SILBAWLTE 25
25
Paul Gam-optu thah Festa ma ah
1Huchi'n Festa in gam chu a opta a, Caesarea apatin Jerusalem ah a chiahtou a. 2Huin, siampulal leh Juda lamkaite’n a kawmah, Paul tungthu ahiloulam in a hesah va, 3Huleh, lampi a ana guuhtaan va, ana thah theihna diingun a kawmah Paul chu Jerusalem a va puitousah diingin a ngen uhi. 4Hizongleh, Festa in, Paul chu Caesarea ah kep diing ahi, kei zong hu lamah ka chiahpah diing. 5Huchi'n, hu mi in giitlouhna nei ahihleh, na lahva thu neithei photmah in hung juisuh u’henla heeh u’heh, chi'n a dawng hi. 6Huleh a lahva ni sawm val a taam nungin Caesarea ah a chiahsuh a; huleh, a jingin vaihawmna touphah ah a tou a, Paul chu hung pui diingin thu a pia hi. 7Huleh amah ahung tunin, Jerusalem akipan hungsuh Judate chu a kiimah a ding va, a tungah thubuai tampi soi in, setahin a heeh va a thu dihtah chu a ensah thei tuan sih uhi. 8Paul in a dihna thu a soi a, Judate daan thu ah hiin, Pathian biahinn thu hitaleh, huleh Kaisar tungah hitaleh sil mawngmawng ka hihkhial sih hi, a chi a. 9Hizongleh Festa in Judate deihzawng bawl a ut a, Paul kawmah, Jerusalem a chiahtouh a hutaha ka ma a hi thute ngaihtuah hileh na ut ei? a chi a, a dong hi.
Paul in Kaisar kawmah a thu a tut
10Huin Paul in Kaisar vaihawmna touphah ma ah vaihawmsaha um diingin ka ding hi; Judate tungah bangmah ka hihkhial sih hi, nang chiantaha na heet ahi. 11Migilou ka hih a, sihna khopa sil hihkhial ka hih leh, sih zong ka nial sih; hizongleh, hite'n ahung heehna teng uh a dihtah a um louh leh, kuama’n a kawmvah ahung pekhe thei sih diing uh Kaisar kawmah ka tut diing, a chi a. 12Huin Festa in vaihawmtute a houpih kiimvel zohin, Kaisar kawmah tut na tum maw? Kaisar kawmah na tung ngei diing hi, chi'n a dawng hi.
Kumpipa Agrippa kawmah Paul tungthu Festa in a soi
13Huleh, ni bangzah aha nungin, kumpipa Agrippa leh Bernisi chu Caesarea ah Festa chibai buuh diingin a hung va. 14Huleh amahuh hua ni tampi a taam nungun, Festa in Paul tungthu kumpipa kawmah a soi a, Felix in mitaang khat a nusia a; 15Jerusalem a ka um laiin siampu lalte leh Juda upate’n a thu ahung hesah va, siamlouh tangsah diingin ahung ngen uh. 16Ke’n a kawmvah, A heehpa uleh a heehte a kimaituah va, a heehna thu va ama’n a dihna thu soina lemtaang a neih ma in, mi kuamah gawt diing a piahkhiah Romemite daan ahi sih hi, chi'n ka dawng hi. 17Hujiahin amahuh hitah ahung tunun, sawt hal louin a jingni in vaihawmna touphah ah ka tou a, Hi mi chu hung pui diingin thu ka pia hi. 18Huleh a heehtute a din laiun, ka gintaat bangtahin a tungah giitlouhna thubuai bangmah laha soi sih va; 19Hizongleh amahuh biahdante leh, mi khat, Jesu, a sisa, Paul in a hing kiit chia a soi, thu ah kinialna nei ahi zaw uhi. 20Huleh ke'n hutobang kinialnate khendan ka heet louh jiahin Jerusalem a chiah a, hutaha hu thu khen a ut leh ut louh ka dong hi. 21Hizongleh Paul in Augustus khen diing a siit a nget zawh jiahin Kaisar kawma ka sawl theih masiah veeng diingin thu ka pia hi, a chi a. 22Huin Agrippa in Festa kawmah, Ke’n zong hu pa thusoi ka ngaikhe diing, a chi a. Ama’n, Jing chiangin a thusoi na ngaikhe diing, a chi hi.
Agrippa Paul thu ngaikhia diingin a kisa
23Huleh a jingni in, Agrippa leh Bernisi chu loupitahin a hung va, sepaih houtu liante leh khua a miliante toh thu soina inn ah ahung luut va, Festa thuin Paul chu ahung pui uh. 24Huin Festa in, kumpipa Agrippa leh hi muna ka kawmva um zousiahte’n hi pa na mu uhi, amah chu Judate mipi zousiah in Jerusalem ah leh hitah munah ka kawmah a heeh va, hing taah ahi sih chi'n a kikou uhi. 25Hizongleh sihna diing khophial bangmah a bawl sih chih ka he a, huleh, ama’n Augustus kawma a thu tut a tup jiahin sawl ka guat ahita. 26Hizongleh a thugin a bangmah ka lalpa kawma gelh diing lah ka thei sih a. Hujiahin na ma vah ka hung puikhia ahi, kumpipa Agrippa Aw, nang ma a hung pui ka hi deuh hi, ajiahchu, a thu dotvel nunga gelh diing nengkhat beeh ka muh theihna diingin. 27Mitaang khat lalpen kawm a sawl a, a tunga a heehna thu uh heetkhawmsah louh ngolhuai hiin ka he ngal a, a chi hi.
Currently Selected:
SILBAWLTE 25: SIMTBSI
Highlight
Share
Compare
Copy
Want to have your highlights saved across all your devices? Sign up or sign in
Simte New Testament - Thuhun Thah
Copyright © 2016 by The Bible Society of India
Used by permission. All rights reserved worldwide.
