SILBAWLTE 13
13
Hagau Siangthou in Paul leh Barnaba a kouh
1Huleh Antiok khua a kouhtuam umte laha zawlneite leh thuhilhtute a um va; hute chu Barnaba, Simeon, Nigar a chih uh te, Cyrene khua a um Lusia, kumpipa Herod toh khang khawm Manaen, leh Saul te ahi uh. 2Huchia Lalpa nna tong a an a ngawl laiun, Hagau Siangthou in, Barnaba leh Saul keimah nna tong diingin hung khenkhiahsah un, a chi a.
Paul Missionary a, a zin masatna
3Huleh an a ngawl va a haamtei zohun, a tungvah a khut uh a nga va, a chiahsahta uhi. 4Huchi'n Hagau Siangthou sawldoh in a chiah va, Seliusia khua ah a chiahsuh va, hu akipatin Cyprus lamah kuang in a chiahta uhi. 5Huleh Salamis khua a a um laiun, Judate kikhopna innte ah Pathian thu a soi va; huleh John zong a nna uh tohsah diingin a pui uhi.
Setan kalhna
6Huleh Cyprus tuikulh gam chu tawnsuah in Paphos khua ah a tungva, huah dawisiam zawlnei heem Judami khat a mu va, a min chu Bar-Jesu ahi a. 7Hu mi chu gamoptu Serjia Paulus mipiltah kawma um ahi; hu gamoptu’n Saul leh Barnaba chu a kou a, Pathian thu jah a ut a. 8Hizongleh Elima (Bar-Jesu min dang umzia ahi), dawisiampa’n gamoptu chu gin louhsah tum in, amahuh chu ana doudaal hi. 9Huin Saul, (Paul a chih mah uh) chu Hagau Siangthou in a dim a, amah chu a ensaal a, 10Huin, Aw Nang mi heem leh hoih louhna chintenga dimpa, nang diabol tapa, nang dihtatna zousiah meelmapa, Lalpa lam dihtahte suhsiat tawplou diing na hi maw? 11Huleh tuin, ngai in, Lalpa khut na tungah a tu ahi, na mit ahung taw diing a, bangtan aha khovaah mu louin na um diing, a chi a. Huin, thakhat in mei leh mial a tungah ahung kia a; khuta kaitu diing hawl in a vaah lehlehta hi. 12Huin gamoptu in hu sil kibawl chu a mu a, Lalpa thuhilh chu limdang a sa mahmah a, a gingtata hi. 13Huin Paul chu a lawite toh Paphos khua apatin a chiah va, Pamphilia gam a Perga khua a tungva; huleh John in amahuh chiahsanin Jerusalem khua ah a kiih kiitta hi.
Ginna jiaha siamtanna
14Hizongleh amahuh chu Perga khua akipat a chiah jel va, Pisidia gam a Antiok khua a tungva, huleh, khawlni in kikhopna inn ah a luut va, a tou uh. 15Huleh Daan lehkhabu leh zawlneite lehkhabu a sim zohun kikhopna inn upate in a kawmvah mi a sawl va, Nanguh mite leh unaute, mite hasotna thu soi diing na neih uleh soi un, a chi va. 16Huin Paul a ding a, a khut a jap in, a soi a, Israelmite leh nanguh Pathian laudan siamte, ngai un. 17Hi Israel namte Pathian in i pulepate uh a teel a, Aigupta gam a, a um laiun a suloupi a, huleh, tungnung khut in hu a kipatin a puidohta hi. 18Huleh kum sawmli hun sung vel chu gamdai ah a silbawlte uh a ngai thei a. 19Huleh Kanan gam a nam sagihte a suhmang zohin, a gam uh a kawmvah aaisaan in a hawmsah hi. 20Hu nungin kum zali leh kum sawmngaa sung vaihawmtute a pia a, zawlnei Samuel chiang tanin. 21Huleh hu nungin kumpi a ngen va; huchi'n, Pathian in Saul, Kis tapa, Benjamin phung a mi, amahuh a pia a, kum sawmli sung diingin. 22Huleh amah a suanmang nungin a kumpipa va pang diingin David a tungdohta a; Pathian in hu pa thu chu hesah in, David, Jesse tapa, ka lungtang bang pua mi ka mudohta, ama’n chu ka deihlam phot a bawl diing, a chi a. 23Hi mipa haahte lahah Pathian in a thuchiam dungjuiin Israelte kawmah Hundampa Jesu ahung tutta hi. 24Ahung ma in John in kisiihna baptisma thu Israelmi zousiah kawmah ana hilh masa hi. 25Huleh John in a lam a juih zoh kuan laiin, Nangun kua hi diingin na hung gingta viai? Amah chu hilou ka hi. Hizongleh, ngai un, ka nungah mi khat hung diing ahi, kei chu a keengtophah phel taah zong