsaseng wi Josef, Arimatheya nyuti wina keghowa na wa Pilat wi ma ya Jisu kamang tsü pieya thsülo khie. (Josef na Judah nyi kekhang kesenthu kemessi ghena kuthi nu Jisu senkenie nyi kesü.) Pilat na akamang tsü pieya mehaile kiza, tsalina Josef na wa tsü pieshaya. 39#Jhn 3.1-2 Nikodema, kheni aghaja wi Jisu metule keghowa tsüna mirr nu aloe saghu pi hankedemvu kesa kilogram changha-u sen nu Josef gweghe wa. 40Manyi na Jisu kamang pieshaya nu linen thsü pi hankedemvu saghu pi tsü mejuya, tsüna Judah nyithu akamang pi kevhü yen kenie wina kidenya. 41Jisu pi kejen pen wi asanku kesü na ben, nu asanku tsü non wi ashüjjen ketheü kesü anyi kesüla pi npi kevhü na ben. 42Tsü ghanan tsüna Sabbath tsathang tuwa nu ashüjjen na aghatsan wi keben ghena mathu na Jisu kamang pi ciwi chia.

Currently Selected:

JOHAN 19: RENGNBSI

Highlight

Copy