JOHN I 3
3
Pa lungsiatna in hinkhua hoih a siam
1Ngai un, bangchilawma lungsiatna Pa in eiuh hung pia a ta’imah, Pathian tate chih a i um jiang uh! hujiahin khovel in ahung he lou uh ahi, amah a heet louh jiahun. 2Deihtahte, tuin Pathian tate i hi a, huleh bangtobangin ahiai i um diing chihchu a kilang nai tadih sih hi; hizongleh amah ahung kilat chiangin amah bangin i um diing uh chihchu i he uhi; amah chu a um bangbang a mu diing i hih jiahin. 3Huleh michin amah a hi kinepna nei photmah chu amah a sianthou bangin a kisusiangthou veu hi.
Sual bawl leh Pathian ta hihna kituaah louh jia
4Mi koipouh sual bawl in daan zong a botsia hi; ajiahchu sual chu daan bohsiatna ahi. 5Huleh amah chu i sualnate uh lamang diing a hung kilang ahi chih na he uhi; amah ah chu sual himhim a um sih hi. 6Mi koipouh amah a um zing in chu sual a bawl ngei sih; koipouh sual bawl in amah a mu sih a, he zong a he sih hi. 7Tate haw, kuamah heem in um sih un; dihtatna bawltu chu midihtat ahi, amah a dihtat bangmah in. 8Sual bawl mi chu diabol a kuan ahi, ajiahchu diabol in a chiil apatin sual a bawl zing hi. Ajiahchu Pathian Tapa hung kilatnasan chu diabol silbawlte suse diingin ahi. 9Mi koipouh Pathian a piangin sual a bawl ngei sih; ajiahchu a chi amahah a um hi; huleh Pathian a piang ahihjiahin sual a bawl thei sih hi. 10Hikhu ah Pathian tate leh diabol tate a kihethei hi; mi koipouh dihtatna bawl lou chu Pathian a kuan ahi sih hi, huleh a unau lungsiat lou zong Pathian a kuan ahi sih hi. 11Ajiahchu, a chiil apat a thuhaah na jah u’chu hikhu ahi, khat leh khat i kilungsiat diing uh ahi, chih. 12Giloupa a kuan, a unaupa that, Kaina banga umlou in bang jiahin ahiai a thah mai? Amah silbawlte a hoih louh a, a unaupa a dihtat jiahin ahi. 13Ka unaute, khovel in nanguh ahung muhdah leh limdang sa sih un. 14Unaute i lungsiat jiahin sihna apat hinna ah i luutta hi chi'n i he uhi. Mi koipouh a unau lungsiat lou chu sihna ah a um zing ahi. 15Hizongleh ke'n chu na kawmvah ka soi ahi, Koipouh numei enlahtah a en in a lungsimah amahnu toh a aangkawm zouta ahi. 16Hikhu ah Pathian lungsiatna i hethei uhi, ama’n eiuh diinga a hinna a piahkhiah jiahin; huleh eiun zong unaute diinga i hinna i piah ve diing uh ahi. 17Hizongleh mi koipouh in khovel sil hau henla, a unau tasam in mu in, amah chu lainat het sih leh, bangchi'n Pathian lungsiatna amah ah a um diai? 18Ka tate haw, thu chauh in i lungsiat sih diing a, kam chauh in zong i lungsiat sih diing uh; hizongleh silbawl leh thutah in hizaw hen. 19Hikhu ah thutah a kuan i hi uh chih i he a, huleh amah ma ah i lungtang uh i muangsah thei diing uhi. 20Ajiahchu i lungtang un siamlouh ahung tansah leh, Pathian chu i lungtang sangin a loupizaw a, sil zousiah a he hi. 21Deihtahte, i lungtang in siamlouh ahung tansah louh leh Pathian lamah i haang ahi. 22Huleh a thupiahte i juih a, a mitmuh a sil kipaahhuaite i bawl jiahin i nget photmah amah apat i mu hi. 23Huleh a thupiah chu hikhu ahi. Eihaw’n a Tapa Jesu Khrist min i gintaat a, huleh thu ahung piah banga khat leh khat i kilungsiat diing uh ahi, chih. 24Huleh mi koipouh a thupiah jui chu Amah ah a um a, Amah zong amah ah a um hi. Huleh hikhu ah amah chu eiuh ah a um zing chih i he uh, Hagau ahung piah ah.
Currently Selected:
JOHN I 3: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.