ka hi sih hi, a chi hi. 26Mite leh unaute, Abraham suan tate haw, huleh na lahva Pathian laudan siam zousiah haw, na kawmvah hi hutdamna thu hung kihaah ahi. 27Jerusalem khua a umte leh a lamkaiteun, a heet louh jiahun, Amah chu siamlouh tangsah in, hu thute ana sutaangtungta uh ahi. 28A sihna diing khop a tunga bangmah a muh louhun zong, Pilat kawmah suhlup diingin a ngen va. 29Huleh a tungtaang thu na kigelhsa zousiah a suhtaangtung zohun, sing akipanin a lakhia va, haanah a sialta uhi. 30Hizongleh Amah chu Pathian in misi laha kipat a kaithou kiitta hi; 31Huleh, amah toh Galili gam a kipat a Jerusalem khua a chiah pute kawmah ni tampi sung a kilaah veu a, hu mite chu tuin mite kawmah a thu heetpihtute ahi uhi. 32Huleh kei un zong i pulepate uh kawma chiamsa, hu thuchiam tanchin kipaahhuai ka hung hilh uhi. 33Pathian in Jesu a kaihthoh kiitna ah, Huchu, ei a tate uh kawmah a sutaangtung ahi; Psalm nihna a, Nang chu ka Tapa na hi a, tuni’n ka hung hing ahi, chih gelh bangin. 34Huleh muatna muna pai kiitta lou diing a Pathian in Amah misi laha kipat a kaihthoh diingdan thu chu hichi'n a soi hi, David kawma khotuahna thawnloute nangmah ka hung pe diing, chi'n. 35Hujiahin ama’n Psalm dangah, Na misiangthou chu muatna na musah sih diing hi, a chi kiit jel hi. 36Ajiahchu David in chu Pathian vaihawmsah banga amah khang a mite na a toh zohin, a ihmu a, huleh a pulepate kawmah a sial va, a muat mangta hi. 37Hizongleh Pathian in a kaihthoh in chu muatna a mu sih hi. 38Hujiahin hi chu he un, mite leh unaute; Amah vanga sual ngaihdamna thu na kawmva kisoi ahi; 39Huleh kuapouh a gingta phot chu Mosi daan a siam na tan zoh louhna uh sil zousiah ah, siamtansah in a um hi. 40Hujiahin pilvaang un, huchilouin zaw zawlneite lehkhabu a hu thu kisoi na tungvah ahung tungkha diing hi. 41Nanguh musittute en un, huleh limdang sa unla, mangthai un; ajiahchu na damsungun nna khat ka tong hi, hu nna chu mi’n nanguh hung hilh mahleh uh na gingta top sih diing uhi, chih, a chi a. 42Huleh Judate kikhopna inn apat a pawt un, Jentelte’n khawlni kiit chianga hu thu chu a kawmva soi diingin a ngen uh. 43Huleh kikhawmte chu a kikhenjah tahun, Judate tamtah leh Juda biahdan jui Pathian ngaihsah laha mi tamtah in Paul leh Barnaba a jui va,amahun amahuh chu ana houpih va, Pathian khotuahna a um zing diingin ana hasot uhi.
Sawllehte’n Jentel lam a ngat uh
44Huleh khawlni kiit in, a khojang phial un, Pathian thu ngaikhe diingin ahung kikhawm va. 45Hizongleh Judate’n mipite a muh tahun a thangse mahmah va, Paul thusoi chu a kalh va, a soisia uhi. 46Huin Paul leh Barnaba in haangsantahin a soi va, Pathian thu hi nanguh kawma soi masat diing mawng ahi a; hizongleh, na nial va, kumtuanga hing taahlou a na kiguat nungun he un, Jentelte lam ka ngatta uh ahi. 47Ajiahchu Lalpa’n hichi bangin kei uh thu ahung pia hi, Jentelte vaah hi diingin ka hung guat a, kawlmong tanpha a hutdamna hi diingin, chih gelh bangin, a chi a. 48Huleh Jentelte’n hu thu a jahun a kipaah va, Lalpa thu a paahtawi va; huleh, kumtuanga hing diing a guat taphot in a gingta uhi. 49Huleh Lalpa thu chu hu gam pumpi ah a dalhta hi. 50Hizongleh Judate’n Pathian ngaihsah numei zahtaathuaite leh khosung upate a chiilsia va, Paul leh Barnaba chu a sawisah va, a gam vapat a delhmangta uhi. 51Huin amahun a tungvah a keengpeeh va leivui a thingkhia va, Ikonium khua ah a chiahta uhi. 52Huleh nungjuite chu kipaahna leh Hagau Siangthou in a dimta uhi.
Currently Selected:
SILBAWLTE 13: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
