JOHAN 21

Jisu na Sansikeyathu Tagü Tuwi Kegho

1Tsaseng wi Jisu na kheneng Tiberia Ghajü kete wi ma sansikeyathu tuwi gho. Ma hati nu ma ketanla ma pi ccücachi. 2Ciwi Simon Pitor, Thoma (Deduma le kekhiwa), Nathanael (Galilee yyi Kana wina keghowa), Zebedee tsathu, nu kepa wi ma sansikeya meshu keni tsüdi gweghe ben. 3#Luk 5.5 Simon Pitor na kepathu wi khi, “Hi anga cü waten le!”

Mathu na ma wi kiza, “Ikhang la no gweghe waden.” Tsalina mathu ahun wi duya nu wa, isala mathu tsü ghaja mangla ghan meya. 4Ghanenwa aghani na keshhugho seng wi Jisu aghüsa wi nganben, isala sansikeyathu na tsüna Jisu le kesa nchü. 5Jisu na mathu wi keü, “Ipvüshangthu, nthu na anga ghanyale nu?”

Mathu na luneng, “Ikhang mangla ghan meya le!”

6 # Luk 5.6 Ma mathu wi kiza, “Nthu kaghanthsü pi ahun na ajewa cüchilo, isathu nthu na pahan ghanya benna.” Tsalina mathu na kaghanthsü pi cüchi nu ciwi kejon cüya kesalina mathu kaghanthsü zanki meyala.

7Jisu ma tizenghali keten sansikeyawa na Pitor wi kiza, “Hawa ha Apvüwa le!” Pitor na tsüna Apvüwa le kesa zakeya wi (ma thsü khushi pi ketheng ghena) athsü pi ma kejiya nu atssü non wi pendua. 8Sansikeyathu kepa na ahun wina gho anga na kaghanthsü pongti keben tsü zanshiya. Mathu na aghüsa temeja wi nye, isani majü na meter meza-u wi ketan. 9Mathu na shhugho aghüsa cukeya wi amihi pi anni sa nu anga pi tsü miwi chi ketheng nu amesa la muya. 10Tsaseng wi Jisu na mathu wi kiza, “Nthu na khili anga ghankeya tsü pahan sen nu gholo.”

11Simon Pitor na aghüsa wi whala kaghanthsü wi anga ketiti meza nu deni nu kecheng keben tsü zanshi pi aghüsa wi chiya; ciwi anga kejon na ben lela kaghanthsü tsü npaqhela zanshiya. 12Jisu na mathu wi kiza, “Nthu ghola leben-nacü yalo.” Khilitsü sansikeyathu thola “No thowa nu?” ma keü nmessi ladha, kepaghenanye mathu na ma Apvüwa le kesa chüyadha. 13Tsalina Jisu na ghola amesa nu anga khuya nu pi mathu cü.

14Ha khili kecheng tughuwa Jisu na ma keshü wina hangneng-keshagha seng wi sansikeyathu tuwi gho bendha.

Jisu nu Pitor Manyi

15Mathu dsajjükeya seng wi Jisu na Simon Pitor wi keü, “Simon, Johan tsawa, no hathu nu kepa miwi la hi tizenghali ben ma?”

Simon na luneng, “Anle, Apvüwa, hi no tizenghaliden kesa no chüben.”

Jisu ma wi kiza, “Ikhaghaneni zzathu nonccayalo.” 16Jisu na keni tughuwa la ma wi keü, “Simon, Johan tsawa, no hi tizenghaliben ma?”

Simon na luneng, “Anle, Apvüwa, hi no tizenghaliden kesa no chüben.”

Jisu na ma wi khi, “Ikhaghaneni nonccayalo.” 17Jisu na kecheng tughuwa ma wi keü, “Simon Johan tsawa, no hi tizenghaliben ma?”

Jisu na kecheng tughu ma wi “No hi tizenghaliben ma?” kekeü ghena Simon na ma hathana wa, tsalina ma khi, “Apvüwa, no pala tsüdila chüben; hi no tizenghaliben kesa no chüben le!”

Jisu na ma wi khi, “Ikhaghaneni nonccayalo. 18Hi atsentsawa no kizaden: no kepvünyi tsüwi no ketanla ngeshi qhanya nu no kewa mvu wi waaben; isala no qhai wa lethu, nkwen zanki nu nyu na ngeshi qhan nu no ssinu no nkewa mvu pen wi waaben.” 19(Ha Jisu na Pitor khati kesa wi shü nu Anyiza nyankethang sengho ben khe tsü khi kechi.) Tsaseng wi Jisu na ma wi khi, “Hi nie ghalo!”

Jisu nu Sansikeya Kepawa

20 # Jhn 13.25 Pitor na khapeghe wa Jisu ma tizenghali keten sansikeyawa hatu wi dsajjü keben wi Jisu tetsaki wha nu “Apvüwa, thowa na no matsa ben nu?” tsüti kekeüwa tsüna ma seng wi keben muya. 21Pitor na ma muya nu Jisu wi keü, “Apvüwa, anyi hawa tsü khati saben nu?”

22Jisu na ma luneng, “Keujüla hi kenen lethu, hi npi kegho chu ma hangya thsüben, tsüna nghena mangwa ben nu? Hi nie ghalo!”

23Tsalina sansikeya hawa ha shü nbenle kekhi tsüna Jisu senkeniethu jawi khi wa. Isala Jisu na ma shü nbenle nkhi, isani “Keujüla hi kenen lethu, hi npi kegho chu ma hangya thsüben, tsüna nghena mangwa ben nu?” isa khi.

24Hawa ha sansikeya nyi ma hathu khi nu tsüthu la zhüchi, nu ithu na ma sheikepi tsüna atsentsa le kesa chüben.

Ajühsakhen

25Jisu na kulikechi kepa wi la kejon na ben. Keujüla tsüthu tsü kesüsü na zhü wa lethu, hi kemeshen tsü ayyi ha maben wi lela lesüshenthu tsü kechi pen nmi laben.

Currently Selected:

JOHAN 21: RENGNBSI

Highlight

Copy